1 ‘Ua fa‘alatalata mai ali‘i uma na ‘ave ‘au, ma Ioanana le atali‘i o Karea ma Iaasenaia le atali‘i o Hosaia ma le nu‘u uma, o tagata nu‘u ‘atoa ma ali‘i,
2 ma latou fai mai ‘iā Ieremia le perofeta, “Se‘i pa‘ū atu i ou luma la matou fa‘atoga, ma ‘ia e tatalo i le ALI‘I lou Atua mo i matou, o i matou nei uma o ē totoe; auā o i matou o totoe e to‘aitiiti, sa to‘atele, e pei ‘ona sisila ou fofoga ‘iā te i matou;
3 ‘ina ‘ia fa‘asino mai ‘iā te i matou e le ALI‘I lou Atua se ala matou te sāvavali ai ma se mea matou te faia.”
4 ‘Ona fai atu ai lea o Ieremia le perofeta ‘iā te i latou, “‘Ua ‘ou fa‘alogo lava, fa‘auta mai, ‘ou te tatalo i le ALI‘I lo ‘outou Atua e tusa ma a ‘outou ‘upu; o ‘upu uma fo‘i e tali mai ai le ALI‘I ‘iā te ‘outou ‘ou te ta‘u atu ai ‘iā te ‘outou; ‘ou te lē natia se ‘upu ‘iā te ‘outou.”
5 ‘Ona latou fai mai ai lea ‘iā Ieremia, “‘Ia fai le ALI‘I ma molimau moni ma le fa‘amaoni ‘iā te i tatou, pe ‘āfai matou te le faia lava e tusa ma mea uma e ‘auina mai ai oe e le ALI‘I lou Atua ‘iā te i matou.
6 Pe lelei, pe leaga, matou te fa‘alogo lava i le si‘ufofoga o le ALI‘I lo tatou Atua, matou te ‘auina atu ai oe ‘iā te ia; ‘ina ‘ia manuia i matou pe a matou fa‘alogo i le si‘ufofoga o le ALI‘I lo tatou Atua.”
7 ‘Ua mavae po e sefulu, ‘ona o‘o mai ai lea o le afioga a le ALI‘I ‘iā Ieremia.
8 ‘Ona vala‘au ai lea o ia ‘iā Ioanana le atali‘i o Karea ma ali‘i uma ‘ua ‘iā te ia na ‘ave ‘au ma le nu‘u uma, o tagata nu‘u ‘atoa ma ali‘i;
9 ‘ua fai atu fo‘i o ia ‘iā te i latou, “O lo‘o fa‘apea ‘ona fetalai mai o le ALI‘I, le Atua o Isaraelu, o lē na ‘outou ‘auina atu ai a‘u e momoli atu la ‘outou fa‘atoga i ona luma;
10 ‘āfai tou te nonofo pea i lenei nu‘u, ‘ona ‘ou atiina a‘e lea o ‘outou, ‘ae ‘ou te lē lepetia; ‘ou te totōina fo‘i ‘outou, ‘ae ‘ou te lē lia‘iina; auā ‘ua ‘ou salamō i le malaia ‘ua ‘ou faia ‘iā te ‘outou.
11 ‘Aua tou te fefefe i le tupu o Papelonia, o lē ‘ua ‘outou fefefe i ai; ‘aua lava tou te fefefe ‘iā te ia, o lo‘o fetalai mai ai le ALI‘I; auā ‘ou te ‘iā te ‘outou e fa‘aola ‘iā te ‘outou ma lavea‘i ‘iā te ‘outou a‘i lona lima.
12 ‘Ou te alofa ‘iā te ‘outou, e alofa mai ai o ia ‘iā te ‘outou ma fa‘afoisia ‘outou i lo ‘outou lau‘ele‘ele.
13 ‘Ae ‘āfai tou te fai mai, ‘Matou te lē nonofo i lenei nu‘u;’ e lē fa‘alogo fo‘i ‘outou i le si‘ufofoga o le ALI‘I lo ‘outou Atua,
14 o lo‘o fa‘apea ‘outou, ‘E leai lava; ‘ae matou te ō i le nu‘u o Aikupito, matou te lē iloa ai tau‘a ma matou le lagona ai le leo o le pū, matou te le oge fo‘i i mea e ‘ai; matou te nonofo fo‘i i lea mea;’
15 o le mea lea ‘ia ‘outou fa‘alogologo mai ai nei i le afioga a le ALI‘I, o ‘outou o ē totoe o Iuta, o lo‘o fa‘apea ‘ona fetalai mai o le ALI‘I o ‘au, le Atua o Isaraelu, ‘Āfai tou te matuā fa‘asaga ‘outou e ō atu i Aikupito ma ‘outou ō atu ai e āumau ai;
16 ‘ona maua ai lea o ‘outou e le pelu ‘ua ‘outou matata‘u ai i lea mea, o le nu‘u o Aikupito lava; o le oge fo‘i ‘ua ‘outou atuatuvale ai, e maua ai lava ‘outou i lea mea, o Aikupito lava; tou te oti fo‘i i lea mea.
17 E fa‘apea tagata uma latou te fa‘asaga e ō atu i Aikupito, e āumau ai i lea mea; e oti i latou i le pelu ma le oge ma le fa‘ama‘i; e leai so latou e toe, pe sao i le malaia ‘ou te fa‘ao‘o ai i luga ‘iā te i latou.
18 “Auā o lo‘o fa‘apea ‘ona fetalai mai o le ALI‘I o ‘au, le Atua o Isaraelu: E pei ‘ona ‘ou liligi ifo lo‘u tigā ma lo‘u ita i luga o ē sa nonofo i Ierusalema, e fa‘apea fo‘i ‘ona ‘ou liligi ifo lo‘u ita i luga ‘iā te ‘outou, pe a ō atu ‘outou i Aikupito; e fai fo‘i ‘outou ma fa‘afanoga ma mea e ofo ai, e fai a‘i fo‘i fetu‘u, ma luma; e lē toe iloa fo‘i e ‘outou lenei mea.
19 ‘Ua fetalai mai le ALI‘I ‘iā te ‘outou o ē totoe o Iuta, ‘Aua tou te ō i Aikupito; ‘ia ‘outou iloa lava, ‘ua ‘ou matuā fai atu ‘iā te ‘outou i le aso nei.
20 Auā ‘ua sesē ‘outou tou te tigāina ai, ‘ina ‘ua ‘outou ‘auina atu o a‘u i le ALI‘I lo ‘outou Atua, ‘ua fa‘apea mai, ‘‘Inā tatalo ia mo i matou i le ALI‘I lo tatou Atua; e pei o mea uma fo‘i e fetalai mai ai le ALI‘I lo tatou Atua, ‘ia fa‘apea ‘ona e ta‘u mai ai ‘iā te i matou, ‘ona matou faia lea.’
21 ‘Ua ‘ou ta‘u atu ai fo‘i ‘iā te ‘outou i le aso nei; ‘ae peita‘i ‘ua ‘outou lē fa‘alogo i le si‘ufofoga o le ALI‘I lo ‘outou Atua, i se mea e tasi na ‘auina mai ai a‘u e ia ‘iā te ‘outou.
22 O lenei, ‘ia ‘outou iloa lava, e oti ‘outou i le pelu, ma le oge ma le fa‘ama‘i, i le mea tou te fia ō atu i ai, e āumau ai.”