1 O ‘upu a Ieremia, le atali‘i o Hilikia, o le tasi o le ‘au ositaulaga, o ē na i Anatota i le nu‘u o Peniamina.
2 Na o‘o mai le afioga a le ALI‘I ‘iā te ia i ona po o Iosia, le atali‘i o Amone, le tupu o Iuta, i le tausaga e sefulu ma le tolu o lana nofoa‘iga.
3 Na o‘o mai fo‘i i ona po o Ioakima le atali‘i o Iosia, le tupu o Iuta, ‘ua o‘o i le gata‘aga o le tausaga e sefulu ma le tasi o Setekaia le atali‘i o Iosia, le tupu o Iuta, ‘ua o‘o fo‘i i le tāfeaga o Ierusalema i le lima o masina.
4 Na o‘o mai ‘iā te a‘u le afioga a le ALI‘I, ‘ua fa‘apea mai,
5 “Na a‘u iloa oe a o le‘i faia oe e a‘u i le manava;na a‘u fa‘apa‘iaina oe a o le‘i fānau mai oe,na a‘u tofia oe e fai ma perofeta i nu‘u.”
6 ‘Ona a‘u fai atu ai lea, “Auē, le Ali‘i le ATUA, fa‘auta, ‘ou te lē iloa ‘ona tautala, auā o a‘u o le tamaitiiti.”
7 ‘Ona fetalai mai ai lea o le ALI‘I ‘iā te a‘u,“‘Aua ‘e te fa‘apea, ‘O a‘u o le tamaitiiti;’auā o i latou uma ‘ou te ‘auina atu i ai oe,‘e te alu lava i ai, o mea uma fo‘i ‘ou te fai atu ai ‘iā te oe,‘e te fai atu ai lava.
8 ‘Aua ‘e te fefe ‘iā te i latou;auā ‘ou te ‘iā te oe e lavea‘i ‘iā te oe;”‘ua fetalai mai ai le ALI‘I.
9 ‘Ona fa‘aloaloa ai lea e le ALI‘I o lona ‘a‘ao, ‘ua pa‘i mai i lo‘u gutu; ‘ua fetalai mai fo‘i le ALI‘I ‘iā te a‘u,“Fa‘auta, ‘ua ‘ou tu‘uina atu a‘u ‘upu i lou gutu.
10 Fa‘auta, ‘ua ‘ou tofia oe i le aso nei e pule i nu‘u ma mālō,‘ina ‘ia e lia‘iina ma lepetia ma fa‘aumatia ma sōloia,‘ia fa‘atūina fo‘i ma totōina.”
11 Na o‘o mai fo‘i le afioga a le ALI‘I ‘iā te a‘u, ‘ua fa‘apea mai, “Ieremia e, o le a ‘ea le mea ‘ua e va‘ai i ai?”‘Ona ‘ou fai atu lea, “‘Ua ‘ou va‘ai atu i le la‘au o le sekati.”
12 ‘Ona fetalai mai ai lea o le ALI‘I ‘iā te a‘u, “‘Ua lelei lau va‘ai; auā ‘ou te mataala ‘ina ‘ia faia a‘u ‘upu.”
13 Na o‘o mai fo‘i le afioga a le ALI‘I ‘iā te a‘u, o le atu lua lea, ‘ua fa‘apea mai, “O le a ‘ea le mea ‘ua e va‘ai i ai?”‘Ona ‘ou fa‘apea atu lea, “‘Ua ‘ou va‘ai atu i le ‘ulo ‘ua alu a‘e ai le ‘ausa, o lona gutu fo‘i ‘ua fa‘asaga mai mai le itū i matū.”
14 ‘Ona fetalai mai ai lea o le ALI‘I ‘iā te a‘u: O le itū i matū e oso mai ai le leaga i luga o i latou uma lava o ē nonofo i le nu‘u.
15 Auā fa‘auta, ‘ou te vala‘au i ‘āiga uma lava o mālō i le itū i matū, ‘ua fetalai mai ai le ALI‘I; E ō mai fo‘i i latou ma latou ta‘itasi ma tu‘u lona nofoāli‘i i puipui o faitoto‘a o Ierusalema, e lata ane fo‘i i ona pā uma ‘ua so‘o ai, e lata ane fo‘i i ‘a‘ai uma o Iuta.
16 ‘Ou te fa‘asala fo‘i ‘iā te i latou ‘iā latou amio leaga uma, o ē ‘ua tu‘ua a‘u ma latou fa‘amū mea manogi i atua ‘ese ma ifo atu i mea na faia i o latou lava lima.
17 A o oe, ‘inā fusi ia i lou sulugātiti ma tula‘i atu, ma fai atu ‘iā te i latou mea uma ‘ou te fai atu ai ‘iā te oe; ‘aua ‘e te mata‘u ‘iā te i latou, ‘ina ne‘i ‘ou fa‘amata‘uina oe i o latou luma.
18 Fa‘auta fo‘i, o a‘u nei ‘ua ‘ou faia oe i le aso nei ma ‘a‘ai nofo ‘olo ma pou u‘amea ma pā ‘apamemea e tete‘eina ai le nu‘u uma, o tupu o Iuta ma ona ali‘i ma ositaulaga ma tagata o le nu‘u.
19 Latou te si‘i mai le tau‘a ‘iā te oe, ‘ae latou te lē manumālō ‘iā te oe; auā o a‘u ‘ou te ‘iā te oe e lavea‘i ‘iā te oe, ‘ua fetalai mai ai le ALI‘I.#