1 O le afioga na o‘o mai ‘iā Ieremia i le nu‘u uma o Iuta i le fa o tausaga o Ioakima le atali‘i o Iosia, le tupu o Iuta, o le tausaga muamua lea o Nepukanesa le tupu o Papelonia,
2 na fai atu ai le perofeta o Ieremia i le nu‘u uma o Iuta ma i latou uma sa nonofo i Ierusalema, ‘ua fa‘apea atu:
3 E āfua i le tausaga e sefulu ma le tolu o Iosia le atali‘i o Amone, le tupu o Iuta, e o‘o i le aso nei, o tausaga ia e lua sefulu ma le tolu, ‘ua o‘o mai ai ‘iā te a‘u le afioga a le ALI‘I, ‘ua ‘ou fai atu ai fo‘i ‘iā te ‘outou, ‘ua ‘ou ala fai atu lava; a ‘ua ‘outou lē fa‘alogo mai.
4 ‘Ua ‘a‘auina atu ‘iā te ‘outou e le ALI‘I o ana ‘au‘auna uma, o perofeta, ‘ua ala ‘a‘auina atu lava i latou, a ‘ua ‘outou lē fa‘alogo mai ma ‘ua lē ua‘i mai o ‘outou taliga e fa‘alogologo mai ai.
5 ‘Ua latou fa‘apea atu, “‘Ia ‘outou ta‘itasi ma liliu mai i lona ala leaga, ma le leaga o a ‘outou amioga, tou te nonofo ai i le lau‘ele‘ele ‘ua foa‘iina mai e le ALI‘I ‘iā te ‘outou ma o ‘outou tamā mai le vavau e o‘o i le fa‘avavau.
6 ‘Aua le mulimuli atu i atua ‘ese e ‘au‘auna i ai ma ifo i ai; ‘aua ne‘i fa‘a‘ono‘ono fo‘i ‘iā te a‘u i mea e faia e o ‘outou lima, ‘ona ‘ou le fa‘atigāina lea o ‘outou.”
7 A ‘ua ‘outou lē fa‘alogo mai ‘iā te a‘u, o lo‘o fetalai mai ai le ALI‘I; o lea ‘ua ‘outou fa‘a‘ono‘ono mai ai ‘iā te a‘u i mea e faia e o ‘outou lima, ‘ia tigā ai ‘outou.
8 O le mea lea ‘ua fa‘apea ‘ona fetalai mai ai o le ALI‘I o ‘au: ‘Ua ‘outou lē fa‘alogo mai i a‘u ‘upu,
9 o lo‘o fetalai mai ai le ALI‘I, fa‘auta, o le mea lea ‘ou te avatu ai le fe‘au, ma ‘a‘ami atu i ‘āiga uma o i le itū i matū, ma Nepukanesa le tupu o Papelonia la‘u ‘au‘auna, ‘ou te ‘aumaia fo‘i i latou e tau ma lenei nu‘u ma ē o nonofo ai ma ia nu‘u uma ‘ua vagavagai, e fa‘aumatia lava i latou ma faia i latou ma mea fa‘atafunaina ma mea e uisa ai ma mea gaogao e fa‘avavau.
10 ‘Ou te fa‘aumatia le leo fiafia ‘iā te i latou ma le leo ‘oli‘oli, o le leo o le fa‘ato‘āfaiavā ma le leo o le fa‘ato‘ānofotane, o le ta‘alili o ma‘aolo ma le malamalama o le lamepa.
11 E ‘avea lenei lau‘ele‘ele uma ma mea gaogao ma mea fa‘atafunaina; ‘ae ‘au‘auna ia nu‘u i le tupu o Papelonia i tausaga e fitugafulu.
12 A fa‘a‘ato‘atoaina tausaga e fitugafulu, ‘ona ‘ou taui atu ai lea i le tupu o Papelonia ma lenā nu‘u, o lo‘o fetalai mai ai le ALI‘I, ‘ona o la latou agasala; o le lau‘ele‘ele lava o Kaletaia, ‘ou te faia lea ma mea fa‘atafunaina e fa‘avavau.
13 ‘Ou te fa‘ao‘o fo‘i i lenā nu‘u o a‘u ‘upu uma na ‘ou fai atu e o‘o i ai, o ‘upu uma lava ‘ua tusia i lenei tusi na valo‘ia e Ieremia i atu nu‘u uma.
14 Auā e fa‘apologaina i latou, o i latou lava, ō atu nu‘u e tele ma tupu sili, ‘ou te taui atu fo‘i ‘iā te i latou e tusa ma la latou amioga, e tusa fo‘i ma mea ‘ua faia e o latou lima.
15 Auā ‘ua fa‘apea ‘ona fetalai mai o le ALI‘I le Atua o Isaraelu ‘iā te a‘u: ‘Ia e ‘ave le ipu uaina o lo‘u nei ita a‘i lo‘u lima ma fa‘ainu a‘i atu nu‘u uma ‘ou te ‘auina atu ai oe ‘iā te i latou.
16 Latou te feinu ma tautevateva ma fa‘avalea, ‘ona o le pelu ‘ou te ‘auina atu ai ‘iā te i latou.
17 ‘Ona ‘ou talia ai lea o le ipu a‘i le ‘a‘ao o le ALI‘I, ma ‘ou fa‘ainu a‘i atu nu‘u uma na ‘auina i ai a‘u e le ALI‘I;
18 o Ierusalema ma ‘a‘ai o Iuta ma ‘ona tupu, ma ona ali‘i, e faia i latou ‘ua mea gaogao ma mea fa‘atafunaina ma mea e uisa ai, ma fa‘afanoga e pei ‘ona fai i le aso nei.
19 O Farao, o le tupu o Aikupito ma ana ‘au‘auna, ma ali‘i ‘ua ‘iā te ia ma lona nu‘u uma;
20 o tagata ‘ese‘ese uma ma tupu uma o le nu‘u o Usa ma tupu uma o le nu‘u o Filisitia ma Asekelona, ma Kasa ma Ekerona ma ē o totoe o Asetota;
21 o Etoma ma Moapi, ma le fānauga a Amoni;
22 o tupu uma fo‘i o Turo ma tupu uma o Saitonu, ma tupu o nu‘u tu matāfaga i tala atu o le sami;
23 o Titana ma Tema ma Pusa ma i latou uma o ē sala a latou pito ‘ava;
24 o tupu uma fo‘i o Arapi ma tupu uma o tagata ‘ese‘ese o ē mau i le vao;
25 o tupu uma fo‘i o Semeri ma tupu uma o Elama, ma tupu uma o Metai;
26 ma tupu uma o le itū i matū, o ē latalata ma ē mamao, o le tasi ma le tasi ma mālō uma o le lalolagi o i le fogā‘ele‘ele; ‘ae mulia‘i inu le tupu o Sesaka ‘iā te i latou.
27 ‘E te fai atu fo‘i ‘iā te i latou, ‘Ua fa‘apea ‘ona fetalai mai o le ALI‘I o ‘au, le Atua o Isaraelu, ‘Ia feinu ‘outou ma ia ‘onā, ma ia pua‘i ma ia pa‘u‘ū, ‘aua fo‘i le toe tutū, ‘ona o le pelu ‘ou te ‘auina atu ai ‘iā te ‘outou.
28 ‘Ae ‘āfai latou te lē mafafai ‘ona tali i le ipu a‘i lou lima e feinu ai, ‘ona e fai atu ai lea ‘iā te i latou, O lo‘o fa‘apea ‘ona fetalai mai o le ALI‘I o ‘au, Tou te matuā feinu lava.
29 Auā fa‘auta, ‘ou te amata ‘ona fa‘ao‘o o le malaia i le ‘a‘ai ‘ua igoa i lo‘u igoa, a o ‘outou, e fa‘asaoina ‘ea ‘outou? E lē fa‘asaoina lava ‘outou; auā ‘ou te vala‘au atu i le pelu e o‘o ‘iā te i latou uma o ē ‘ua nonofo i le lalolagi, o lo‘o fetalai mai ai le ALI‘I o ‘au.
30 O oe fo‘i, ‘ia e vavalo ‘iā te i latou i nei ‘upu uma ma e fa‘apea atu ‘iā te i latou:E leo tele mai le ALI‘I mai lugāma tulei mai lona si‘ufofoga a‘i lona afio‘aga pa‘ia;e matuā leo tele mai i lona afio‘aga.E ‘alaga o ia, e pei o i latou o ē soli fua vine,‘iā te i latou uma o ē nonofo i le lalolagi.
31 E o‘o le vāvāō i tulu‘iga o le lalolagi;auā o lo‘o i le ALI‘I le finauga ma nu‘u ‘ese,e fa‘amasinoina e ia tagata uma;e tu‘uina atu e ia o ē amio leaga i le pelu,o lo‘o fetalai mai ai le ALI‘I.
32 O lo‘o fa‘apea ‘ona fetalai mai o le ALI‘I o ‘au:Fa‘auta, e alu atu le malaiae āfua i le tasi nu‘u e o‘o atu i le tasi nu‘u,e tupu mai le afā tele mai tulu‘iga o le lalolagi.
33 O le fasi a le ALI‘I i lea aso e āfua mai i le tasi pito lalolagi e o‘o atu i le tasi pito lalolagi; e leai ni e taufaitagitu‘i ‘iā te i latou, e le aofia i latou, e le tanumia fo‘i i latou; e fai i latou ma otaota i luga o le lau‘ele‘ele.
34 ‘Outou leoleo mamoe, ‘ia ‘outou uiō ma ‘alalaga;‘outou ta‘ita‘i o le lafu, ‘ia ‘outou ta‘afili i le lefulefuauā ‘ua o‘o i o ‘outou aso e fasia ma fa‘ata‘ape‘apeina ai ‘outou;e pa‘u‘ū ‘outou e pei o le ipu matagofie.
35 E lē maua e leoleo mamoe se mea e sola i ai,e lē sao fo‘i ta‘ita‘i o le lafu.
36 E lagona le leo o le ‘alaga o leoleo mamoema le uiō o ta‘ita‘i o le lafu.Auā ‘ua fa‘aumatia e le ALI‘Io mea e tata‘a ai o latou lafu.
37 O mea sa tata‘a ai manu ma le filemū,‘ua fa‘aumatia ia ‘ona o le to‘asā tele o le ALI‘I.
38 ‘Ua tu‘ua lona apitaga,e pei o le leona;auā e ‘avea lo latou nu‘u ma fa‘atafunaga‘ona o le ita fa‘asauā ma lona ita tele lava.#