1 “O lenei, Iopu e, fa‘afogafoga mai ia i la‘u tautalaga,ma liliu mai ou fofoga i a‘u ‘upu uma.
2 Fa‘auta, ‘ua ‘ou fa‘amaga atu lo‘u gutu,‘ua tautala lo‘u laulaufaiva i lo‘u gutu.
3 O le fa‘amaoni o lo‘u loto e fai atu ai a‘u ‘upu;e tautala atu o‘u laugutu i le poto e sao ‘ona lelei.
4 Na faia a‘u e le Agaga o le Atua;o le mānava fo‘i a Lē e ona le malosi uma lava ‘ua ola ai a‘u.
5 ‘Āfai ‘ua e mafaia, ‘inā tali mai ia ‘iā te a‘u,‘inā sauni mai ia ‘iā te a‘u; ‘inā tula‘i mai ia.
6 Fa‘auta, o a‘u nei o le sui o le Atua, e pei ‘ona e fetalai mai ai.O a‘u fo‘i, na faia a‘u i le ‘ele‘ele.
7 Fa‘auta mai, e lē fa‘amata‘utia oe i so‘u mata‘utia;e lē mamafa fo‘i la‘u avega i luga ‘iā te oe.
8 “‘Ua e fetalai mai lava o lo‘o ‘ou fa‘alogo atu,‘ua ‘ou lagona atu fo‘i ‘upu o lau fetalaiga, ‘ua fa‘apea mai,
9 ‘‘Ua mamā a‘u; ‘ua aunoa ma le solitulafono;‘ua sao a‘u; e leai fo‘i sa‘u agasala.
10 Fa‘auta, ‘ua ia sā‘ili mea e to‘asā mai ai ‘iā te a‘u,o lona manatu ‘iā te a‘u, o a‘u le ita ‘iā te ia.
11 ‘Ua ia tu‘u o‘u vae i la‘au fa‘amau,‘ua ia lamalama i o‘u ala uma.’
12 “Fa‘auta, ‘ua e le amiotonu i lenei mea;‘ou te tali atu ‘iā te oe, auā ‘ua sili le Atua i tagata.
13 Se a le mea ‘ua e finau atu ai ‘iā te ia?auā ‘‘Ua ia lē fa‘amatala mai se tasi o ana mea.’
14 Auā ‘ua fetalai mai le Atua fa‘atasi ma fa‘alua,a ‘ua lē manatu i ai tagata.
15 O le miti, o le mea e va‘aia i le po, ‘ina o moe gagase tagata,‘ina o momoe i latou i luga o moega.
16 ‘Ona fa‘afa‘alogo ai lea e ia o taliga o tagata,ma fa‘amauina atu ai le mea ‘ua a‘oa‘oina ai i latou e ia.
17 ‘Ina ‘ia liliu‘eseina le tagata a‘i lana mea e fai;‘ia fa‘alilo fo‘i i le tagata le fa‘amaualuga.
18 ‘Ua ia tāofi ‘iā te ia ‘ia lē o‘o i le lua,‘atoa ma lona ola ‘ia lē fa‘aumatia i le tao.
19 ‘Ua a‘oa‘iina o ia i luga o lona moega i le tigā,ma le tigā tele o ona ivi e lē aunoa.
20 ‘Ua ‘ino‘ino fo‘i o ia i mea e ‘ai,‘ua lē mana‘o fo‘i i mea suamalie.
21 ‘Ua fa‘aumatia lona ‘a‘ano, ‘ua lē iloa;‘ua aliali ona ivi sa lē iloa.
22 ‘Ua fa‘alatalata fo‘i o ia i le tu‘ugamau,ma lona ola i ē fasioti.
23 ‘Āfai ‘ua ‘iā te ia le Agelu,o le Puluvaga, Lē ‘ua sili i le to‘aafe,o fa‘aali atu i le tagata lana amiotonu.
24 ‘Ona alofa lea o ia ‘iā te ia, ma fetalai ane, ‘Lavea‘i mai ia ‘iā te ia,ne‘i alu ifo i le lua; ‘ua ‘ou maua le togiola.
25 E toe ola lelei ai lona tino e sili i le tamaitiiti,e toe fo‘i o ia i ona po o lona taule‘ale‘a.’
26 E tatalo o ia i le Atua, ‘ona finagalo malie mai ai lea o ia ‘iā te ia;e iloa fo‘i e ia ona fofoga ma le ‘oli‘oli;na te fa‘afo‘i mai fo‘i i le tagata lana amiotonu.
27 E fa‘asagasaga o ia i tagata ma fai atu, ‘‘Ua ‘ou agasala,‘ua ‘ou faia le amio fa‘api‘opi‘o,a ‘ua lē tauia mai ‘iā te a‘u.
28 Na te lavea‘iina o ia, ‘ina ‘ia lē o‘o i le lua;e iloa fo‘i e ia le malamalama.’
29 “Fa‘auta, ‘ua faia ia mea uma fa‘alua ma fa‘atolu e le Atua i le tagata,
30 ‘ina ‘ia fa‘afoisia o ia a‘i le lua,‘ina ‘ia fa‘amalamalamaina i le malamalama o tagata ola.
31 Iopu e, liliu mai ia ou fofoga, ‘inā fa‘afofoga mai ia ‘iā te a‘u;alaala mai ia, ‘ou te tautala atu ai a‘u.
32 ‘Āfai e ai sau ‘upu, tali mai ia ‘iā te a‘u;‘ia e tautala mai; auā ‘ou te loto ‘ina ‘ia ta‘uamiotonuina oe.