1 ‘Ua fa‘alogo Sefatia le atali‘i o Matana ma Ketalia le atali‘i o Pasura ma Iukali le atali‘i o Selemia ma Pasura le atali‘i o Malekia, i ‘upu ‘ua fai atu ai e Ieremia i le nu‘u uma, ‘ua fa‘apea atu,
2 O lo‘o fa‘apea ‘ona fetalai mai o le ALI‘I, O lē nofo i le ‘a‘ai nei e oti ia i le pelu ma le oge ma le fa‘ama‘i; a o lē alu atu i tagata o Kaletaia e ola ia; e ‘avea fo‘i lona ola ma ana vete, e ola fo‘i ia.
3 O lo‘o fa‘apea ‘ona fetalai mai o le ALI‘I, E tu‘uina lava lenei ‘a‘ai i lima o le itūtau‘a a le tupu o Papelonia, latou te ā‘ea ai.
4 ‘Ona fai atu ai lea o ali‘i i le tupu, “‘Ia fasiotia lava lenei tagata; auā lava o ia lē fa‘avaivaia lima o tagata tau o ē totoe i lenei ‘a‘ai ma lima o le nu‘u uma, i lona tautala atu ‘iā te i latou e tusa ma ia ‘upu; auā e le sā‘ili lenei tagata ‘ia manuia lenei nu‘u, a ‘ia malaia.”
5 ‘Ona fai mai ai lea o Setekaia le tupu, “Fa‘auta, o lo‘o i o ‘outou lima o ia; auā e lē mafai i le tupu se mea pe a lē tatau ‘iā te ‘outou.”
6 ‘Ona latou fetāgofi ai lea ‘iā Ieremia ma tu‘uina atu o ia i le lua a Malekia le atali‘i o le tupu, sa i le lotoā o le fale puipui; ‘ua latou tu‘utu‘u ifo ‘iā Ieremia i maea. E leai fo‘i se vai i le lua, na o palapala; ‘ua goto fo‘i Ieremia i le palapala.
7 ‘Ua fa‘alogo Epetemeleka le tagata Aitiope, o le eunuka e i le fale o le tupu, ‘ua tu‘uina ifo Ieremia i le lua, ‘ua nofo fo‘i le tupu i le faitoto‘a o Peniamina,
8 ‘ona alu atu ai lea o Epetemeleka a‘i le fale o le tupu, ‘ua tautala atu i le tupu, ‘ua fa‘apea atu,
9 “Le ali‘i e le tupu, ‘ua amio leaga ia tagata i mea uma ‘ua latou faia ‘iā Ieremia le perofeta, o le ‘ua latou tu‘uina ifo i le lua; e oti fo‘i o ia i le mea ‘ua i ai i le fia ‘ai; auā e leai ni areto o totoe i le ‘a‘ai.”
10 ‘Ona fai atu ai lea o le tupu ‘iā Epetemeleka le Aitiope, ‘ua fa‘apea atu, “Tou te ō ma oe tagata e to‘atolugafulu, a‘i le mea nei ma ‘aveina a‘e Ieremia le perofeta a‘i le lua, manū o le‘i oti o ia.”
11 ‘Ona ō ai lea o Epetemeleka ma ia tagata, ‘ua latou ō atu i le fale o le tupu i lalo o le mea e teu ai ‘oloa ma latou ‘aumai mai lea mea ‘ie pala māsaesae ma ‘ofu pala māsaesae, ‘ua latou tu‘uina ifo ia mea i maea ‘iā Ieremia i le lua.
12 ‘Ua fai ane fo‘i Epetemeleka le Aitiope ‘iā Ieremia, “‘Ia e tu‘u na ‘ie pala māsaesae ma ‘ofu māsaesae i lalo o ou a‘oa‘o i maea.” ‘Ona fa‘apea ai lea ‘ona fai e Ieremia.
13 ‘Ona latou sisi ai lea ‘iā Ieremia i maea ma ‘ava‘e ‘iā te ia a‘i le lua; ‘ona nofo ai lea o Ieremia i le lotoā o le fale puipui.
14 ‘Ona fe‘auina lea e Setekaia le tupu ma na ‘a‘ami atu ‘iā Ieremia le perofeta e sau ‘iā te ia, i lona tolu o faitoto‘a i le fale o le ALI‘I; ‘ua fai atu fo‘i le tupu ‘iā Ieremia, “‘Ou te fesili atu ‘iā te oe i se mea; ‘aua ‘e te natia se mea ‘iā te a‘u.”
15 ‘Ona fai mai ai lea o Ieremia ‘iā Setekaia, “‘Āfai ‘ou te ta‘uatua ‘iā te oe, ‘e te lē fasiotia ‘ea a‘u? ‘āfai fo‘i ‘ou te fa‘atonuina atu ‘iā te oe, ‘e te lē fa‘alogo mai ‘iā te a‘u.”
16 ‘Ona tautō fa‘alilolilo ai lea o Setekaia le tupu ‘iā Ieremia, ‘ua fa‘apea, “O lo‘o soifua le ALI‘I, o lē na faia i tā‘ua nei, ‘ou te lē fasiotia oe, ‘ou te lē tu‘uina atu fo‘i oe i lima o ia tagata ‘ua sā‘ili e fasiotia oe.”
17 ‘Ona fai mai ai lea o Ieremia ‘iā Setekaia, O lo‘o fa‘apea ‘ona fetalai mai o le ALI‘I, le Atua o ‘au, le Atua o Isaraelu, “‘Āfai ‘e te matuā alu atu i ali‘i mai le tupu o Papelonia, ‘ona soifua ai lea o oe, e le fa‘amūina fo‘i lenei ‘a‘ai i le afi; ‘ae soifua oe, ‘atoa fo‘i ma lou ‘āiga.
18 ‘Ae ‘āfai ‘e te lē alu atu i ali‘i mai le tupu o Papelonia, ‘ona tu‘uina atu ai lea o lenei ‘a‘ai i lima o Kaletaia ma latou fa‘amūina i le afi, o oe fo‘i ‘e te lē sao i o latou lima.”
19 ‘Ona fai atu ai lea o Setekaia le tupu ‘iā Ieremia, “‘Ou te fefe i tagata Iuta ‘ua sōsōla atu i Kaletaia, ne‘i latou tu‘uina atu a‘u i o latou lima ma latou fa‘aleaga ‘iā te a‘u.”
20 A ‘ua fai mai Ieremia, “E lē tu‘uina atu oe e i latou. ‘Ia e fa‘afofoga mai i le si‘ufofoga o le ALI‘I ‘ou te fai atu ai ‘iā te oe; ‘ona manuia ai lea o oe ma e soifua.
21 ‘Ae ‘āfai ‘e te lē mafai ‘ona maliu atu, o lenei le ‘upu ‘ua fa‘ailoa mai ai e le ALI‘I ‘iā te a‘u;
22 fa‘auta fo‘i, o fafine uma ‘ua totoe i le fale o le tupu o Iuta, e ta‘ita‘iina i latou i ali‘i mai le tupu o Papelonia, latou te fai ane fo‘i,‘Na fa‘aosoina oe e au uō,‘ua latou manumālō fo‘i ‘iā te oe.‘Ua goto ou vae i le palapala,a ‘ua tu‘umuli i latou.’
23 E ‘aveina atu fo‘i au avā uma ma au fānau ‘iā Kaletaia; o oe fo‘i ē le sao oe i o latou lima, ‘ae pu‘ea oe e le lima o le tupu o Papelonia; o oe fo‘i e mū ai lenei ‘a‘ai i le afi.”
24 ‘Ona fai atu ai lea o Setekaia ‘iā Ieremia, “‘Aua ne‘i iloa e se tasi o ia ‘upu, ‘ona e lē oti ai lea.
25 Pe ‘āfai fo‘i e fa‘alogo ali‘i ‘ua tā tautalatala ma oe ma latou ō ane ‘iā te oe ma fai ane ‘iā te oe, ‘‘Inā ta‘u mai ia ‘iā te i matou o mea na e fai atu ai i le tupu, ‘aua le natia ‘iā te i matou, ‘ona matou le fasioti ai lea ‘iā te oe; pe se a fo‘i le mea na fai mai ai le tupu ‘iā te oe;’
26 ‘ona e fai atu ai lea ‘iā te i latou, ‘Na a‘u fai la‘u fa‘atoga i luma o le tupu, ‘aua na te fa‘afoisia a‘u i le fale o Ionatana, ne‘i ‘ou oti i lea mea.’”
27 ‘Ona ō mai ai lea o ali‘i uma ‘iā Ieremia ma fesili mai ‘iā te ia; ‘ona ta‘u atu ai lea o ia ‘iā te i latou, e tusa ma ia ‘upu uma na fai mai ai le tupu. ‘Ona latou ō ‘ese ai lea ‘iā te ia ‘ua lē toe tautala; auā na lē lagona se tasi le tautalaga.
28 ‘Ua nofo Ieremia i le lotoā o le fale puipui ‘ua o‘o i le aso na ā‘ea ai Ierusalema; na i ai fo‘i o ia ‘ina ‘ua ā‘ea Ierusalema.#