Iopu

O le Tali a Iopu

¹‘Ona tali atu ai lea o Iopu, ‘ua fa‘apea atu, ²“Tou te fa‘atigāina ‘ea lo‘u loto,ma ‘outou tu‘imomomoina a‘u i ‘upu se‘ia afea? ³‘Ua fa‘asefulu lava ‘ona ‘outou fa‘aleagaina o a‘u,‘ua ‘outou le mamā ‘ona ‘outou taia mai o a‘u. ⁴‘Āfai fo‘i e moni ‘ua ‘ou sesē,‘ua i ai pea ‘iā te a‘u lava lo‘u sesē. ⁵‘Āfai lava e moni tou te fa‘amaualuga mai ‘iā te a‘u,ma ‘outou ta‘uta‘u mai ‘iā te a‘u mea e fai mo‘u luma. ⁶‘Ia ‘outou iloa lava; o le Atua ‘ua fa‘aliliuina a‘u,‘ua na si‘omia fo‘i a‘u i lona ‘upega. ⁷Fa‘auta, ‘ou te ‘alaga atu ‘ona o le ‘sauā,’a ‘ua lē fa‘afofogaina a‘u;‘ou te uiō atu lava, ‘ae leai se fa‘amasinoga. ⁸‘Ua ia puipuia lo‘u ala, ‘ou te lē mafai ‘ona sopo‘ia atu lava,‘ua ia tu‘uina fo‘i le pouliuli i o‘u magāala. ⁹‘Ua ia ‘ave‘eseina lo‘u mamalu ‘iā te a‘u,‘ua ia tō ‘ese fo‘i le paleali‘i i lo‘u ulu. ¹⁰‘Ua ia fa‘aumatia a‘u i itū uma; o le a ‘ou alu atu i ai;‘ua ia lia‘iina fo‘i lo‘u fa‘amoemoe e pei o le la‘au. ¹¹‘Ua matuā to‘asā mai fo‘i o ia ‘iā te a‘u,e peiseaī fo‘i ‘ua na faia a‘u mōna fili. ¹²‘Ua ō mai fa‘atasi ana ‘au ma latou tanu lo latou ala e tau ma a‘u,ma latou tolauapi e si‘osi‘omia ai lo‘u fale ‘ie. ¹³“‘Ua ia fa‘amamaoina lava o‘u uso ‘iā te a‘u,o ē na matou masani fo‘i ‘ua latou faia a‘u ma tagata ‘ese ‘iā te i latou. ¹⁴‘Ua tu‘ua a‘u e i latou matou te tuā‘oi,‘ua fa‘agalogalo fo‘i ‘iā te a‘u e a‘u aumea mamae. ¹⁵O ē ‘ua āumau i lo‘u fale, ‘atoa ma a‘u ‘au‘auna fafine,‘ua latou faia a‘u ma tagata ‘ese;‘ua fai a‘u ma tagata ‘ese i o latou manatu. ¹⁶‘Ua ‘ou vala‘au i la‘u ‘au‘auna, a ‘ua lē tali mai o ia;‘ua ‘ou ‘ai‘oi atu ‘iā te ia i lo‘u lava gutu. ¹⁷‘Ua ‘ino‘ino lo‘u lava ‘āiga ‘iā te a‘u,‘ua ‘inosia fo‘i la‘u mānava e la‘u avā. ¹⁸‘Ua ‘ino‘ino mai lava tamaiti ‘iā te a‘u,‘ua latou fai ‘upu leaga mai ‘iā te a‘u. ¹⁹‘Ua ‘inosia a‘u e a‘u aumea mamae uma;o i latou fo‘i na a‘u alofa i ai ‘ua latou liliu ‘ese ‘iā te a‘u. ²⁰‘Ua pipi‘i o‘u ivi i lo‘u pa‘u ma lo‘u ‘a‘ano,‘ua ‘ou sao ma le pa‘u o o‘u nifo. ²¹Alofa mai ia ‘outou ‘iā te a‘u,‘inā alofa mai ia ‘iā te a‘u ‘outou o a‘u uō;auā ‘ua papa‘i mai le ‘a‘ao o le Atua ‘iā te a‘u. ²²Se a ‘ea le mea tou te tulituliloa mai ai ‘iā te a‘u,e pei o le Atua ma ‘ua ‘outou lē mā‘o‘ona i lo‘u tino? ²³“E, fia tusia lava o a‘u ‘upu! e,fia tusia ai i le tusi! ²⁴‘Ia togitogiina i le peni u‘ameama le pulu u‘amea i le papa e fa‘avavau. ²⁵Auā ‘ua ‘ou iloa, o lo‘o soifua lē na te togiolaina a‘u;o aso amulī fo‘i e tula‘i mai ai o ia i luga o le ‘ele‘ele. ²⁶E ui lava fo‘i ‘ina fa‘aumatia lenei tino pe a mavae atu lo‘u pa‘u,‘ae ‘ou te iloa atu le Atua i lo‘u tino. ²⁷‘Ou te iloa atu ‘iā te ia mo a‘u lava,e va‘ai atu fo‘i o‘u mata ‘iā te ia,‘ae lē o se tasi; pe a lē toe i ai o‘u mana‘o i totonu ‘iā te a‘u. ²⁸Auā ‘ua tatau pe ‘ana ‘outou fai mai,‘Se a le mea ‘ua tatou tuliloa atu ai ‘iā te ia?’ma ‘O le mafua‘aga lava o lo‘o ‘iā te ia lava.’