1 ‘Ua fa‘aali mai e le ALI‘I ‘iā te a‘u, fa‘auta fo‘i, o ‘ato mati e lua, ‘ua tu‘u i luma o le malumalu o le ALI‘I, ‘ina ‘ua mavae ‘ona tāfea e Nepukanesa le tupu o Papelonia, o Iekonia le atali‘i o Ioakima le tupu o Iuta, ma ali‘i o Iuta, ‘atoa ma tufuga ma ē galulue i u‘amea, mai Ierusalema ma ‘ua ‘avea i latou i Papelonia.
2 O le tasi ‘ato mati e matuā lelei, e pei o mati mua‘i pula; a o le tasi ‘ato mati e matuā leaga, e lē mafai ‘ona ‘aina ‘ina ‘ua leaga.
3 ‘Ona fa‘apea mai lea o le ALI‘I ‘iā te a‘u, “Ieremia e, se a ‘ea se mea ‘ua e iloa?”‘Ona ‘ou fa‘apea atu lea, “O mati; o mati lelei, e matuā lelei ia; a o mati leaga, e matuā leaga ia, e lē mafai ‘ona ‘aina, ‘ina ‘ua leaga.”
4 ‘Ona o‘o mai ai lea o le afioga a le ALI‘I ‘iā te a‘u, ‘ua fa‘apea mai:
5 ‘Ua fa‘apea ‘ona fetalai mai o le ALI‘I le Atua o Isaraelu: E pei o ia mati lelei, e fa‘apea ‘ona ‘ou fa‘ailogaina o le tāfeaga o Iuta, ‘ua ‘ou ‘a‘auina atu nai lenei mea i le nu‘u o Kaletaia, ‘ina ‘ia lelei ai i latou.
6 ‘Ou te fa‘asaga atu o‘u mata ‘iā te i latou ‘ia lelei ai ma ‘ou fa‘afoisia mai i latou i lenei nu‘u; ‘ou te atiina a‘e i latou, ‘ae lē lepetia; ‘ou te totōina i latou, ‘ae lē lia‘iina.
7 ‘Ou te avatu fo‘i ‘iā te i latou le loto e iloa ai a‘u, o a‘u lava o le ALI‘I; e fai fo‘i i latou mo‘u nu‘u, e fai fo‘i a‘u mo latou Atua; pe a latou toe fo‘i mai ‘iā te a‘u ma o latou loto ‘atoa.
8 E pei o mati leaga, e lē mafai ‘ona ‘aina, ‘ina ‘ua leaga; ‘ua fa‘apea ‘ona fetalai mai ai o le ALI‘I: E fa‘apea ‘ona ‘ou tu‘uina atu o Setekaia le tupu o Iuta, ma ali‘i ‘ua ‘iā te ia ma ē o totoe i Ierusalema, o ē o totoe i lenei nu‘u ma ē o nonofo i le nu‘u o Aikupito;
9 ‘ou te tu‘uina atu i latou ia fa‘aatuatuvaleina ma ‘ia malaia i mālō uma o le lalolagi, e fai a‘i luma ma ‘upu fa‘atusa ma tauemuga ma fa‘afanoga i mea uma ‘ou te tulia ai i latou.
10 ‘Ou te ‘a‘auina atu ‘iā te i latou le pelu ma le oge ma le fa‘ama‘i, se‘ia fa‘aumatia i latou i le lau‘ele‘ele na ‘ou foa‘iina atu ai ‘iā te i latou ma o latou tamā.#