1 ‘Ona tali atu ai lea o Iopu i le ALI‘I, ‘ua fa‘apea atu:
2 “‘Ua ‘ou iloa ‘e te mafaia mea uma,e lē mafai fo‘i ‘ona vaoia se mea ‘e te finagalo i ai.
3 ‘O ai ‘ea lenei ‘ua na fa‘apouliuligia lau pule ma le lē iloa?’Auā ‘ua ‘ou tautala atu ma lo‘u lē mafaufau,o mea ‘ua sili ‘ona faigatā ‘iā te a‘u,na ‘ou lē iloa lava.
4 ‘‘Ia e fa‘afofoga mai, o a‘u ‘ou te tautala atu ai;‘ou te fesili atu ‘iā te oe, a ‘ia e fa‘ailoa mai ‘iā te a‘u.’
5 Sa ‘ou fa‘alogo ‘iā te oe i le fa‘alogo o o‘u taliga;a o lenei, ‘ua va‘ai atu o‘u mata ‘iā te oe.
6 O le mea lea ‘ua ‘ou ‘ino‘ino ai ‘iā te a‘u,‘ua ‘ou salamō fo‘i i le efuefu ma le lefulefu.”
7 ‘Ua mavae ‘ona fetalai mai e le ALI‘I o ia ‘upu ‘iā Iopu, ‘ona fa‘apea ane lea o le ALI‘I ‘iā Elifasa le Timanu, “‘Ua tupu lo‘u ita ‘iā te oe ma au uō e to‘alua; ‘ina ‘ua ‘outou lē tautalatala ma le tonu ‘iā te a‘u, e fa‘apei o la‘u ‘au‘auna o Iopu.
8 O le mea lea ‘ia ‘outou ‘ave ai povi po‘a ta‘anoa e fitu ma mamoe po‘a e fitu ma ‘outou ō ane i la‘u ‘au‘auna o Iopu; ‘ia ‘outou fai a‘i le taulaga mū mo ‘outou; ‘ona tatalo lea o la‘u ‘au‘auna o Iopu mo ‘outou, auā ‘ou te talia o ia; ‘ina ne‘i ‘ou taui atu ‘iā te ‘outou lo ‘outou valea, auā ‘ua ‘outou lē tautalatala ma le tonu ‘iā te a‘u, e fa‘apei o la‘u ‘au‘auna o Iopu.”
9 ‘Ona ō ane ai lea o Elifasa le Timanu ma Pilitati le Sua ma Sofara le Naama ma latou faia e tusa ma mea na fetalai ane ai le ALI‘I ‘iā te i latou. ‘Ua talia fo‘i Iopu e le ALI‘I.
10 ‘Ua uma ‘ona tatalo Iopu mo ana uō, ‘ona fa‘aa‘e ai lea e le ALI‘I o lana tāfeaga. ‘Ua toe ‘aumai fo‘i e le ALI‘I o mea ‘iā Iopu ‘ua fa‘ateleina, ‘ua lua mea i mea uma na mua‘i ‘iā te ia.
11 ‘Ona ō mai lea ‘iā te ia ona uso uma ma ona tuafafine uma ma i latou uma sa mua‘i masani ma ia; ‘ua latou ‘a‘ai fo‘i fa‘atasi ma ia o mea e ‘ai i lona fale; ‘ua latou fa‘amafanafana fo‘i ‘iā te ia ma fa‘amatalaloto ‘iā te ia ‘ona o mala uma na fa‘ao‘o mai e le ALI‘I ‘iā te ia. ‘Ua foa‘i mai fo‘i ‘iā te ia e i latou ta‘ito‘atasi le tupe e tasi, ta‘ito‘atasi fo‘i ma le mama auro e tasi.
12 ‘Ua sili fo‘i ‘ona fa‘amanuia le ALI‘I o le gata‘aga o Iopu i lona amataga; auā sa ‘iā te ia mamoe e sefulu afe ma afe e fa ma kamela e ono afe ma povi e lua afe ma asini fafine e tasi le afe.
13 Sa ‘iā te ia fo‘i atali‘i o to‘afitu ma afafine e to‘atolu.
14 ‘Ua ia fa‘aigoa fo‘i le tasi o Iemaima ma le igoa o lona lua o Kesia ma le igoa o lona to‘atolu o Kerenapuka.
15 E le‘i iloa fo‘i i le nu‘u uma ni fafine lālelei e tusa ma afafine o Iopu. ‘Ua avatu fo‘i ‘iā te i latou e lo latou tamā o tofi fa‘atasi ma o latou tuagane.
16 ‘Ona ola pea lea o Iopu ‘ina ‘ua mavae o ia mea, o tausaga e tasi le selau ma le fa o sefulu. ‘Ua ia iloa fo‘i ona atali‘i ma atali‘i ona atali‘i, e o‘o atu i tupulaga e fa.
17 ‘Ona oti lea o Iopu, ‘ua toeaina ma ‘ua tu‘utulu‘i lona ola.#