1 O le afioga a le ALI‘I na o‘o ia Ieremia, ‘ina o ‘a‘auina atu ‘iā te ia e le tupu o Setekaia o Pasura le atali‘i o Malekia, ‘atoa ma Sefanaia le atali‘i o Maaseia le ositaulaga, ‘ua fa‘apea atu,
2 “Se‘i e fesili atu i le ALI‘I mo i tatou; auā o lo‘o ‘ua si‘i mai le tau‘a ‘iā te i tatou e Nepukanesa le tupu o Papelonia; atonu e faia e le ALI‘I ‘iā te i tatou e tusa ma ona vāvega uma, ‘ina ‘ia alu ‘ese ai o ia ‘iā te i tatou.”
3 ‘Ona fai mai ai lea o Ieremia ‘iā te i latou: ‘Ia fa‘apea ‘ona ‘outou fai atu ‘iā Setekaia:
4 O lo‘o fa‘apea ‘ona fetalai mai o le ALI‘I le Atua o Isaraelu: Fa‘auta, ‘ou te fa‘aliliu‘eseina ‘au‘upega o le tau‘a o i o ‘outou lima, ‘ua ‘outou tau a‘i ma le tupu o Papelonia ma tagata o Kaletaia, o ē vagaia ‘outou i tuāpā ma ‘ou fa‘apotopoto ‘iā te i latou i totonu o lenei ‘a‘ai.
5 O a‘u nei fo‘i, ‘ou te tau ma ‘outou i le lima fa‘aloaloa ma le lima malosi, o le tigā fo‘i ma le ita, ma le ita tele.
6 ‘Ou te taia e o nonofo i lenei ‘a‘ai, o tagata ‘atoa ma manu, e oti i latou i le fa‘ama‘i tele.
7 O lo‘o fetalai mai ai le ALI‘I: E mulimuli ane ‘ou te tu‘uina atu Setekaia le tupu o Iuta ma ana ‘au‘auna ma le nu‘u ma ē o totoe i lenei ‘a‘ai i le fa‘ama‘i ma le pelu ma le oge, i le lima o Nepukanesa le tupu o Papelonia ma lima o ē ita ‘iā te i latou, ma lima o ē sā‘ili‘ili ‘iā te i latou ‘ia oti; e fasia i latou i le pelu, e lē fa‘asaoina e ia o i latou, e lē fa‘apelepele, e le alofa lava.
8 ‘E te fai atu fo‘i i lenei nu‘u: O lo‘o fa‘apea ‘ona fetalai mai o le ALI‘I, Fa‘auta, ‘ou te tu‘uina atu i o ‘outou luma le ala o le ola ma le ala o le oti.
9 O lē nofo i lenei ‘a‘ai e oti o ia i le pelu ma le oge ma le fa‘ama‘i; a o lē alu atu ma vavae atu i tagata o Kaletaia o ē vagaia ‘outou, e ola o ia, e ‘avea fo‘i lona ola ma ana vete.
10 Auā ‘ou te fa‘asaga atu i lenei ‘a‘ai ‘ia leaga ai, ‘ae lē ‘ina ‘ia manuia ai, o lo‘o fetalai mai ai le ALI‘I; e tu‘uina atu ai i le lima o le tupu o Papelonia, e susunuina fo‘i e ia i le afi.
11 A ‘ia e fai atu i le ‘āiga o le tupu o Iuta: ‘Inā fa‘alogologo ia ‘outou i le afioga a le ALI‘I:
12 Le ‘āiga o Tavita e, o lo‘o fa‘apea ‘ona fetalai mai o le ALI‘I:‘Ia faia le fa‘amasinoga i le taeaoma ‘ia lavea‘iina lē ‘ua faoa ana meaa‘i le lima o le tagata sauā,‘ina ne‘i alu atu lo‘u ita e pei o le afi ma mū ai,‘ae lē mafai ‘ona tineia e se tasi, ‘ona o le leaga o a ‘outou amioga.
13 Fa‘auta, o oe lē nofo i le vanu,o le papa o i le mea laugatasi, ‘ua ‘ou tigā ‘iā te oe,o lo‘o fetalai mai ai le ALI‘I;o ē fai ane, “Po o ai ‘ea e ō ifo e tau ma i tatou? po o ai fo‘i e ulufale mai i o tatou fale?”
14 ‘Ou te taui atu ‘iā te ‘outou e tusa ma le fua o a ‘outou amioga,o lo‘o fetalai mai ai le ALI‘I;‘ou te fa‘amūina fo‘i le afi i lona vao,e fa‘aumatia ai fo‘i ona itū uma.#