1 O le tausaga o Setekaia e luafulu ma le tasi na fai ai o ia ma tupu; e sefulu ma le tasi tausaga na fai ai o ia ma tupu i Ierusalema; o le igoa o lona tinā o Hamutala, le afafine o Ieremia le Lipena.
2 Na ia faia le amio leaga i luma o le ALI‘I, pei o mea uma na faia e Ioakima.
3 Auā o le to‘asā o le ALI‘I ‘iā Ierusalema ma Iuta, ‘ua i‘u ai ‘ina lafoa‘iina i latou a‘i ona luma, na fōua ai fo‘i le tupu o Papelonia e Setekaia.
4 O le iva o tausaga o lana nofoa‘iga o le sefulu o masina, o le aso e sefulu o le masina, na sau ai Nepukanesa, le tupu o Papelonia i Ierusalema, o ia ma ana ‘au uma; ‘ua tolauapi fo‘i e tau ma ia, ‘ua latou fai fo‘i ‘olo e vagaia a‘i.
5 Na vagaia le ‘a‘ai ‘ua o‘o i le sefulu ma le tasi o tausaga o le tupu o Setekaia.
6 O le fa o masina fo‘i, o le aso iva o le masina na velavela ai le oge i le ‘a‘ai, ‘ua leai fo‘i se mea e ‘ai mā tagata o le nu‘u.
7 Na lepetia le ‘a‘ai, ‘ona sōsōla ai lea o ‘au uma, ma latou tu‘ua le ‘a‘ai i le po, ‘ua ui i le ala i le faitoto‘a i le vā o pā e lua, e latalata i le fanua o le tupu; (na vagaia fo‘i le ‘a‘ai e Kaletaia;) na latou o fo‘i i le ala i le ‘ele‘ele laugatasi.
8 ‘Ona tuliloa ai lea e le itūtau‘a a Kaletaia i le tupu ma latou maua atu ‘iā Setekaia i le ‘ele‘ele laugatasi o Ieriko; na ta‘ape‘ape fo‘i lana itūtau‘a uma na ‘iā te ia.
9 ‘Ona latou pu‘e ai lea i le tupu ma avatu ‘iā te ia i le tupu o Papelonia i Ripelu, i le nu‘u o Amato; ‘ona fa‘asala ai lea o ia ‘iā te ia.
10 ‘Ua fasioti fo‘i e le tupu o Papelonia i atali‘i o Setekaia i ona luma; ‘ua ia fasioti fo‘i i ali‘i uma o Iuta i Ripelu.
11 ‘Ua ia fa‘atauaso fo‘i ‘iā Setekaia ma fusifusi ‘iā te ia i fa‘amau ‘apamemea e lua; ‘ua ‘ave fo‘i ‘iā te ia e le tupu o Papelonia i Papelonia ma na tu‘uina atu ‘iā te ia i le fale puipui, ‘ua o‘o lava i le aso na oti ai o ia.
12 O le lima o masina, o le aso e sefulu o le masina, o le tausaga e sefulu ma le iva lea o le tupu o Nepukanesa, o le tupu o Papelonia, na sau ai i Ierusalema o Nepusatana, lē pule i le ‘au e fa‘afeao, o lē na tu i luma o le tupu o Papelonia;
13 na ia susunuina le fale o le ALI‘I ma le fale o le tupu, ‘atoa ma fale uma o Ierusalema; o fale tetele uma fo‘i ‘ua susunuina e ia i le afi.
14 Na sōloia fo‘i pā uma na fa‘ata‘ali‘oli‘oina ai Ierusalema e ‘au uma a Kaletaia, sa i le na pule i le ‘au e fa‘afeao.
15 O isi fo‘i o ē matitiva o le nu‘u ma ē na totoe o le nu‘u sa i ai pea i le ‘a‘ai ma ē na sōsōla, na sōsōla atu i le tupu o Papelonia ma ē na totoe o le vao tagata, na tāfea i latou e Nepusatana lē pule i le ‘au e fa‘afeao.
16 A ‘ua tu‘ua e Nepusatana lē pule i le ‘au e fa‘afeao, nisi o ē matitiva o le nu‘u, e fai ma teu vine ma ē galulue i le fanua.
17 O pou ‘apamemea fo‘i sa i le fale o le ALI‘I ma tu‘ugātanoa, ‘atoa ma le vai ‘apamemea sa i le fale o le ALI‘I, na ta‘ei e Kaletaia ma latou ‘ave le ‘apamemea uma i Papelonia.
18 Na latou ‘ave fo‘i o ‘ulo ma suō ma selelamepa, ma ipu ma ipu e asu a‘i, ‘atoa ma mea ‘apamemea uma lava na latou fai a‘i sauniga.
19 O tanoa fo‘i ma salefu ma ipu ma ‘ulo ma tu‘ugālamepa ma ipu e asu a‘i ma ipu e sasa‘a a‘i; o le auro o mea na faia i auro ma le ario o mea na faia i ario, na ‘ave e le ali‘i e pule i le ‘au e fa‘afeao.
20 O pou e lua, o le vai e tasi ma povi ‘apamemea e sefulu ma le lua sa i lalo ma le tu‘ugātanoa, na faia e le tupu o Solomona mo le fale o le ALI‘I; ‘ua lē fuatia lava le mamafa o ‘apamemea o na mea uma.
21 O pou fo‘i, o le umi o le tasi pou o kupita e sefulu ma le valu; o le fua fo‘i na fa‘ata‘ali‘oli‘o ai, e sefulu ma le lua o kupita ia; o lona mafiafia e tusa lea ma le lautele o le alofilima; sa fa‘aōō lava.
22 O le kapetala ‘apamemea fo‘i na i ona luga; o le umi o le tasi kapetala e lima kupita, o le mea fa‘a‘upega ‘atoa ma rimoni sa i le kapetala e fa‘ata‘ali‘oli‘o ai, o ‘apamemea uma ia; e fa‘apei o ia mea fo‘i sa i ai i lona lua o pou, ‘atoa fo‘i ma rimoni.
23 Na i ai fo‘i rimoni e ivagafulu ma le ono i itū; o rimoni uma sa i luga o le mea fa‘a‘upega, e tasi le selau o fa‘ata‘ali‘oli‘o ai.
24 Na ‘ave fo‘i e le ali‘i e pule i le ‘au e fa‘afeao o Seraia le ositaulaga sili ma Sefanaia le ositaulaga e aupito ane ‘iā te ia, ‘atoa ma leoleo o faitoto‘a e to‘atolu;
25 na ia ‘ave fo‘i nai le ‘a‘ai le tasi ‘au‘auna sili na tofia e pule i ‘au ma tagata e to‘afitu o ē na iloa fofoga o le tupu, na maua i latou i le ‘a‘ai ma le ali‘i sili i ē tusi‘au, o le na fa‘apotopoto i tagata o le nu‘u; ‘atoa ma tagata o le nu‘u e to‘aonogafulu, sa maua i latou i totonu o le ‘a‘ai.
26 Na ‘ave fo‘i i latou e Nepusatana lē pule i le ‘au e fa‘afeao ma na avatua i latou i le tupu o Papelonia i Ripelu.
27 ‘Ona fasia ai lea o i latou e le tupu o Papelonia, ‘ua na fasioti ‘iā te i latou i Ripelu, i le nu‘u o Amato, na tāfea fo‘i Iuta nai lo latou lau‘ele‘ele.
28 O le nu‘u lenei na tāfea ‘iā Nepukanesa; o le fitu o tausaga na tāfea ai tagata Iuta e tolu o afe ma le to‘aluafulu ma le to‘atolu.
29 O le tausaga o Nepukanesa e sefulu ma le valu, na tāfea ai nai Ierusalema, o tagata e to‘avalugalau ma le to‘atolugafulu ma le to‘alua.
30 O le lua sefulu ma le tolu o tausaga o Nepukanesa na tāfea ai ‘iā Nepusatana lē pule i le ‘au e fa‘afeao, o tagata Iuta e to‘afitu galau ma le fa o sefulu ma le to‘alima. O le ‘atoa o tagata e to‘afa gaafe ma le to‘aono galau.
31 ‘Ua o‘o i le tolugafulu ma le fitu o tausaga o le tāfeaga a Ioakina le tupu o Iuta, o le sefulu ma le lua fo‘i masina, o le aso e luafulu ma le lima o le masina, ‘ona fa‘aeaina ai lea o le ulu o Ioakina le tupu o Iuta e Evile-marota, le tupu o Papelonia, i le tausaga na fai ai o ia ma tupu ma na ‘aumaia o ia nai le fale puipui;
32 na ia tautala ma le alofa ‘iā te ia, ‘ua tu‘u atu fo‘i lona nofoāli‘i ‘ia sili i nofoāli‘i o tupu na ‘iā te ia i Papelonia;
33 na ia sui fo‘i ona ‘ofu sa ‘ofu ai i le fale puipui; na ‘ai fo‘i o ia e lē aunoa i ona luma i aso uma o lona ola.
34 O lana tufa‘aga fo‘i, o le tufa‘aga e lē aunoa, na tu‘uina atu ‘iā te ia e le tupu o Papelonia i lea aso ma lea aso, ‘ua o‘o lava i le aso o lona oti, o aso uma o lona ola.