1 “E lē o i ai ‘ea i le tau‘a ‘ua tofia i tagata i le lalolagi?pe lē tusa fo‘i o latou aso i aso o lē ‘ua galue i le taui?
2 E fa‘apei ‘ona naunau le pologa i le paolo,e fa‘apei ‘ona fa‘atalitali atu fo‘i o lē ‘ua galue i le taui i lona totogi.
3 E fa‘apea lava ‘ona fai mo‘u o masina e tigāina ai,‘ua tofia fo‘i ‘iā te a‘u o po e puapuagātia ai.
4 A ‘ou ta‘oto, ‘ona ‘ou fa‘apea lea,po ‘O afea ‘ou te tula‘i atu ai ma mavae atu le po?’‘Ua aoina ‘ua ‘ou lē mapu i le feliuliua‘i.
5 ‘Ua liloia lo‘u tino i tuga,‘ua to‘ato‘a ai le ‘ele‘ele;‘ua iliganoa lo‘u pa‘u ma ‘ua toe sua.
6 ‘Ua sili ‘ona tele vavave o‘u aso i le si‘a a le laga ‘ie;‘ua uma fo‘i ‘ua aunoa ma se fa‘amoemoe.
7 “‘Ia e manatua, o le matagi lava lo‘u ola;e lē toe iloa e o‘u mata se mea lelei.
8 E lē toe va‘ai mai ‘iā te a‘u mata o lē sa iloa a‘u;‘ua e silasila mai ‘iā te a‘u, ‘ona leai lea o a‘u.
9 ‘Ua ta‘ape le ao ‘ua mavae atu,e fa‘apea lē ‘ua alu ifo i le tu‘ugamau,e lē toe alu a‘e o ia.
10 E lē toe fo‘i mai o ia i lona fale,e lē toe iloa o ia i le mea sa i ai o ia.
11 “O le mea lea ‘ou te lē tāofi ai lo‘u gutu,‘ou te tautala i le puapuagā o lo‘u agaga,‘ou te tagi atu i le tigā o lo‘u loto.
12 O le sami ‘ea a‘u, po o se tanimo,‘ua e tofia mai ai se leoleo ‘iā te a‘u?
13 A a‘u fa‘apea,‘O lo‘u moega e fa‘amafanafanaina ai a‘u,o lo‘u ta‘otoga e fa‘amāmāina ai lo‘u tagi.’
14 ‘Ona e fa‘afefe mai ai lea ‘iā te a‘u i miti,‘ua e fa‘amata‘utia fo‘i a‘u i mea e fa‘aali mai.
15 O lea ‘ou te mana‘o ai ‘ina ‘ia mole o a‘u;e tele lo‘u mana‘o i le oti, ‘ae itiiti i ‘ou nei ivi.
16 ‘Ou te ‘ino‘ino i ai, ‘ou te lē fia ola pea;tu‘u mai pea ia o a‘u, auā ‘ua fa‘atauva‘a lava o‘u aso.
17 Se a ‘ea le tagata, ‘e te fa‘asilisili ai o ia?ma e manatu mai ai ‘iā te ia?
18 ma e asiasi mai ai ‘iā te ia i taeao uma,ma tofotofo mai pea lava ‘iā te ia?
19 ‘E te lē ‘alo ‘ea ou fofoga ‘iā te a‘u se‘ia afea?‘e te lē se‘i tu‘uina mai ‘ea ‘iā te a‘u,se‘ia ‘ou folo lo‘u feanuga.
20 ‘Ua ‘ou agasala;se a se mea ‘ua ‘ou faia ‘iā te oe,o lē ‘ua silasila i tagata?Se a ‘ea le mea ‘ua e fai ai a‘u ma manulautī ‘iā te oe,‘ua fai ai a‘u ma avega ‘iā te oe?