1 O lo‘o fetalai mai le ALI‘I: O ona po ia e fai a‘u ma Atua i ‘āiga uma o Isaraelu, e fai fo‘i i latou mo‘u nu‘u.
2 O lo‘o fa‘apea ‘ona fetalai mai o le ALI‘I,Na maua le alofa i le vao e le nu‘u na totoe i le pelu,o Isaraelu lava, ‘ina ‘ua ‘ou alu atu e fa‘anofo filemū ‘iā te ia.
3 Na fa‘aali mai le ALI‘I ‘iā te a‘u anamua,‘ua fa‘apea mai: O le alofa e fa‘avavau,‘ua ‘ou alofa atu ai ‘iā te oe;o le mea lea ‘ua ‘ou fa‘afualoaina ai lo‘u alofa ‘iā te oe.
4 Le taupou o Isaraelu e,‘ou te toe ati a‘e ‘iā te oe, ‘ona atiina a‘e ai lea o oe,‘e te toe teuteu ‘iā te oe i au topa,‘e te alu atu fo‘i e siva fa‘atasi ma i latou o ē sisiva.
5 ‘E te toe totō tōvine i mauga o Samaria;e totō ai mea e tagata galue fanua ma latou fa‘atagaina ai.
6 Auā e o‘o i le aso e vala‘au aitagata leoleo i le mauga o Efaraima,“‘Inā tula‘i ia ‘outou,se‘i tatou ō a‘e i Siona i le ALI‘I lo tatou Atua.”
7 Auā o lo‘o fa‘apea ‘ona fetalai mai o le ALI‘I:‘Ia ‘outou ‘alalaga ma le ‘oli‘oli ‘iā Iakopo,ma ‘ia ‘outou ‘alalaga, i le nu‘u e sili.‘Inā fa‘ailoa atu ia, ‘ia ‘outou vivi‘i atu,ma ‘ia ‘outou fai atu, “Le ALI‘I e,‘ia e fa‘aola i lou nu‘u, o ē ‘ua totoe ‘iā Isaraelu.”
8 Fa‘auta, ‘ou te ‘aumaia i latou a‘i le nu‘u i le itū i matū,ma ‘ou fa‘apotopoto ‘iā te i latou a‘i tulu‘iga o le lalolagi.E fa‘atasi fo‘i ma i latou le tauaso ma le pipili,o le fafine ‘ua tō e fa‘atasi ma le fafine o le a fānau.E toe fo‘i mai ‘i‘inei le fa‘apotopotoga e to‘atele lava.
9 Latou te ō mai ma le tagi,‘ou te ta‘ita‘iina fo‘i i latou o latou ‘ai‘oi mai.‘Ou te ‘aumaia i latou i vaitafe i le ala sa‘o,latou te lē tausuai ai; auā o a‘u,o le tamā a‘u o Isaraelu, o Efaraima fo‘i o la‘u ulumatua ia.
10 ‘Inā fa‘alogologo mai ia i le afioga a le ALI‘I,‘Outou nu‘u e, ma ‘ia ‘outou ta‘u atu ai i nu‘u tu matāfaga e mamao,‘ia fa‘apea atu, “O lē na fa‘ata‘ape‘apeina Isaraelu,na te fa‘apotopotoina i latou,ma leoleo ‘iā te i latou e pei o le leoleo mamoe i lona lafu.”
11 Auā ‘ua lavea‘iina Iakopo e le ALI‘I,‘ua na fa‘atauina fo‘i o ia a‘i le lima o lē ‘ua sili lona malosi ‘iā te ia.
12 E ō mai fo‘i i latou ma latou ‘alalaga fiafia i le mea maualuga o Siona,latou te gasolo ane i mea lelei a le ALI‘I,‘ia maua ai le saito, ma le uaina, ma le suāu‘u,o tama‘i mamoe fo‘i, ma tama‘i povi.O latou loto fo‘i e pei o se fa‘ato‘aga‘ua fa‘asūsūina; e lē toe vaivai lava i latou.
13 ‘Ona ‘oli‘oli ai lea o le taupou i le siva,o taulele‘a fo‘i fa‘atasi ma toeaina.‘Ou te liua fo‘i lo latou fa‘anoanoa i le fiafia,ma ‘ou fa‘amatalaloto ‘iā te i latou,‘ou te fa‘afiafia ‘iā te i latou sa tigā i latou.
14 ‘Ou te fa‘amalilie mana‘o o le ‘au ositaulaga i mea lololo,e malie fo‘i lo‘u nu‘u i a‘u mea lelei, o lo‘o fetalai mai ai le ALI‘I.
15 O lo‘o fa‘apea ‘ona fetalai mai o le ALI‘I:‘Ua lagona le leo i Rama, o le auega,o le tagi lotulotu lava.‘Ua tagi Rasela ‘ona o lana fānau,e lē mafai fo‘i ‘ona fa‘anāina o ia ‘ona o lana fānau,auā ‘ua leai i latou.
16 O lo‘o fa‘apea ‘ona fetalai mai o le ALI‘I:Sōia ‘e te tagi, ‘aua fo‘i le tafe ifo o loimata i ou mata;auā o lo‘o fetalai mai le ALI‘I,e fai le taui a lau galuega,e toe fo‘i mai lava i latou a‘i le nu‘u o ē ita mai.
17 E fai fo‘i le fa‘amoemoe i lou i‘uga,‘ua fetalai mai ai le ALI‘I,e toe fo‘i mai lava lau fānau i lo latou lau‘ele‘ele.
18 ‘Ua ‘ou fa‘alogo lava ‘iā Efaraima ‘ua fa‘anoanoa o ia, ‘ua fa‘apea,“‘Ua e a‘oa‘i mai ‘iā te a‘u,‘ua a‘oa‘iina fo‘i a‘u, e pei o le povi ‘ua lē a‘oa‘oina;‘ia e fa‘aliliuina a‘u, ‘ona liliu ai lea o a‘u;auā o oe, le ALI‘I e, o lo‘u Atua oe.
19 Auā na fa‘aliliuina a‘u, mulimuli ane,‘ona ‘ou salamō ai lea.Na a‘oa‘oina a‘u, mulimuli ane,‘ona ‘ou pōpō ai lea i lo‘u vae;na a‘u mā, ma a‘u māsiasi,auā na a‘u tau‘ave le luma na fai ‘ina o taule‘ale‘a o a‘u.”
20 O le atali‘i pele ‘ea Efaraima ‘iā te a‘u?O le tama ‘ea ia e fiafia i ai?Auā talu ‘ina ‘ou tautala ‘iā te ia,‘ua ‘ou matuā mānatunatu pea ‘iā te ia.O le mea lea ‘ua tagi ai lo‘u loto ‘iā te ia;‘ou te matuā alofa lava ‘iā te ia,o lo‘o fetalai mai ai le ALI‘I.
21 ‘Ana fa‘atūina ia mo oe ni fa‘ailoga i le ala,‘inā fa‘atū ia mo oe ni la‘au.‘Ia fa‘asaga lou loto i le ala tele,o le ala lava na e alu atu ai.‘Inā fo‘i mai ia, le taupou o Isaraelu e,‘inā fo‘i mai ia i ou ‘a‘ai nei.
22 ‘E te fealualua‘i se‘ia afea,oe na le tama fafine liliu ‘ese?Auā ‘ua faia e le ALI‘I le mea fou i le lalolagi,e si‘osi‘oina le tane e le fafine.
23 O lo‘o fa‘apea ‘ona fetalai mai o le ALI‘I o ‘au, le Atua o Isaraelu: E toe faia e i latou lenei ‘upu i le nu‘u o Iuta ma ona ‘a‘ai, pe a ‘ou fa‘afoisia mai lo latou tāfeaga.“‘Ia fa‘amanuia le ALI‘I ‘iā te oe le fale e i ai le amiotonu,o le mauga pa‘ia.”
24 E nonofo ai fo‘i Iuta ma ona ‘a‘ai uma fa‘atasi, o tagata galue fanua ma ē feoa‘i ma lafu.
25 Auā ‘ua ‘ou fa‘amalie i le tagata ‘ua lailoa, ‘ua ‘ou fa‘amalilieina loto vaivai uma.
26 ‘Ona ‘ou ala ai lea ma ‘ou va‘ai, ‘ua malie lava a‘u i a‘u moe.
27 O lo‘o fetalai mai le ALI‘I, fa‘auta, e o‘o lava i ona aso ‘ou te totōina ai le fua o tagata ma le fua o manu i le ‘āiga o Isaraelu ma le ‘āiga o Iuta.
28 E pei ‘ona ‘ou lamalama ‘iā te i latou, ‘ina ‘ia ‘ou lia‘iina ma lepetia, ‘ia ‘ou sōloia fo‘i ma fa‘aumatia, ma fa‘atigāina; e fa‘apea fo‘i ‘ona ‘ou leoleo ‘iā te i latou, ‘ia ‘ou atiina a‘e ma totōina, ‘ua fetalai mai ai le ALI‘I.
29 E lē toe fai mai i latou i ia ona po:“‘Ua ‘aina e tama o vine moto,‘ae māgiagia ai nifo o le fānau.”
30 ‘Ae ta‘itasi le tagata ma oti ona o ana agasala; o tagata uma ‘ua ‘a‘ai vine moto, e ta‘itasi ma māgiagia ai ona lava nifo.
31 O lo‘o fetalai mai le ALI‘I, fa‘auta, e o‘o i ona aso ‘ou te osia ai le feagaiga fou ma le ‘āiga o Isaraelu ma le ‘āiga o Iuta.
32 E lē pei o le feagaiga na ‘ou osia ma o latou tamā i le aso na ‘ou tago ai i o latou lima e ‘aumaia ai i latou mai le nu‘u o Aikupito; o la‘u feagaiga lea na latou solia, o a‘u fo‘i na ‘ou ‘ino‘ino ai ‘iā te i latou, ‘ua fetalai mai ai le ALI‘I;
33 a o lenei le feagaiga ‘ou te osia ma le ‘āiga o Isaraelu, pe a mavae ia aso, o lo‘o fetalai mai ai le ALI‘I, ‘ou te tu‘uina la‘u tulafono i totonu ‘iā te i latou, ma ‘ou tusi ai i o latou loto; e fai fo‘i a‘u mo latou Atua, o i latou fo‘i e fai mo‘u nu‘u.
34 E lē toe a‘oa‘o atu fo‘i le tagata i lē la te tuā‘oi ma le tagata i lona uso, e fa‘apea atu, “‘Ia ‘outou iloa le ALI‘I;” auā e iloa a‘u e i latou uma lava, o tagata nu‘u ‘atoa ma ali‘i, o lo‘o fetalai mai ai le ALI‘I; auā ‘ou te fa‘amāgalo ‘iā latou amio leaga ma ‘ou lē toe manatua a latou agasala.
35 O lo‘o fa‘apea ‘ona fetalai mai o le ALI‘I,o le ‘ua tu‘uina le lā e fai ma malamalama i le ao.O tulafono fo‘i i le masina ma fetū e fai ma malamalama i le po;o lē e laolao ai le sami pe a ū mai ona peau;o le ALI‘I o ‘au, o lona suafa lava lea.
36 ‘Āfai e mavae ia tulafono a‘i o‘u luma,‘ua fetalai mai ai le ALI‘I,‘ona mavae ai lea o le fānau a Isaraelu,‘ia lē toe fai ma nu‘u i o‘u luma e fa‘avavau.
37 O lo‘o fa‘apea ‘ona fetalai mai o le ALI‘I:‘Āfai e mafai ‘ona fuatia le lagi i lugā,‘āfai fo‘i e mafai ‘ona su‘esu‘eina o fa‘avae o le lalolagi i lalō,‘ona ‘ou lafoa‘iina lea o le fānau uma a Isaraelu‘ona o mea uma ‘ua latou faia.‘Ua fetalai mai ai le ALI‘I.
38 Fa‘auta, e o‘o i ona aso, o lo‘o fetalai mai ai le ALI‘I, e fa‘atūina ai le ‘a‘ai mo le ALI‘I, e āfua mai i le ‘olo o Hananiali e o‘o atu i le faitoto‘a o le tulimanu.
39 E toe alu atu le maea e fua a‘i, e ui tonu atu i luga o le mauga o Karepa, e fa‘ata‘amilo atu fo‘i i Koata.
40 E fa‘apa‘iaina fo‘i mo le ALI‘I le vanu uma ‘ua i ai tino o tagata oti ma le lefulefu ma fanua uma, e o‘o i le alia o Ketarono, e o‘o fo‘i i le tulimanu o le faitoto‘a o solofanua i sasa‘e; e lē toe lia‘iina ‘ia, e lē toe sōloia fo‘i e o‘o i le fa‘avavau.#