Iopu

O isi ‘Upu a le Lauga a Iopu

¹“Fa‘auta, ‘ua iloa e o‘u mata nei mea uma,‘ua fa‘alogo ai o‘u taliga ma lagona ai. ²O mea ‘ua iloa e ‘outou, ‘ou te iloa fo‘i;‘ou te lē fa‘atauva‘a ‘iā te ‘outou. ³‘Ae peita‘i, ‘ou te fia tautala i Lē e ona le malosi uma lava,‘ou te loto lava ‘ina ‘ia ma filifili ma le Atua. ⁴Auā ‘ua ‘outou fatu fua lava tala pepelo,o foma‘i lē aogā lava ‘outou uma. ⁵E! ‘ana matuā fa‘alologo ‘outou,po ‘ua ‘avea lea ma poto ‘iā te ‘outou. ⁶‘Ia ‘outou fa‘alogologo mai lava i la‘u fa‘atonu atu,‘inā liliu mai o ‘outou taliga i a‘u finauga. ⁷Tou te tautala ‘ea ma le lē tonu mo le Atua?tou te tautala fa‘a‘ole‘ole ‘ea mo ia? ⁸Tou te fa‘ailogaina ‘ea o ia?tou te finau ‘ea mo le Atua? ⁹Pe lelei ‘ea ‘ina ‘ia su‘esu‘e mai o ia ‘iā te ‘outou?pe tou te pelogia ‘ea o ia, e pei ‘ona pelogia o le tagata e le tasi? ¹⁰E matuā a‘oa‘i o ia ‘iā te ‘outou,pe a ‘outou fa‘ailogaina fa‘alilolilo nisi. ¹¹Pe lē fa‘amata‘utia ‘ea ‘outou i lona silisili?Pe lē o‘o atu ‘ea lona mata‘utia ‘iā te ‘outou? ¹²O a ‘outou ‘upu fa‘amanatu o fa‘atusa lefulefu ia,o ‘outou ‘olo o ‘olo ‘omea ia. ¹³“Sōia tou te tautala ‘iā te a‘u, so‘u tautala atu a‘u,‘ona faitalia lea se mea e o‘o mai ‘iā te a‘u. ¹⁴Faitalia se mea e o‘o mai ‘ou te u lo‘u tino i ‘ou nifo,ma ‘ou tu‘u lo‘u ola i lo‘u lima. ¹⁵E ui lava ‘ina fasioti o ia ‘iā te a‘u, ‘ou te fa‘amoemoe pea ‘iā te ia;‘ae peita‘i ‘ou te fa‘atonu atu o‘u ala i ona luma. ¹⁶E fai lava o ia mo‘u fa‘aolataga;auā e lē alu atu se tagata fa‘alēmata‘u i ona luma. ¹⁷‘Inā matuā fa‘alogologo mai ia i la‘u ‘upu,ma la‘u fa‘amatalaga i o ‘outou taliga. ¹⁸Fa‘auta mai ‘ea, ‘ua ‘ou sauni i le fa‘amasinoga;‘ua ‘ou iloa, e ta‘uamiotonuina lava a‘u. ¹⁹Po o ai ‘ea o ia ma te fefinaua‘i?auā o le a ‘ou fa‘alologo nei ma ‘ou oti. ²⁰Tau o mea e lua ‘aua ‘e te faia ‘iā te a‘u,‘ona ‘ou lē lafi ai lea i ou luma. ²¹‘Ia mamao lou ‘a‘ao ‘iā te a‘u,‘aua fo‘i ne‘i fa‘afefe ‘iā te a‘u i lou mata‘utia. ²²Le Atua e, ‘ia e vala‘au mai, ‘ona ‘ou tali atu ai lea;pe ‘ou te tautala atu, ‘ona e tali mai ai lea ‘iā te a‘u. ²³E fia ‘ea a‘u amio leaga ma a‘u agasala?‘Inā fa‘ailoa mai ia ‘iā te a‘u lo‘u solitulafono ma la‘u agasala. ²⁴Se a ‘ea le mea ‘ua ‘alo ai ou fofogama e faia a‘u mou fili? ²⁵‘E te fa‘amata‘u ‘ea le lau mea ‘ua lelea?ma e tuliloaina ‘ea tagutugutu o saito ‘ua mamago? ²⁶Auā ‘ua e tusi mai mea mamafa ‘iā te a‘u;‘ua e faia fo‘i mo‘u tofi o agasala na ‘ou faia ‘ina ‘ou taule‘ale‘a. ²⁷‘Ua e tu‘u fo‘i o‘u vae i la‘au fa‘amau,‘ua e lamalama fo‘i i o‘u ala uma;‘ua e puipuia o‘u alofivae.