1 O le afioga na o‘o mai ‘iā Ieremia mai le ALI‘I ‘ua fa‘apea mai,
2 O lo‘o fa‘apea ‘ona fetalai mai o le ALI‘I, le Atua o Isaraelu, ‘ua fa‘apea mai: ‘Inā tusi ia i le tusi, o ‘upu uma ‘ua ‘ou fai atu ai ‘iā te oe.
3 Auā o lo‘o fetalai mai le ALI‘I, Fa‘auta, o le a o‘o mai ona po, ‘ou te fa‘afoisia mai ai le tāfeaga o lo‘u nu‘u o Isaraelu ma Iuta, o lo‘o fa‘apea mai ai le ALI‘I; ‘ou te toe fa‘afoisia mai i latou i le lau‘ele‘ele na ‘ou foa‘iina atu ai i o latou tamā, e fai fo‘i lea mo i latou.
4 O ‘upu fo‘i nei ‘ua fetalai mai ai le ALI‘I ‘iā Isaraelu ma Iuta.
5 E moni, o lo‘o fa‘apea ‘ona fetalai mai o le ALI‘I:‘Ua tatou lagona le ta‘alili o le gatete,o i ai le mata‘u, ‘ae lē o le filemū.
6 O le mea lea ‘inā fesili atu ia,ma ‘ia ‘outou va‘ava‘ai, pe fānau ‘ea se tane?O le a ‘ea le mea ‘ou te iloa atu ai i tane uma,e ta‘itasi ma ona lima i ona itū,e pei o se fafine a fānau;o mata uma fo‘i ‘ua liua, ‘ua matamata vale lava?
7 Auē! auā o le aso tele lea, e leai sona tusa;o ona po lava ia o le puapuagā o Iakopo;‘ae fa‘aolaina ai o ia.
8 O lo‘o fetalai mai fo‘i le ALI‘I o ‘au, O le aso lava lea ‘ou te gauia ai lana amo i lou ua, ‘ou te motusi‘esea fo‘i ou noanoaga, e lē toe ‘au‘auna fo‘i o ia i tagata ‘ese.
9 ‘Ae latou te ‘au‘auna i le ALI‘I lo latou Atua ma Tavita lo latou tupu, ‘ou te fa‘atūina ai mo i latou.
10 O oe fo‘i, Iakopo e, la‘u ‘au‘auna,‘aua ‘e te fefe, o lo‘o fetalai mai ai le ALI‘I;‘aua fo‘i ‘e te mata‘u o oe Isaraelu e.Auā fa‘auta, ‘ou te fa‘aola ‘iā te oe a‘i le nu‘u mamaoma lau fānau a‘i le nu‘u ‘ua tāfea ai i latou;e fo‘i mai lava Iakopo, e totoa fo‘i o ia,ma nofo filemū, e leai fo‘i se tasi e fa‘amata‘u ‘iā te ia.
11 Auā o lo‘o fetalai mai le ALI‘I,‘ou te ‘iā te oe e fa‘aola ‘iā te oe.E ui lava ‘ina ‘ou matuā fa‘aumatia nu‘u uma na ‘ou fa‘ata‘ape‘apeina ai oe,‘ae ‘ou te lē matuā fa‘aumatia oe,‘ou te a‘oa‘i fa‘atatau fo‘i ‘iā te oe,‘ae ‘ou te lē matuā fa‘asaoina oe.
12 Auā o lo‘o fa‘apea ‘ona fetalai mai o le ALI‘I:E lē mafai ‘ona fō‘ia lou manu‘a,e matuā leaga lou manu‘a.
13 E leai se tasi e faia lau finauga,‘ia fusia lou manu‘a;e le ‘iā te oe ni fusi e mālōlō ai.
14 ‘Ua fa‘agalogaloina oe e i latou uma sa manana‘o ‘iā te oe;‘ua latou le sā‘ili ‘iā te oe.Auā ‘ua ‘ou taia oe i le ta a lē ‘ua ita,ma le a‘oa‘iga a lē ‘ua sauā,‘ona o le tele o lau amioletonu;‘ua fa‘ateleina au agasala.
15 Pe se a le mea ‘ua e ‘alaga mai ai ‘ona o lou manu‘a?E matuā tele lou tigā ‘ona o le tele o lau amioletonu;‘Ua fa‘ateleina au agasala,o le mea lea na ‘ou faia ai ia mea ‘iā te oe.
16 ‘Ae ui i lea e fa‘aumatia ai i latou uma o ē fa‘aumatia oe;o i latou uma fo‘i ‘ua sauā ‘iā te oe,e ō lava i latou uma i le tāfeaga.O ē ‘ua faoa au mea, e faoa lava a latou mea;o i latou uma ‘ua vetea oe,‘ou te tu‘uina atu ‘ia vetea i latou.
17 Auā ‘ou te fa‘amālōlōina oe,‘ou te fofōina ou manu‘a,o lo‘o fetalai mai ai le ALI‘I.Auā ‘ua latou ta‘ua oe,“O le ‘ua tulia; O Siona lenā,e leai se tasi ‘ua sā‘ili atu i ai.”
18 O lo‘o fa‘apea ‘ona fetalai mai o le ALI‘I:Fa‘auta, ‘ou te toe fa‘afoisia mai le tāfeaga o fale ‘ie o Iakopo,ma ‘ou alofa atu i ana mea e nofo ai.E fa‘atūina fo‘i le ‘a‘ai i le mea maupu‘epu‘e sa i ai,e ‘ainā fo‘i le maota e pei o ona tuga tuai.
19 E tupu mai ai fo‘i le vi‘iga, ma le leo o ē sisiva;‘ou te fa‘ato‘ateleina i latou,‘ae lē fa‘ato‘aitiitiina i latou.‘Ou te fa‘atupuina fo‘i lo latou mamalu,‘ae lē fa‘alēaogāina i latou.
20 O a latou fānau e pei o anamua i latou,‘ou te fa‘atumauina fo‘i i o‘u luma lo latou fa‘apotopotoga,ma ‘ou taui atu ‘iā te i latou uma o ē fa‘asauā ‘iā te i latou.
21 O lo latou ali‘i o lo latou lava ia,ma lē na te pule ‘iā te i latou e tupu mai o ia mai ‘iā te i latou.‘Ou te fa‘alatalataina mai o ia,‘ona fa‘alatalata mai ai lea o ia ‘iā te a‘u;auā o ai ‘ea o ia ‘ua fa‘amalosi i lona loto e fa‘alatalata mai ‘iā te a‘u?o lo‘o fetalai mai ai le ALI‘I.
22 E fai fo‘i ‘outou mo‘u nu‘u,o a‘u fo‘i e fai mo ‘outou Atua.
23 Fa‘auta, ‘ua alu atule afā mai le ALI‘I i le to‘asā.O le afā fulifaō; e pesi tetele mai i luga o ulu o ē amio leaga.
24 E lē toe liliu le to‘asā tele o le ALI‘I, se‘ia faia e ia,se‘ia fa‘ataunu‘uina fo‘i e ia manatu o lona finagalo;tou te mafaufau i ai i aso amulī.#