1 O le afioga na o‘o mai ‘iā Ieremia mai le ALI‘I, ‘ua fa‘apea mai:
2 ‘Inā fa‘alogologo mai ia ‘outou i ‘upu o lenei feagaiga ma ‘ia ‘outou fai atu ai i tagata o Iuta ma ē o nonofo i Ierusalema;
3 ma ‘ia e fai atu ‘iā te i latou, o lo‘o fa‘apea ‘ona fetalai mai o le ALI‘I le Atua o Isaraelu: ‘Ia malaia le tagata o lē na te lē fa‘alogo i ‘upu o lenei feagaiga,
4 na ‘ou poloa‘i atu ai i o ‘outou tamā i le aso na ‘ou ‘aumai ai i latou mai le nu‘u o Aikupito mai le ‘ogāumu e tunu ai u‘amea, ‘ua fa‘apea atu, ‘Inā fa‘alogo mai ia i lo‘u leo ma ‘ia ‘outou faia ia mea, e tusa ma mea uma ‘ua ‘ou poloa‘i atu ai ‘iā te ‘outou; ‘ona fai ai lea e ‘outou mo‘u nu‘u, e fai fo‘i a‘u mo ‘outou Atua;
5 ‘ina ‘ia ‘ou fa‘ataunu‘uina le tautoga, na ‘ou tautō ai i o ‘outou tamā, e foa‘i atu ‘iā te i latou le nu‘u ‘ua tafe ai le suāsusu ma le meli, e pei ‘ona fai i le aso nei.‘Ona ‘ou tali atu ai lea, ‘ua fa‘apea atu, “Le ALI‘I e, ‘inā fai ia o lea.”
6 ‘Ona fetalai mai ai lea o le ALI‘I ‘iā te a‘u: ‘Inā tala‘i atu ia nei ‘upu uma i ‘a‘ai o Iuta ma ala o Ierusalema, ‘ia fa‘apea atu: ‘Ia ‘outou fa‘alogo i ‘upu o lenei feagaiga ma ‘ia ‘outou faia.
7 Auā na ‘ou matuā fai atu i o ‘outou tamā i le aso na ‘ou ‘aveina a‘e ai i latou mai le nu‘u o Aikupito, ‘ua o‘o lava i le aso nei, ‘ua ‘ou ala fai atu lava, ‘ua fa‘apea atu, ‘Inā fa‘alogo mai ia i lo‘u leo.
8 A ‘ua latou lē fa‘alogo mai ‘ua lē ua‘i mai fo‘i o latou taliga, a ‘ua latou ta‘itasi ma savali e tusa ma le finau vale o latou loto leaga; o lea ‘ua ‘ou fa‘ao‘o ai i luga ‘iā te i latou o ‘upu uma o lenei feagaiga na ‘ou poloa‘i atu ai ‘ia latou faia; a ‘ua latou le faia lava.
9 ‘Ona fetalai mai lea o le ALI‘I ‘iā te a‘u: ‘Ua iloa le fouvale i tagata o Iuta ma ē o nonofo i Ierusalema.
10 ‘Ua latou liliu atu i amio leaga a o latou tamā anamua, o ē na lē mafafai ‘ona fa‘alogo i a‘u ‘upu ma ‘ua latou mulimuli atu i atua ‘ese e ‘au‘auna ‘iā te i latou; ‘ua solia e le ‘āiga o Isaraelu ma le ‘āiga o Iuta la‘u feagaiga na a‘u osia ma o latou tamā.
11 O le mea lea, o lo‘o fa‘apea ‘ona fetalai mai ai o le ALI‘I, Fa‘auta, ‘ou te fa‘ao‘o le malaia ‘iā te i latou, latou te lē mafaia ‘ona sao ai; e ui lava ‘ina latou ‘alalaga mai ‘iā te a‘u, ‘ou te lē fa‘alogo lava ‘iā te i latou.
12 ‘Ona ō ai lea o ‘a‘ai o Iuta ma ē o nonofo i Ierusalema ma latou ‘alalaga i atua na latou fa‘amū i ai mea manogi; ‘ae latou te lē fa‘aola lava ‘iā te i latou i ona po o lo latou malaia.
13 Auā Iuta e, o le tau aofa‘i o ou ‘a‘ai o le tau aofa‘i lea o ou atua; ‘ua ‘outou fa‘atūina fo‘i fatafaitaulaga mo le mea e māsiasi ai, o fatafaitaulaga lava e fa‘amū ai mea manogi ‘iā Paala, e fa‘atatau i le tau aofa‘i o ala i Ierusalema.
14 O oe na fo‘i, ‘aua ‘e te fa‘atoga mai mo lenei nu‘u, ‘aua fo‘i ‘e te faia se auega, po o se fa‘atoga mo i latou; auā ‘ou te lē fa‘alogo ‘iā te i latou i ona po latou te vala‘au mai ai ‘iā te a‘u ‘ona o lo latou malaia.
15 O a mea e fai e la‘u pele i lo‘u fale, a o faia o ia amio leaga e tele? ‘ua mavae fo‘i le tufa‘aga pa‘ia ‘iā te oe; a ē fai mea leaga, ‘ona e fiafia ai lea.
16 Na fa‘aigoa oe e le ALI‘I, “O le olive lauolaola, e matagofie, e lālelei ona fua;” ‘ae o le ta‘alili tele lava ‘ua fa‘amūina ai ona lau i le afi, ‘ua gauia ‘ona la.
17 Auā o le ALI‘I o ‘au, o lē na totōina oe, ‘ua fetalai mai e ia le malaia o le a o‘o ‘iā te oe, ‘ona o le amio leaga a le ‘āiga o Isaraelu ma le ‘āiga o Iuta, na latou faia ‘iā te i latou lava e fa‘a‘ono‘ono ‘iā te a‘u i lo latou fa‘amū mea manogi ‘iā Paala.
18 ‘Ua fa‘ailoa mai e le ALI‘I ‘iā te a‘u ‘ina ‘ia ‘ou iloa;‘ona e fa‘aalia mai ai lea ‘iā te a‘u o a latou amioga.
19 A o a‘u, ‘ua pei o se tama‘i mamoe lata ‘ua ta‘ita‘iina ‘ia fasia;na ‘ou lē iloa fo‘i ‘ua mafaufau e i latou i ni togafiti e leaga ai a‘u,‘ua fa‘apea, “Se‘i tatou fa‘aumatia le la‘au ma ona fuama tatou vavae‘eseina o ia a‘i le nu‘u o tagata ola,‘ina ‘ia lē toe manatua lava lona igoa.”
20 A o oe, le ALI‘I o ‘au,o le fa‘amasino amiotonu,o lē tofotofo i le manatu ma le loto,e iloa e a‘u lau taui ma sui ‘iā te i latou;auā ‘ua ‘ou fa‘aalia la‘u finauga ‘iā te oe.
21 O le mea lea, o lo‘o fa‘apea ‘ona fetalai mai ai o le ALI‘I i tagata o Anatota, o ē sā‘ili‘ili e fasioti ‘iā te oe, ‘ua fa‘apea, “‘Aua ‘e te vavalo mai i le suafa o le ALI‘I, ‘ina ne‘i oti oe i o matou lima.”
22 O le mea lea o lo‘o fa‘apea ‘ona fetalai mai ai o le ALI‘I o ‘au: Fa‘auta, ‘ou te taui atu ‘iā te i latou; e oti taulele‘a i le pelu; e oti fo‘i o latou atali‘i ma o latou afafine i le oge.
23 E leai ni o latou e totoe; auā ‘ou te fa‘ao‘o le malaia i tagata o Anatota, o le tausaga lava e tauia ai i latou.