1 ‘Ua tali atu Iopu, ‘ua fa‘apea atu:
2 “E! ana matuā fuatia lo‘u tigā;ana ‘ava‘e fo‘i fa‘atasi lo‘u malaia i le fua fa‘atautau.
3 Po o pe na ‘ua iloa ‘ua sili lona mamafa i le oneone o le sami;o le mea lea ‘ua so‘ona fai ai a‘u ‘upu.
4 Auā o lo‘o i totonu ‘iā te a‘u o ū fanafana a Lē e ona le malosi uma lava;o le mea ‘o‘ona o i ai e inumia ai lo‘u agaga;o lo‘o pae tau mai ‘iā te a‘u o mea mata‘utia mai le Atua.
5 Pe tagi ‘ea le asini o le vao ‘ina o i ai i le vao mu‘a?pe tagi fo‘i le povi ‘ua i ona luma ana mea e ‘ai?
6 Pe ‘aina ‘ea le mea ‘ua lē namumea pe a lē fa‘amasimaina?pe i ai ‘ea se manogi i le niu o le fuāmoa?
7 O mea sa ‘ou lē mafai ‘ona tago i ai,‘ua ‘avea ia ma a‘u mea e ‘ai e peiseaī ‘ua leaga.
8 “E! ana maua le mea na ‘ou fa‘atoga i ai;ana foa‘iina mai fo‘i e le Atua le mea na ‘ou naunau i ai.
9 ‘Ia finagalo le Atua e tu‘imomomo ‘iā te a‘u,‘ia tu‘u mai e ia lona ‘a‘ao ma vavae‘eseina a‘u.
10 ‘Ona i ai pea lea sina ‘ou fa‘amatalaloto;‘ou te ‘oli‘oli fo‘i i le tigā.Auā na te fa‘asaoina;auā sa ‘ou lē natia afioga a lē Pa‘ia.
11 Po o le a ‘ea lo‘u malosi, ‘ou te fa‘amoemoe ai i se mea?po o le a fo‘i lo‘u i‘uga, ‘ou te ‘onosa‘i ai pea?
12 O le malosi o ma‘a o lo‘u malosi ‘ea lea?o lo‘u tino o le ‘apamemea ‘ea lea?
13 Auē e leai so‘u fesoasoani ‘iā te a‘u lava;‘ua sola ‘ese fo‘i ‘iā te a‘u le fa‘aolataga.
14 “O lē ‘ua tigāina e tatau ‘ona alofagia o ia e lana uō;a ‘ua tu‘ua e ia le mata‘u i Lē e ona le malosi uma lava.
15 ‘Ua fa‘a‘ole‘ole o‘u uso e pei o le alia,‘ua mavae atu i latou e pei o tafe o alia.
16 ‘Ua sua‘ele‘ele ia ‘ona o le vaito‘a;‘ua lilo ai le kiona.
17 O ona po e māui ai, e mamate ai lava;pe a velasia, ‘ona pe ai lea i mea sa i ai.
18 ‘Ua pei i latou o le malaga ‘ua sesē i le ala,‘ua ō a‘e i le vao, ‘ona fano ai lea o i latou.
19 Na va‘ava‘ai atu le ‘au malaga a sa Temā,na fa‘amoemoe i ai le ‘au malaga a Seepa.
20 Na māsiasi i latou, auā na latou fa‘atuatua i ai,na o‘o atu i ai, ‘ona latou femēmēa‘i ai lea.
21 Auā ‘ua ‘avea nei ‘outou e pei o ia mea;‘ua va‘ava‘ai mai ‘outou i lo‘u malaia ma ‘outou fefefe ai.
22 Pe na ‘ou fai atu ‘ea, ‘‘Ia ‘outou ‘aumaia se mea ‘iā te a‘u?’pe, ‘‘Aumai ia se mea alofa ‘iā te a‘u ai a ‘outou ‘oloa?’
23 pe, ‘Lavea‘i mai ia ‘iā te a‘u a‘i le lima o lē ‘ua ita mai?’pe, ‘Fa‘aola mai ia ‘outou ‘iā te a‘u a‘i lima o ē ‘ua fa‘asauā?’
24 “‘Inā a‘oa‘o mai ia ‘outou ‘iā te a‘u,‘ona ‘ou fa‘alologo ai lea;‘ia ‘outou fa‘asino mai fo‘i ‘iā te a‘u se mea ‘ua ‘ou sesē ai.
25 E logo mālie ‘upu moni.‘Ae peita‘i o a ‘outou a‘oa‘iga e leai se uiga.
26 Po ‘ua ‘outou manatu ‘ea e fa‘amaoni la ‘outou ‘upu?‘Ae o ‘upu o lē ‘ua puapuagātia e tusa ia ma le matagi.
27 ‘Ua ‘outou feosofi mai i lē ‘ua mātuaoti,‘ua ‘outou ‘elia fo‘i le lua mo la ‘outou uō.
28 “A o lenei, ‘ia ‘outou silasila mai ‘iā te a‘u;auā ‘ou te lē tala pepelo ‘iā te ‘outou.
29 ‘Inā fo‘i mai ia o ‘outou, ‘aua ne‘i i ai se amio leaga;‘inā toe fo‘i mai ia o ‘outou, ‘ua i ai i lenei mea la‘u amiotonu.