1 Fai mai: ‘Āfai e molia e se tagata lana avā,ma ‘ua alu ‘ese o ia ‘iā te ia,‘ae fai ma avā a se tasi,e toe alu atu ‘ea o ia ‘iā te ia?E lē matuā leaga ai ‘ea lenā nu‘u?A o oe, ‘ua e talitane i tane e to‘atele,a ‘ia e toe fo‘i mai ‘iā te a‘u, ‘ua fetalai mai ai le ALI‘I.
2 ‘Inā fa‘asaga a‘e ia ou mata i mauga tula ma va‘ava‘ai,po o ifea ‘ea se mea ‘ua e le mulilua ai?‘Ua e lamalama i ala mo i latou,e pei o se tagata Arapi i le vao;‘ua leaga ‘iā te oe le nu‘u i lou talitane ma lau amio leaga.
3 O le mea lea ‘ua tāofia ai le timu,‘ua leai fo‘i ni timuga mulimuli;a ‘ua ‘iā te oe le muaulu o le fafine talitane,e lē mafaia ‘ona fa‘amāina o oe.
4 ‘E te lē vala‘au mai ‘ea ‘iā te a‘u e amata nei lava,“Lo‘u tamā e, o oe lava lo‘u ta‘ita‘i ‘ina o ‘ou teine muli?
5 E fa‘amoemoe ‘ea lona to‘asā e fa‘avavau?Pe na te tausia pea lava i ai?”Fa‘auta fo‘i, ‘ua e tautala,‘ua e faia fo‘i mea leaga ma e fa‘amalosi i ai.
6 Na fetalai mai le ALI‘I ‘iā te a‘u i ona po o Iosia le tupu: Po ‘ua e iloa ‘ea le mea ‘ua faia e Isaraelu, le ‘ua liliu ‘ese? ‘Ua alu ia i luga o mauga maualuluga uma ma lalo ifo o la‘au lauolaola uma ma ‘ua mulilua ai.
7 Na ‘ou fai atu fo‘i ‘ina ‘ua uma ‘ona ia faia o ia mea uma, “‘Inā e toe fo‘i mai ia ‘iā te a‘u;” ‘ae le‘i toe fo‘i mai lava ia, o lona uso fa‘a‘ole‘ole fo‘i o Iuta na ia iloa atu ai.
8 ‘Ona ‘ou iloa lea, e ui lava i na mea uma na mulilua ai Isaraelu le ‘ua liliu ‘ese, na ‘ou aleia ai o ia, ma ‘ou avatu ‘iā te ia le tusi alei, a ‘ua lē fefe lava lona uso fa‘a‘ole‘ole o Iuta, a ‘ua alu ia ‘ua mulilua fo‘i o ia.
9 ‘Ona o le leaga o lona mulilua ‘ua ia fa‘aleaga ai le nu‘u ma ‘ua mulilua i ma‘a ma la‘au.
10 ‘Ae ui lava i ia mea uma, e le‘i fo‘i mai ‘iā te a‘u o lona uso fa‘a‘ole‘ole o Iuta ma lona loto ‘atoa, a ‘ua pepelo o ia, o lo‘o fetalai mai ai le ALI‘I.
11 ‘Ua fetalai mai le ALI‘I ‘iā te a‘u: O Isaraelu ‘ua liliu ‘ese ‘ua sili o ia ona amiotonu ‘iā Iuta le ‘ua fa‘a‘ole‘ole.
12 ‘Inā alu ia ma e tala‘i atu ia ‘upu i le itū i matū, ‘ia fa‘apea atu:Isaraelu e, le ‘ua liliu ‘ese, ‘inā fo‘i mai ia,o lo‘o fetalai mai ai le ALI‘I:‘Ou te lē va‘ai ma le ita ‘iā te ‘outou;auā ‘ou te alofa lava a‘u,o lo‘o fetalai mai ai le ALI‘I,E lē tumau lo‘u ita e fa‘avavau.
13 Tau ‘ina e iloa lau agasala ‘ua e fouvale ai i le ALI‘I lou Atua,‘ua e fealua‘i i tane ‘ese i lalo o la‘au lauolaola uma;‘ua e lē fa‘alogo mai fo‘i i lo‘u leo,o lo‘o fetalai mai ai le ALI‘I.
14 Le fānau liliu ‘ese e, ‘inā fo‘i mai ia,o lo‘o fetalai mai ai le ALI‘I;Auā e ui lava ‘ina ‘ou ‘ino‘ino ‘iā te ‘outou,a ‘ou te ‘avea ‘outou, e ta‘itasi i ‘a‘aima le ta‘ito‘alua i ‘āiga ma a‘u ‘aumaia ‘outou i Siona.
15 ‘Ou te avatu fo‘i ‘iā te ‘outou leoleo mamoe e tatau ma lo‘u loto, latou te fafaga ‘iā te ‘outou i le poto ma le fa‘autauta.
16 A o‘o ‘ina fa‘ato‘ateleina ‘outou ma fa‘auluolaina i le nu‘u i ia ona po, o lo‘o fetalai mai ai le ALI‘I, ‘ona latou le toe fai ane lea, “O le ‘atola‘au o le feagaiga a le ALI‘I.” E lē toe manatua; e lē toe ta‘ua fo‘i; e le asiasia; e lē toe faia lava.
17 O ia ona po e ta‘ua ai e i latou o Ierusalema O le nofoāli‘i o le ALI‘I; e potopoto nu‘u ‘ese uma i le suafa o le ALI‘I i Ierusalema; latou te lē toe sāvavali fo‘i e tusa ma le finau vale o latou loto leaga.
18 O ona po ia e sāvavali fa‘atasi ai le ‘āiga o Iuta ma le ‘āiga o Isaraelu, e ō mai fa‘atasi fo‘i i latou mai le nu‘u i le itū i matū, i le nu‘u na ‘ou foa‘iina atu e fai mo ‘outou tamā.
19 A o a‘u, na ‘ou fa‘apea atu,E fa‘apefea ‘ona ‘ou fa‘atasia oe ma le fānau,ma avatu ‘iā te oe le nu‘u lelei,o le tofi e matagofie i atunu‘u?‘Ona ‘ou fa‘apea ai lea,‘E te vala‘au mai ‘iā te a‘u, Lo‘u tamā e;‘e te lē toe liliu ‘ese fo‘i ‘iā te a‘u.
20 E moni, e pei o le fafine ona amio fa‘a‘ole‘ole i lana tane,‘ua fa‘apea ona amio fa‘a‘ole‘ole ‘iā te a‘u o ‘outou, le ‘āiga o Isaraelu e,o lo‘o fetalai mai ai le ALI‘I.
21 Na lagona le leo i luga o mauga tula,o le tagi ma le ‘ai‘oi atu o le fānauga a Isaraelu;auā na latou fa‘api‘opi‘o lo latou ala,‘ua galo ‘iā te i latou o le ALI‘I lo latou Atua.
22 ‘Inā toe fo‘i mai ia ‘outou, le fānau liliu ‘ese e,‘ou te fa‘amālōlōina o ‘outou liliu ‘ese.“Silasila mai ‘iā te i matou,matou te ō atu ‘iā te oe.Auā o oe le ALI‘I lo matou Atua.
23 E moni, e lē aogā ‘ona fa‘atuatua,i mauga ma le tele ō atu mauga.E moni o lo‘o i le ALI‘I lo matou Atua‘ona fa‘aolaina o Isaraelu.
24 “‘Ua ‘aina e le mea e māsiasi ai o mea sa tautigāina ai o matou tamā talu ‘ina o matou o taulele‘a; o a latou lafu mamoe ma a latou lafu povi, o latou atali‘i ma o latou afafine.
25 ‘Ua matou ta‘o‘oto ma lo matou māsiasi, ‘ua ufitia lava i matou i lo matou mā; auā ‘ua matou agasala i le ALI‘I lo matou Atua, o i matou ‘atoa ma o matou tamā, talu ‘ina o matou o taulele‘a ‘ua o‘o lava i nei ona po, e le‘i fa‘alogo fo‘i i matou i le si‘ufofoga o le ALI‘I lo matou Atua.”#