1 O le fa o tausaga o Ioakima le atali‘i o Iosia le tupu o Iuta, na o‘o mai ai lenei afioga ‘iā Ieremia mai le ALI‘I, ‘ua fa‘apea mai:
2 ‘Ia e ‘ave se tusi tā‘ai ma e tusi i ai ‘upu uma ‘ua ‘ou fai atu ai ‘iā te oe ‘iā Isaraelu ma Iuta ma nu‘u uma, e āfua i ona po na ‘ou tautala atu ai ‘iā te oe, ona po lava o Iosia, e o‘o i le aso nei.
3 Atonu e fa‘alogo le ‘āiga o Iuta i le malaia uma ‘ou te manatu e fa‘ao‘o ‘iā te i latou; ‘ina ‘ia latou toe fo‘i mai, ta‘itasi le tagata a‘i lona ala leaga ma ‘ou fa‘amāgaloina atu i la latou amioletonu ma la latou agasala.
4 ‘Ona vala‘au ai lea o Ieremia ‘iā Paruka le atali‘i o Neria; ‘ua tusia fo‘i i le tusi tā‘ai e Paruka mai le fofoga o Ieremia o afioga uma a le ALI‘I, na ia fetalai mai ai ‘iā te ia.
5 ‘Ua fai atu fo‘i Ieremia ‘iā Paruka, ‘ua fa‘apea atu, “‘Ua puipuia a‘u; ‘ou te lē mafai ‘ona alu atu i le fale o le ALI‘I;
6 a ‘ia e alu ma faitau i le tusi tā‘ai, ‘ua e tusia mai lo‘u gutu, o afioga a le ALI‘I i luma o le nu‘u i le fale o le ALI‘I i le aso e anapopogi ai; ‘e te faitauina fo‘i i luma o Iuta uma o ē ō mai mai o latou ‘a‘ai.
7 Atonu latou te fa‘apa‘u‘ū ma tatalo i luma o le ALI‘I ma latou toe fo‘i mai, ta‘itasi le tagata a‘i lona ala leaga; auā ‘ua tele le tigā ma le to‘asā ‘ua fetalai mai ai le ALI‘I i lenei nu‘u.”
8 ‘Ua faia fo‘i e Paruka le atali‘i o Neria e tusa ma mea uma na fai atu ai Ieremia le perofeta; ‘ua ia faitau i le tusi o afioga a le ALI‘I i le fale o le ALI‘I.
9 O le lima o tausaga o Ioakima le atali‘i o Iosia le tupu o Iuta, o le iva o masina, ‘ua latou tala‘i atu ai le anapogi i luma o le ALI‘I i tagata uma o i Ierusalema ma tagata uma na ō mai i Ierusalema mai ‘a‘ai o Iuta.
10 ‘Ona faitau ai lea o Paruka i le tusi, a o fa‘alogo ai le nu‘u uma, o ‘upu a Ieremia i le fale o le ALI‘I, i le potu o Kimaria le atali‘i o Safana le tusi‘upu, i le lotoā i luga, i le mea e ui ai i le faitoto‘a fou o le fale o le ALI‘I.
11 ‘Ua fa‘alogo Mekaio le atali‘i o Kimaria, le atali‘i o Safana, i afioga uma a le ALI‘I nai le tusi;
12 ‘ona alu ifo ai lea o ia i le fale o le tupu, i le potu o le tusi‘upu; fa‘auta fo‘i, sa nonofo ai o ali‘i uma, o Elisama le tusi‘upu ma Tilaia le atali‘i o Semaia, ma Elenatana le atali‘i o Akepora ma Kimaria le atali‘i o Safana, ma Setekaia le atali‘i o Hanania ma ali‘i uma.
13 ‘Ona ta‘u atu ai lea e Mekaio ‘iā te i latou o ‘upu uma na ia fa‘alogo ai, ‘ina o faitau e Paruka le tusi i luma o le nu‘u.
14 ‘Ona ‘auina atu ai lea e ali‘i uma o Ieuti le atali‘i o Netania, le atali‘i o Selemia, le atali‘i o Kusi, ‘iā Paruka, ‘ua fa‘apea atu, “‘Ia e ‘aumai i lo‘u lima le tusi tā‘ai sa e faitauina i luma o le nu‘u ma e sau.” ‘Ona ‘ave ai lea e Paruka le atali‘i o Neria le tusi tā‘ai i lona lima ma ‘ua alu atu ‘iā te i latou.
15 ‘Ona latou fai mai ai lea ‘iā te ia, “Se‘i e nofo i lalo ma faitau mai a o matou fa‘alogo atu.” I le ‘ua faitau ai e Paruka o fa‘alogo mai i latou.
16 ‘Ua latou fa‘alogo i ia ‘upu uma, ‘ona latou fefefe ai lea, o le tasi ma le tasi ma latou fai mai ‘iā Paruka, “Matou te ta‘u atu lava ia ‘upu uma i le tupu.”
17 ‘Ua latou fesili mai fo‘i ‘iā Paruka, ‘ua fa‘apea mai, “‘Inā ta‘u mai ia ‘iā te i matou, pe na fa‘apefea ‘ea ‘ona e tusia o ia ‘upu uma mai lona fofoga?”
18 ‘Ona fai atu ai lea o Paruka ‘iā te i latou, “Na ia fai mai ‘iā te a‘u ia ‘upu uma a‘i lona fofoga, ‘ona ‘ou tusia ai lea i le tusi i le vaitusi.”
19 ‘Ona fai mai ai lea o ali‘i ‘iā Paruka, “‘Inā alu ia, lua te lalafi, ‘oulua ma Ieremia, ‘aua ne‘i iloa e se tasi po o fea lua te i ai.”
20 ‘Ua latou ō atu i le tupu i le lotoā, a ‘ua latou tu‘u le tusi tā‘ai i le potu o Elisama le tusi‘upu; ‘ua latou fa‘aali atu fo‘i ia ‘upu uma i luma o le tupu.
21 ‘Ona ‘auina atu ai lea e le tupu o Ieuti e ‘a‘ami atu le tusi tā‘ai; i le ‘ua ‘aumai ai e ia a‘i le potu o Elisama le tusi‘upu; ‘ona faitau ai lea e Ieuti i luma o le tupu ma luma o ali‘i uma o ē na tutū i tafatafa o le tupu.
22 Sa nofo fo‘i le tupu i le fale o le tau ma‘alili i le iva o masina, sa mū fo‘i le afi i le ta‘igaafi i ona luma.
23 ‘Ua o‘o ‘ina ‘ua faitaulia e Ieuti ni atu ‘upu se tolu pe fa, ‘ona titipi ai lea e ia i le polo o le tusi ma na lafo i le afi sa i le ta‘igaafi, ‘ua o‘o ‘ina fa‘aumatia le tusi tā‘ai uma i le afi sa i le ta‘igaafi.
24 E le‘i fefefe i latou, e le‘i saeia fo‘i e i latou o latou ‘ofu, o le tupu ma ana ‘au‘auna uma, na fa‘alogo i ia ‘upu uma.
25 ‘Ae peita‘i na ‘ai‘oi atu Elenatana ma Tilaia ma Kimaria i le tupu, ‘aua na te susunuina le tusi tā‘ai; ‘ae le‘i fa‘alogo o ia ‘iā te i latou.
26 A ‘ua fai atu le tupu ‘iā Ieramaelu le atali‘i o le tupu ma Seraia le atali‘i o Aserielu ma Selemia le atali‘i o Apitelu, latou te pupu‘e ‘iā Paruka le tusi‘upu ma Ieremia le perofeta; a ‘ua natia i lā‘ua e le ALI‘I.
27 ‘Ona o‘o mai ai lea o le afioga a le ALI‘I ‘iā Ieremia, ‘ina ‘ua uma ‘ona susunuina e le tupu o le tusi tā‘ai ma ‘upu na tusia e Paruka mai le gutu o Ieremia, ‘ua fa‘apea mai:
28 ‘Inā toe ‘ave ia e oe se isi tusi tā‘ai ma e tusi i ai ‘upu muamua uma na i ai i le tusi tā‘ai muamua, na susunuina e Ioakima le tupu o Iuta.
29 ‘E te fai atu fo‘i ‘iā Ioakima le tupu o Iuta, O lo‘o fa‘apea ‘ona fai mai o le ALI‘I, ‘Ua e susunuina lenā tusi tā‘ai, ‘ua e fa‘apea mai, Se a ‘ea le mea na e tusia ai, ‘ua fa‘apea, E sau lava le tupu o Papelonia ma fa‘aumatia lenei nu‘u ma ‘ave‘eseina ai tagata ‘atoa fo‘i ma manu?
30 O le mea lea o lo‘o fa‘apea ‘ona fetalai mai o le ALI‘I ‘iā Ioakima le tupu o Iuta, E le ‘iā te ia se tasi e ti‘eti‘e i le nofoāli‘i o Tavita; e tu‘ulafoa‘iina fo‘i lona tino ‘ua oti i le vevela i le ao ma le malūlū i le po.
31 ‘Ou te taui atu fo‘i ‘iā te ia ma ana fānau ma ana ‘au‘auna, a latou amioletonu; ‘ou te fa‘ao‘o fo‘i ‘iā te i latou ma ē o nonofo i Ierusalema ma tagata o Iuta, le malaia uma na ‘ou fai atu ai ‘iā te i latou; a ‘ua latou lē fa‘alogo mai.
32 ‘Ona ‘ave ai lea e Ieremia o se isi tusi tā‘ai ma na avatu ai i le tusi‘upu, o Paruka le atali‘i o Neria; ‘ua tusi i ai fo‘i e ia mai le gutu o Ieremia, o ‘upu uma o le tusi na susunuina i le afi e Ioakima le tupu o Iuta; ‘ua toe fa‘aopoopoina fo‘i i ai nisi ‘upu fa‘apea e tele.