1 ‘Ona tali atu ai lea o Iopu, ‘ua fa‘apea atu,
2 “‘Ua ‘ou fa‘alogo atu i mea fa‘apenā e tele;o tagata fa‘amafanafana fa‘asoesā o ‘outou uma.
3 Ei ai ‘ea se i‘uga o ‘upu fa‘atauva‘a?Pe se a fo‘i se mea ‘ua fa‘aoso ‘iā te oe, ‘ina ‘ua e tali mai?
4 O a‘u nei fo‘i, ‘ou te mafaia ‘ona tautala e pei o ‘outou,pe ‘ana fesuia‘iina ‘outou ma a‘u.‘Ou te mafaia ‘ona fa‘asoso‘oina atu o ‘upu ‘iā te ‘outou,ma lialia‘i atu lo‘u ulu ‘iā te ‘outou.
5 A ‘ou te fa‘amalosi atu ‘iā te ‘outou i lo‘u gutu,o le tautala fo‘i a o‘u laugutu e fa‘afeoloolo ai o ‘outou tigā.
6 “‘Āfai ‘ou te tautala atu e lē feoloolo ai lo‘u tigā;‘āfai ‘ou te fa‘alologo, se a ‘ea se tigā e te‘a ai ‘iā te a‘u?
7 A o lenei, ‘ua fa‘avaivaia mai o a‘u e le Atua;‘ua ia fa‘aumatia lo‘u ‘āiga uma.
8 ‘Ua e fusifusia a‘u, ‘ua fai lea ma molimau ‘iā te a‘u;‘ua tula‘i mai fo‘i ‘iā te a‘u lo‘u tino vale e molimau i o‘u lava luma.
9 ‘Ua ia saeia a‘u i lona to‘asā, ma ‘ua tuliloa mai ‘iā te a‘u;‘ua li ona nifo ‘iā te a‘u; ‘ua pulato‘a mai ‘iā te a‘u o lē ‘ua fai a‘u mōna fili.
10 ‘Ua latou fa‘amaga o latou gutu ‘iā te a‘u;‘ua latou taia mai lo‘u alafau e fai ma luma;‘ua latou fa‘apotopoto fa‘atasi e agaleaga ‘iā te a‘u.
11 ‘Ua tu‘uina a‘u e le Atua i ē ‘ua amioletonu,‘ua ia tu‘ulafoa‘iina a‘u i lima o ē amio leaga.
12 Sa ‘ou filemū, a ‘ua ia tu‘imomomoina a‘u;‘ua ia pu‘e mai fo‘i i lo‘u ua, ma nutinini‘i ‘iā te a‘u;‘ua na fa‘atūina fo‘i a‘u e fai ma manulautī ‘iā te ia.
13 ‘Ua si‘osi‘omia a‘u e ana ‘au e fanafana u;‘ua ia ati i ‘ou fatuga‘o, na lē fa‘asaoina fo‘i e ia;‘ua ia sasa‘aina atu lo‘u au ‘o‘ona i le ‘ele‘ele.
14 ‘Ua ia fasigaugauina a‘u i lea manu‘a ma lea manu‘a,‘ua ia osofa‘i mai ‘iā te a‘u e pei o se fitafita.
15 ‘Ua ‘ou suia le ‘ie talatala i lo‘u tino,‘ua ta‘oto fo‘i lo‘u malosi i le ‘ele‘ele.
16 ‘Ua fulafula o‘u mata i le tagi,o lo‘o i ai fo‘i i o‘u laumata le ata o le oti.
17 E lē ‘ona ‘ua i ai o se sauā i o‘u lima;‘ua mamā fo‘i la‘u talosaga.
18 “Le ‘ele‘ele e, ‘aua ‘e te ufitia lo‘u toto,‘aua ne‘i i ai fo‘i se mea mo la‘u ‘alaga.
19 O lenei fo‘i, fa‘auta, o i le lagi lē molimau ‘iā te a‘u,o i luga fo‘i lē ‘ua i ai le mau ‘iā te a‘u.
20 ‘Ua tauemu mai a‘u uō ‘iā te a‘u;a ‘ua sisina ifo loimata i o‘u mata i luma o le Atua.
21 E! ‘ana mafaia ‘ona finau o le tagata ma le Atua,e pei ‘ona finau o le tagata ma lana uō.