Iopu

Talanoaga lona Tolu

¹‘Ona tali mai ai lea o Elifasa le Timanu, ‘ua fa‘apea mai, ²“E aogā ‘ea le tagata i le Atua,e pei ‘ona aogā o lē ‘ua poto ‘iā te ia lava? ³Se mea ‘ea e fiafia ai Lē e ona le malosi uma lava ‘ina ‘ua e amiotonu?Po ‘ua aogā ‘iā te ia ‘ina ‘ua sa‘o o au amio? ⁴E faia ‘ea e ia se finauga ma oe ‘ona o le mata‘u ‘iā te oe?Na te faia ‘ea se fa‘amasinoga fa‘atasi ma oe? ⁵E lē ‘ua tele ‘ea au amio leaga,e leai fo‘i se gata‘aga o au agasala? ⁶Auā ‘ua e talia fua lava mai o‘u uso le mea tu‘u fa‘afa‘atau;‘ua e tō ‘ese fo‘i ‘ofu o ē matitiva. ⁷‘Ua e lē avatua le vai i lē ‘ua lailoa ‘ia inu ai;‘ua e lē avatua fo‘i le mea e ‘ai i lē ‘ua fia ‘ai. ⁸A o le tagata malosi, ‘ua fai mōna le lau‘ele‘ele;‘ua mau ai fo‘i le ali‘i mamalu. ⁹‘Ua e ‘a‘aufuaina atu fafine ‘ua oti a latou tane;‘ua gauia fo‘i lima o ē ‘ua aumatuā. ¹⁰O le mea lea ‘ua si‘osi‘omia ai oe i mailei;‘ua fa‘aatuatuvaleina ai fo‘i oe i le mata‘u fa‘afuase‘i; ¹¹po o le pouliuli ‘e te lē iloa ai se mea,ma vai e tele ‘ua lofia ai oe. ¹²“E lē o i le lagi i lugā ‘ea le Atua?‘Inā va‘ai ia fo‘i i le maualuga o fetū, ‘ua maualuluga lava! ¹³‘Ua e fai mai fo‘i, ‘Pe silafia mai fa‘apefea le Atua?E mafai ‘ea ‘ona fa‘amasino mai o ia i tua mai o le pogisā? ¹⁴‘Ua fai ao uliuli ma puipui ‘iā te ia,‘ua ia lē silafia mai ai;‘ua feafioa‘i fo‘i o ia i le fa‘ata‘ali‘oli‘o o le lagi.’ ¹⁵‘Ua e mafaufau ‘ea i le ala tuai na sāvavali ai tagata amio leaga? ¹⁶O ē na ‘ave‘eseina fa‘afuase‘i,na lofia o latou fa‘avae i le lolo. ¹⁷O ē na fai atu i le Atua, ‘‘Inā alu ‘ese ia oe ‘iā te i matou;’ i le ma lea,‘Se a se mea e faia e Lē e ona le malosi uma lava mo i latou?’ ¹⁸‘Ae peita‘i sa fa‘atumuina e ia lava o latou fale i mea lelei.‘Ia mamao ‘iā te a‘u le filifiliga a ē amio leaga! ¹⁹E iloa e tagata amiotonu, ma latou ‘oli‘oli ai;o ē ‘ua sa‘o fo‘i a latou amio, latou te tauemu ‘iā te i latou. ²⁰‘E, ‘ua fano lē na fai i tatou mōna fili,‘ua fa‘aumatia i le afi la latou faulaigamea!’ ²¹“‘Ia e fa‘amasani ma ia, ‘e te filemū ai;o le mea lea e o‘o mai ai le manuia ‘iā te oe. ²²‘Ia e talia le tulafono mai lona fofoga,ma ‘ia e tu‘u ana afioga i lou loto. ²³‘Āfai ‘e te fo‘i atu i Lē e ona le malosi uma lava,e atiina a‘e ai oe;‘ia e fa‘ate‘amamaoina le amioletonu i ou fale ‘ie. ²⁴‘Ona e teu ai lea o auro e sili i le efuefu,o auro fo‘i o Ofeira e pei o ma‘a o alia. ²⁵E ‘avea fo‘i Lē e ona le malosi uma lava ma au auro,ma faulaigaario ma oe. ²⁶‘Ona e fiafia ai lea i Lē e ona le malosi uma lava,ma fa‘asaga a‘e ou mata i le Atua. ²⁷‘E te tatalo ‘iā te ia, na te fa‘afofoga mai fo‘i ‘iā te oe;‘e te fa‘ataunu‘uina fo‘i mea na e tautō ai. ²⁸O le mea fo‘i ‘e te filifili e fai, e fa‘atumauina lea mo oe;e pupula fo‘i le malamalama i ou ala. ²⁹Pe a fa‘amaulaloina nisi, ‘ona e fai atu lea e fa‘aeaina.Na te fa‘aolaina fo‘i lē ‘ua fa‘amaulalo.