1 O le afioga na o‘o mai ‘iā Ieremia mai le ALI‘I ‘ua fa‘apea mai:
2 ‘Inā tula‘i ia i le faitoto‘a o le fale o le ALI‘I, ma tala‘i atu ai lenei ‘upu, ‘ia fa‘apea atu, ‘Inā fa‘alogologo mai ia i le afioga a le ALI‘I, o ‘outou o Iuta uma, o ē ulu mai i nei faitoto‘a e ifo atu ai i le ALI‘I.
3 O lo‘o fa‘apea ‘ona fetalai mai o le ALI‘I o ‘au, le Atua o Isaraelu: ‘Ia ‘outou sauni lelei i o ‘outou ala ma a ‘outou amio, ‘ona ‘ou fa‘atumauina ai lea o ‘outou i lenei mea.
4 ‘Aua tou te fa‘atuatua i ‘upu pepelo, o lo‘o fa‘apea: “O le malumalu o le ALI‘I, O le malumalu o le ALI‘I, O le malumalu o le ALI‘I lenei.”
5 Auā ‘āfai tou te matuā sauni lelei i o ‘outou ala ma a ‘outou amio; ‘āfai fo‘i tou te matuā faia le fa‘amasinoga i le tasi tagata ma le tasi tagata;
6 ‘āfai fo‘i tou te lē fa‘asauā atu i le tagata ‘ese, ma lē ‘ua aumatuā ma le fafine ‘ua oti lana tane, ma ‘outou le fa‘amaligi le toto o ē ‘ua lē sala i lenei mea ma ‘outou le mulimuli atu i atua ‘ese e i ai le malaia;
7 ‘ona ‘ou fa‘atumauina ai lea o ‘outou i lenei mea, o le nu‘u na ‘ou foa‘iina atu i o ‘outou tamā e fa‘avavau fa‘avavau lava.
8 Fa‘auta, ‘ua ‘outou fa‘atuatua i ‘upu pepelo, e lē aogā.
9 Tou te gaoi ‘ea ma fasioti tagata ma mulilua ma tautō pepelo ma fa‘amū mea manogi ‘iā Paala ma mulimuli atu i atua ‘ese ‘ua ‘outou lē iloa;
10 ma ‘outou ō mai ma tutū i o‘u luma i lenei fale, o lo‘o ta‘ua ai lo‘u igoa ma ‘outou fai mai, “‘Ua lavea‘iina i matou,” ‘ina ‘ia faia nei mea ‘inosia uma?
11 O lenei fale fo‘i ‘ua ta‘ua ai lo‘u igoa ‘ua ‘avea ‘ea lea ma ana o tagata fa‘asauā i o ‘outou manatu? Fa‘auta mai, o a‘u nei lava ‘ua ‘ou va‘ai atu i ai, o lo‘o fetalai mai ai le ALI‘I.
12 A ‘ia ‘outou ō i le mea sa a‘u i ai i Sailo, na ‘ou tu‘u ai lo‘u igoa i le amataga ma ‘ia ‘outou matamata i mea na ‘ou fai i ai ‘ona o le amio leaga a lo‘u nu‘u o Isaraelu.
13 O lenei, ‘ua ‘outou faia ia mea uma, o lo‘o fetalai mai ai le ALI‘I, ‘ua ‘ou tautala atu fo‘i ‘iā te ‘outou, na ‘ou ala tautala atu lava, a ‘ua ‘outou lē fa‘alogo mai; na ‘ou vala‘au atu fo‘i ‘iā te ‘outou, a ‘ua ‘outou le tali mai ai.
14 O le mea lea ‘ou te fai ai i le fale ‘ua ta‘ua ai lo‘u igoa, o le fale ‘ua ‘outou fa‘atuatua i ai ma le nu‘u ‘ua ‘ou foa‘iina atu ‘iā te ‘outou ma o ‘outou tamā, e pei ‘ona ‘ou faia i Sailo.
15 ‘Ou te lafoa‘i fo‘i ‘iā te ‘outou i o‘u luma, e pei ‘ona ‘ou lafoa‘iina o ‘outou uso uma, o le fānauga uma a Efaraima.
16 O oe na fo‘i, ‘aua ‘e te fa‘atoga mai mo lenei nu‘u, ‘aua fo‘i ‘e te faia se auega, po o se fa‘atoga mo i latou, ‘aua ‘e te fautua mai ‘iā te a‘u; auā ‘ou te lē fa‘alogo lava ‘iā te oe.
17 ‘Ua e iloa atu ‘ea mea ‘ua latou faia i ‘a‘ai o Iuta ma ala o Ierusalema?
18 ‘Ua fai fafie e le fānau, ‘ua tafu le afi e o latou tamā, ‘ua lomi le paluga falaoa e fafine e fai a‘i fa‘apāpā areto mā le tupu fafine o le lagi, ‘ua liligi fo‘i taulaga i mea e inu i atua ‘ese, ‘ina ‘ia latou fa‘a‘ono‘ono mai ai ‘iā te a‘u.
19 O a‘u ‘ea ‘ua latou fa‘a‘ono‘ono i ai? o lo‘o fetalai mai ai le ALI‘I; e lē o i latou lava ‘ea, ‘ina ‘ia māsiasi ai i latou?
20 O le mea lea o lo‘o fa‘apea ‘ona fetalai mai ai o le Ali‘i le ATUA, Fa‘auta, ‘ou te liligi ifo i luga o lenei mea lo‘u ita ma lo‘u tigā, i luga o tagata ma luga o manu, i luga fo‘i o la‘au i le fanua ma le fua o le lau‘ele‘ele; e mū ai, ‘ae lē tineia lava.
21 O lo‘o fa‘apea ‘ona fetalai mai o le ALI‘I o ‘au, o le Atua o Isaraelu: ‘Ia ‘outou fa‘aopoopo a ‘outou taulaga mū ‘iā ‘outou taulaga ma ‘ia ‘outou ‘a‘ai i tufa‘aga.
22 Auā na ‘ou le fai atu i o ‘outou tamā ma a‘u le poloa‘i atu ‘iā te i latou i le aso na ‘ou ‘aumai ai ‘iā te i latou a‘i le nu‘u o Aikupito, se ‘upu i taulaga mū ma taulaga.
23 A o le mea lava lenei na ‘ou poloa‘i atu ai ‘iā te i latou, ‘ua fa‘apea atu, “‘Ia ‘outou fa‘alogo mai i lo‘u leo, ‘ona fai ai lea o a‘u mo ‘outou Atua, e fai fo‘i ‘outou mo‘u nu‘u; ma ‘ia ‘outou sāvavali i le ala uma na ‘ou poloa‘i atu ai ‘iā te ‘outou, ‘ina ‘ia manuia ai ‘outou.”
24 A ‘ua latou lē fa‘alogo mai ma ‘ua lē ua‘i mai o latou taliga, a ‘ua latou sāvavali i mafaufauga ma le finau vale o latou loto leaga, ‘ua latou tu‘umuli i tua, a ‘ua lē sāvavali i luma.
25 Talu le aso na ō mai ai o ‘outou tamā a‘i le nu‘u o Aikupito, e o‘o i le aso nei, na ‘ou ‘a‘auina atu ai ‘iā te ‘outou a‘u ‘au‘auna uma o perofeta, na ‘ou ala ‘a‘auina atu i latou i lea aso ma lea aso;
26 a ‘ua latou lē fa‘alogo mai ‘iā te a‘u ma ‘ua lē ua‘i mai o latou taliga, a ‘ua latou fa‘ama‘a‘a o latou ua; ‘ua amio leaga i latou e sili i o latou tamā.
27 ‘E te fai atu lava ia ‘upu uma ‘iā te i latou, ‘ae latou te lē fa‘alogo mai ‘iā te oe; ‘e te vala‘au atu fo‘i ‘iā te i latou, ‘ae latou te lē tali mai ‘iā te oe.
28 A ‘ia e fai atu ‘iā te i latou, o le nu‘u lava lenei ‘ua lē fa‘alogo mai i le leo o le ALI‘I lo latou Atua; ‘ua lē talia fo‘i e i latou le a‘oa‘iga; ‘ua fano le fa‘amaoni, ma ‘ua te‘a lava i o latou gutu.
29 ‘Inā sele mamā ia lou lauulu ma lafoa‘i,a ‘ia e faia i mauga tula le pese e aualofa a‘i;auā ‘ua te‘ena e le ALI‘Ima lafoa‘iina le tupulaga ‘ua ia to‘asā i ai.
30 Auā ‘ua faia le mea leaga e le fānauga a Iuta i o‘u luma, o lo‘o fetalai mai ai le ALI‘I; ‘ua tu‘uina e i latou a latou mea e ‘inosia i le fale ‘ua ta‘ua ai lo‘u igoa, ‘ina ‘ia latou fa‘aleagaina ai.
31 ‘Ua faia fo‘i e i latou mea maualuluga i Tofeta, ‘ua i le vanu o le atali‘i o Hinoma, e susunu ai o latou atali‘i ma o latou afafine i le afi; o le mea ‘ou te le‘i poloa‘i atu ai, ‘ou te le‘i manatu fo‘i i ai.
32 O le mea lea, fa‘auta, o le a o‘o mai ai ona po, o lo‘o fetalai mai ai le ALI‘I, e lē toe igoa ai lea mea o Tofeta, po o le vanu o le atali‘i o Hinoma, a o le vanu o le fasi; latou te tanumia fo‘i i Tofeta se‘ia le toe ofi.
33 E fai fo‘i tino ‘ua oti o lenei nu‘u ma mea e ‘ai a manu felelei ma manu e tata‘a; e leai fo‘i sē na te tulia.
34 ‘Ou te fa‘ai‘uina fo‘i i ‘a‘ai o Iuta ma ala o Ierusalema le leo fiafia ma le leo ‘oli‘oli, o le leo o le fa‘ato‘āfaiavā ma le leo o le fa‘ato‘ānofotane; auā e fai ma fa‘atafunaga lenei nu‘u.#