Iopu
Le mataupu 14
O LE TUSI PA'IA - Ekalesia Katoliko Roma
O ‘Upu a Iopu i le Pu‘upu‘u o lenei Olaga ma lona Leaga
1“O le tagata na fānau mai i le fafine,‘ua sa‘asa‘a ona aso, ‘ua tumu fo‘i o ia i le atuatuvale.
2E tupu a‘e o ia e pei o le fuga, ‘ae sala‘eseina;e mavae atu fo‘i o ia e pei o le ata ma ‘ua lē tumau.
3Se tagata fa‘apenā ‘ea e silasila i ai ou fofoga,ma e ‘aumai ‘iā te a‘u e fa‘amasinoina fa‘atasi ma oe?
4Po o ai ‘ea e ‘aumai se mea mamānai le mea ‘ele‘elea? e leai se tasi.
5Fa‘auta, ‘ua tu‘upoina ona aso; o lo‘o ‘iā te oe le faitau o ona masina;‘ua e tu‘uina lona tuā‘oi e lē sopo‘ia e ia.
6O lea ‘ia e silasila ‘ese ai ‘iā te ia,‘ia mapu ai o ia, se‘ia fa‘a‘atoaina e ia lona aso e pei o lē ‘ua galue i le taui.
7“Auā a tā le la‘au, e fa‘amoemoe e toe tupu,e lē aunoa fo‘i ma ona tātupu.
8E ui lava ‘ina ‘ua leva ona a‘a i le ‘ele‘elema ‘ua mate lona tafu‘e i le ‘ele‘ele,
9‘ae toe tupu a‘e i le susū o le vai,ma tutupu ‘ona la, e pei o le la‘au tupu.
10A o le tagata e oti o ia ma ta‘atia,e tō fo‘i le mānava a le tagata, ‘ona ifea lea o ia?
11E pe le suāvai nai le vai,e mate fo‘i le vaitafe ma ‘ua matūtū.
12E ta‘oto fo‘i le tagata ‘ae lē toe tula‘i,se‘ia mavae le lagi, latou te lē ala,e lē fāgua fo‘i i latou i lo latou moe.
13E! fia natia a‘u e oe i le tu‘ugamau ma ‘ia e fa‘aliloina a‘u,se‘ia mavae atu lou to‘asā.‘Ia e ‘atofaina mai se aso mo a‘u,ma ‘ia e manatua mai ai a‘u.
14‘Āfai e oti le tagata, e toe ola mai ‘ea o ia?‘Ou te fa‘atalitali atu i aso uma o le tau‘a ‘ua tofia ai a‘u,se‘ia o‘o ‘ina suia o a‘u.
15‘Ia e vala‘au mai, ‘ona ‘ou tali atu ai lea ‘iā te oe;‘ia e finagalo alofa i le galuega a ou ‘a‘ao.
16Auā ‘ua e faitaulia nei ‘ou la‘asaga,e lē ‘ua e lamalama ‘ea i a‘u agasala?
17‘Ua fa‘amaufa‘ailogaina lo‘u solitulafono i le taga,ma e fa‘aopoopoina fa‘atasi la‘u amioletonu.
18“E moni e mavae le mauga ‘ua solo,e si‘itia fo‘i le papa a‘i le mea sa i ai.
19E ‘aia ma‘a e le vai; e tāfea i le lolo le ‘ele‘ele o le fanua,‘e te fa‘aumatia fo‘i le fa‘amoemoe o le tagata.
20‘E te manumālō pea lava ‘iā te ia, e alu ‘ese ai fo‘i o ia;‘ua e liua ona mata, ‘ona e ‘auina atu ai lea o ia.
21E o‘o ‘ina mamalu ona atali‘i, ‘ae lē iloa e ia;e fa‘alēaogāina fo‘i i latou, ‘ae lē lagona ai e ia.
22‘Ae tigāina lona lava tino,ma fa‘anoanoa lona lava loto.”