Iopu

O ‘Upu a Eliu

¹‘Ua tali mai pea Eliu, ‘ua fa‘apea mai, ²“Fa‘afogafoga mai i a‘u ‘upu o ‘outou o ē popoto;o ‘outou o ē silafia mea, ‘inā liliu mai ia o ‘outou fofoga ‘iā te a‘u. ³Auā e fa‘amasino e le taliga i ‘upu,e pei ‘ona tofotofo e le gutu i mea e ‘ai. ⁴‘Inā tatou filifili ia le tonu mo i tatou;‘ia tatou iloa e i tatou lava, po o le a le lelei. ⁵Auā ‘ua fa‘apea mai Iopu,‘‘Ua ‘ou amiotonu; ‘ua ‘ave‘esea fo‘i e le Atua lo‘u fa‘amasinoga. ⁶‘Ua ‘avea a‘u ma pepelo i lo‘u fa‘amasinoga,‘ua manu‘a leaga lava a‘u, ‘ae leai so‘u solitulafono.’ ⁷O ai ‘ea se tagata e tusa ma Iopu,o lē ‘ua inu i le fāifāiga e pei ‘ona inu i le vai. ⁸O lē ‘ua fefa‘auōa‘i fo‘i ma i latou ‘ua fai amioletonu,ma feoa‘i ma tagata amio leaga. ⁹Auā, ‘ua ia fai mai,‘E lē aogā i le tagata ‘ona ia fiafia o ia i le Atua.’ ¹⁰“O lenei, tagata atamamai e, fa‘afogafoga mai ia ‘iā te a‘u;e mamao ma le Atua ‘ona ia amio leaga,ma Lē e ona le malosi uma lava ‘ona ia amioletonu. ¹¹Auā e taui atu e ia i le tagata lana lava galuega;na te fa‘atatau fo‘i i tagata ta‘ito‘atasi e tusa ma lona ala. ¹²E moni lava e lē amioleaga le Atua,e lē fa‘api‘opi‘oina fo‘i e Lē e ona le malosi uma lava le fa‘amasinoga. ¹³O ai ‘ea ‘ua tofia o ia e pule i le lalolagi?Po o ai fo‘i na saunia le atu laulau uma lava? ¹⁴‘Āfai e fa‘apea ‘ona finagalo o ia ‘iā te ia,na te fa‘afoisia ‘iā te ia lona agaga ma lana mānava; ¹⁵‘ona oti ai lea o tagata uma lava fa‘atasi,ma toe fo‘i atu tagata i le ‘ele‘ele. ¹⁶“‘Āfai ‘ua ‘iā te oe le mafaufau,‘inā e fa‘afofoga mai ia i lenei mea;liliu mai ia ou fofoga i a‘u lava ‘upu. ¹⁷E pule ‘ea lē ‘ua ‘ino‘ino i le tonu?‘e te fa‘asalaina ‘ea fo‘i lē ‘ua matuā amiotonu lava? ¹⁸E fai atu ‘ea i le tupu, ‘‘Ua e ulavale?’ma ali‘i, ‘‘Ua amio leaga ‘outou?’ ¹⁹Pe fai atu ‘ea i lē na te lē fa‘ailogaina ali‘i sili,ma ‘ua lē sili lona silasila i mau‘oa i lona silasila i le mativa?auā o le galuega a ona ‘a‘ao i latou uma. ²⁰E oti fa‘afuase‘i i latou,o le tulua o po ma ao e fa‘agateteina ai le nu‘u,ma mavae atu ai; e ‘ave‘esea fo‘i o ē malolosi,‘ae lē o se lima e ‘ave‘ese ai. ²¹“Auā ‘ua silasila o ia i ala o tagata ta‘ito‘atasi,‘ua ia silafia fo‘i ona sāvaliga uma. ²²E leai se pouliuli, e leai fo‘i se ata o le oti,e lalafi ai o ē fai amio leaga. ²³Auā e lē tatau i le tagata ‘ona mana‘o pea‘ia alu atu i le Atua e fai se fa‘amasinoga. ²⁴E tu‘imomomoina e ia o ē malolosi e lē mafaitaulia,ma fa‘atūina e ia nisi e sui a‘i i latou. ²⁵‘Ua ia silafia a latou galuega,o le mea lea ‘ua ia lafoia ai i latou i le po,‘ona tu‘imomomoina ai lea o i latou. ²⁶‘Ua amio leaga i latou,o le mea lea ‘ua ia sasa ai ‘iā te i latou,i le mea e va‘ava‘ai ai tagata; ²⁷‘ina ‘ua latou ō ‘ese ‘ua lē mulimuli ‘iā te ia,ma ‘ua lē manatu i latou i se tasi o ona ala. ²⁸‘Ua o‘o atu ai ‘iā te ia le ‘alaga o lē ‘ua mativa,‘ua ia fa‘afofoga fo‘i i le ‘alaga o ē ‘ua puapuagātia. ²⁹A tu‘uina mai e ia le filemū, po o ai ‘ea na te fa‘aatuatuvaleina?A ‘alo fo‘i ona fofoga, po o ai sē na te iloa o iape faia i se nu‘u, po o se tagata e to‘atasi; ³⁰‘ina ne‘i fai ma tupu le tagata amio fa‘alēmata‘u,ne‘i maileia ai le nu‘u. ³¹“E tatau lava ‘ina fai atu i le Atua,‘‘Ua a‘oa‘iina a‘u, ‘ou te lē toe agaleaga. ³²O se mea ‘ua ‘ou lē iloa ‘ia e a‘oa‘o mai ai e oe ‘iā te a‘u;‘āfai ‘ua ‘ou faia se amio leaga, ‘ou te lē toe faia.’ ³³Pe fa‘atatau ‘ea i lou manatu ‘ona taui atu ai e ia i amio,auā ‘ua e tete‘eina atu po ‘ua e loto i ai lava oe, ‘ae lē o a‘u?O lenei, ta‘u mai ia se mea ‘ua e iloa. ³⁴E fai mai ‘iā te a‘u tagata atamamai,ma le tagata poto o lē fa‘alogo mai ‘iā te a‘u. ³⁵‘‘Ua tautala Iopu ma le lē iloa,‘ua fai ana ‘upu ma le lē mafaufau.’ ³⁶O lo‘u loto lenei,‘ia matuā su‘esu‘eina lava Iopu,‘ona o ana tali e pei o tagata amio leaga.