Iopu

O ‘Upu a Iopu

¹“O i ai lava le mea e maua ai le ario,ma le mea mo le auro latou te fa‘amamāina ai. ²E maua le u‘amea i le ‘ele‘ele,e tunu ‘ia liu suāvai le ma‘a e maua ai ‘apamemea. ³E fa‘agataina e le tagata le pouliuli e matuā su‘esu‘eina fo‘i e ia mea uma;o ma‘a o i ai i le pouliuli ma le ata o le oti. ⁴E ‘elia e ia le lua maulalō e mamao ma le mea e nonofo ai tagata,e fa‘agalogaloina e le vae;‘ua latou tautau ma tāupe e mamao a‘e ma tagata. ⁵E tupu mai mea e ‘ai i le lau‘ele‘ele;o ona lalo fo‘i pe a suatia e i ai e peiseaī o le afi. ⁶O ona ma‘a o le mea lea e i ai safaira,e i ai fo‘i efuefu auro. ⁷“O le ala i ai e lē iloa e le manulele e fe‘ai,e lē va‘ai i ai fo‘i mata o le lulu. ⁸E lē sāvavali i ai manu fe‘ai,e lē ui i ai le leona. ⁹“E tago atu le lima o le tagata i le papa alā,na te fulisia mauga ai o latou vae mauga. ¹⁰E foa e ia alāvai i papa;e va‘ai atu fo‘i ona mata i mea tāua uma. ¹¹E punitia e ia vaitafe ‘ia lē tulutulu ifo;na te ‘aumai fo‘i i le malamalama le mea sa lilo. ¹²“A o le poto e maua lea ifea?Po o ifea fo‘i le mea o i ai le mafaufau? ¹³E lē iloa e le tagata sona tau;e lē maua fo‘i i le nu‘u o tagata ola. ¹⁴‘Ua fai mai le moana; ‘E lē o i ai lea ‘iā te a‘u;’‘ua fai mai fo‘i le sami, ‘E lē o ‘iā te a‘u.’ ¹⁵E lē taulia i auro lelei,e lē fuatia atu fo‘i ario e fa‘atau ai. ¹⁶E lē fa‘atatauina i auro mai Ofeira,po o le soama tāua, po o le safaira. ¹⁷E lē fa‘atusatusa i ai auro ma ma‘a tioata;e lē fesuia‘iina fo‘i i teuga auro lelei. ¹⁸E lē ta‘ua le ramuta ma le kapesa,auā a maua le poto e sili lea i penina. ¹⁹E lē fa‘atusatusa i ai le topasi mai Kusa,e lē fa‘atatauina i auro lelei. ²⁰“O lenei, pe sau mai fea le poto?Po o ifea fo‘i le mea o i ai le mafaufau? ²¹Auā ‘ua natia i mata o ē ola uma lava,‘ua lilo fo‘i i manu felelei. ²²‘Ua fai mai le malaia ma le oti,‘‘Ua lagona e o mā taliga lona logo.’ ²³“‘Ua silasila e le Atua le ala i ai,o ia lava ‘ua silafia le mea o i ai. ²⁴Auā o lo‘o silasila o ia i tulu‘iga o le lalolagi;o lo‘o silafia e ia mea uma i lalo o le lagi. ²⁵E fa‘amalosia e le Atua le malosi o le matagi,ma ia fuatia ai o vai e tele. ²⁶O ona po na ia faia le tulafono mo le timu,ma le ala mo le uila o le faititili. ²⁷Na silafia ai e ia ma na fa‘aalia mai ai;na ia saunia ma na su‘esu‘eina lava.