1 “‘Ua ‘ou osia le feagaiga ma o‘u mata,se a fo‘i le mea ‘ou te manatu ai i se taupou?
2 Se a fo‘i le tofi mai le Atua o i lugā?ma le tofi mai Lē e ona le malosi uma lava o i mea maualuluga?
3 E lē ‘ua tu‘u ‘ea le malaia mo lē ‘ua amio leaga,ma le puapuagā mo o ē ‘ua fai mea leaga?
4 ‘Ua lē silasila ‘ea o ia i o‘u ala,ma faitaulia o‘u la‘asaga uma?
5 “‘Āfai ‘ua ‘ou savali ma le pepelo,po ‘ua tele vavave o‘u vae i le fa‘a‘ole‘ole,
6 ‘ia fuatia a‘u e ia i le fua fa‘atautau,‘ia silafia ai e le Atua ‘ua sa‘o la‘u amio.
7 ‘Āfai ‘ua ō ‘ese o‘u vae i le ala ma mulimuli atu lo‘u loto i o‘u mata,ma pipi‘i mai se mea leaga i o‘u lima;
8 ‘ia ‘ou lūlūina atu saito, a ‘ia ‘aina e se tasi;‘ia lia‘iina fo‘i a‘u mea e tutupu.
9 “‘Āfai ‘ua ‘olegia lo‘u loto i se fafine,po ‘ua ‘ou lamalama i le faitoto‘a o lē ma te tuā‘oi;
10 ‘ia olo saito fa‘atasi la‘u avā mā se tasi tamaloa,‘ia ta‘o‘oto fo‘i o ia ma isi tane.
11 Auā o le agasala tele lea,o le soli tulafono mamafa, ‘ua aogā i ai le fa‘amasino.
12 Auā o le afi lava lea e susunuina ai se‘ia o‘o ‘ina fa‘aumatia;e lia‘iina ai fo‘i a‘u mea uma ‘ua tutupu.
13 “‘Āfai ana ‘ou lē mafai ‘onafa‘amasinoina mea a la‘u ‘au‘auna tane ma la‘u ‘au‘auna fafine,‘ina ‘ua la finau mai ‘iā te a‘u;
14 se a fo‘i se mea ‘ou te faia pe a tula‘i mai le Atua?Se a fo‘i sa‘u e tali atu ai ‘iā te ia pe a fa‘amasino mai o ia?
15 O lē na faia a‘u i le manava, e lē o ia fo‘i lea na faia o ia?E lē o le to‘atasi ‘ea, na ia faia i mā‘ua i le manava?
16 “‘Āfai ‘ua ‘ou tāofi se mea na manana‘o i ai o ē matitiva,po ‘ua fole mata o le fafine ‘ua oti lana tane talutalu ai a‘u;
17 po ‘ua ‘ou ‘ai to‘atasi na o a‘u i la‘u mea e ‘ai,‘ae le‘i ‘ai ai fo‘i lē ‘ua aumatuā.
18 Auā na ma tutupu talu ‘ina ‘ou itiiti, e peiseaī o lona tamā a‘u;talu fo‘i ‘ina fānaua mai o a‘u e lo‘u tinā,na ‘ou tausi i le fafine ‘ua oti lana tane.
19 ‘Āfai ‘ua ‘ou iloa se tasi a fano ‘ina ‘ua leai sona ‘ofu,ma sē ‘ua mativa ‘ua leai sona lavalava.
20 ‘Āfai ‘ua lē fa‘amanū mai ‘iā te a‘u lona sulugātiti,‘āfai fo‘i ‘ua lē mafanafana o ia i fulufulu o a‘u mamoe.
21 ‘Āfai ‘ua ‘ou si‘i atu lo‘u lima i lē ‘ua aumatuā,‘ina ‘ua ‘ou iloa i le faitoto‘a le fesoasoani ‘iā te a‘u;
22 ‘ia pa‘ū ‘ese lo‘u lima mai lo‘u tau‘au,‘ia fā‘ia fo‘i lo‘u lima mai ona so‘oga.
23 Auā ‘ua ‘iā te a‘u le mata‘u i le malaia mai le Atua;na ‘ou lē mafaia fo‘i ‘ona o lona silisili.
24 “‘Āfai ‘ua ‘ou fai auro ma mea ‘ou te fa‘alagolago i ai,po ‘ua ‘ou fai atu i auro, o lo‘u fa‘atuatuaga oe.
25 ‘Āfai ‘ua ‘ou ‘oli‘oli ‘ina ‘ua tele a‘u ‘oloa,‘ina ‘ua maua fo‘i e o‘u lima mea e tele.
26 ‘Āfai ‘ua ‘ou va‘ai i le lā ‘ina ‘ua pupula mai;ma le masina ‘ina ‘ua alualu a‘e ma susulu mai;
27 ma ‘ua ‘olegia fa‘alilolilo lo‘u loto,ma ‘ua sogi ai lo‘u gutu i lo‘u lima.
28 O le agasala lava lea e fa‘asalaina e fa‘amasino;auā o le tu‘ua lea e a‘u o le Atua o i lugā.
29 “‘Āfai ‘ua ‘ou ‘oli‘oli i le malaia o lē ‘ua ‘ino‘ino mai ‘iā te a‘u,ma ‘ou fa‘afiafia ‘ina ‘ua maua o ia i le leaga;
30 ‘ua ‘ou lē mafaia fo‘i ‘ona agasala lo‘u gutu i le ole atu ‘ia fa‘afanoina o ia.
31 ‘Ua lē fai ane ‘ea o lo‘u ‘au ‘āiga,‘O ai ‘ea ‘ua lē mā‘ona i ana manu?’
32 E le‘i moe i fafo le tagata ‘ese;‘ua ‘ou fa‘aavanoa lo‘u faitoto‘a mo ē malaga.
33 ‘Āfai ‘ua ‘ou ufiufi lo‘u solitulafono e pei o Atamu,i lo‘u natia o la‘u agasala i lo‘u loto,
34 ‘ia ‘ou fefe lava i le vao tagata e to‘atele;‘ia fa‘aatuatuvaleina a‘u i le ‘ino‘ino mai o ‘āiga;‘ia ‘ou fa‘alologo fo‘i, ‘ia ‘ou le toe ulufafo i le faitoto‘a.
35 E! fia fa‘afofogaina mai a‘u e ia.Fa‘auta, o lo‘u fa‘ailoga lenei;‘ia tali mai Lē e ona le malosi uma lava ‘iā te a‘u,ma ‘ia tusia se tusi e le tagata ‘ua finau mai ‘iā te a‘u.
36 ‘Ou te fa‘afuataina lava; ‘ou te nonoaina lava e fai mo‘u pale.
37 ‘Ou te fa‘aali atu ‘iā te ia le faitau o ‘ou la‘asaga;‘ou te fa‘alatalata atu ‘iā te ia e pei o se ali‘i sili.
38 “‘Āfai e ‘alaga atu lo‘u fanua ‘ona o a‘u, ma fētāgisi fa‘atasi ona atu puē;
39 ‘āfai ‘ua ‘ou ‘aina ona fua ma le lē tauia,ma ‘ou fa‘asaunoa i ē pule i ai,