1 O lo‘o fetalai mai le ALI‘I, o ia ona po e ‘aumai ai ivi o tupu o Iuta ma ivi o ona ali‘i ma ivi o ositaulaga ma ivi o perofeta ma ivi o ē nonofo i Ierusalema a‘i o latou tu‘ugamau;
2 latou te folasia ai fo‘i i le lā ma le masina ma ‘au uma a le lagi, o mea na latou loto i ai ma latou ‘au‘auna i ai ma latou mulimuli atu i ai ma latou sā‘ili‘ili i ai ma latou ifo i ai; e le aofia ia ivi, e le tanumia fo‘i, ‘ae fai ma otaota i luga o le lau‘ele‘ele.
3 E sili le fia oti i le fia ola i ē totoe uma, o ē totoe o lenei ‘āiga leaga, o ē totoe i mea uma o le a ‘ou tulia ai i latou, o lo‘o fetalai mai ai le ALI‘I o ‘au.
4 ‘Ia e fai atu fo‘i ‘iā te i latou, O lo‘o fa‘apea ‘ona fetalai mai o le ALI‘I: Latou te pa‘u‘ū ‘ea, ‘ae lē toe tutū mai? E liliu ‘ese ‘ea o ia, ‘ae lē toe liliu mai?
5 Se a ‘ea le mea ‘ua liliu ‘ese ai lenei nu‘u o Ierusalema ma le liliu ‘ese e lē aunoa? ‘Ua latou tāofi mau i mea pepelo ma latou lē mafafai ‘ona toe liliu mai.
6 ‘Ua liliu atu o‘u taliga ma ‘ou fa‘alogologo atu; ‘ua latou lē tautala fa‘amaoni; e leai se tagata ‘ua salamō i lana amio leaga, ‘ua fa‘apea mai, “Se a le mea ‘ua ‘ou faia?” ‘Ua latou ta‘itasi ma liliu atu i o latou taufetuliga, e pei ‘ona oso atu o le solofanua i le tau‘a.
7 ‘Ua iloa e le kasita i le lagi ona lava po; o le manutagi fo‘i ma le pe‘ape‘a ma le akuru, ‘ua latou tausia le tau latou te ō mai ai; a ‘ua lē iloa e lo‘u nu‘u le fa‘amasinoga a le ALI‘I.
8 Pe fa‘apefea ‘ona ‘outou fai mai, “‘Ua popoto i matou, ‘ua ‘iā te i matou fo‘i le tulafono a le ALI‘I?” Fa‘auta, e moni, ‘ua na faia fua lava; o le peni a le tusi‘upu ‘ua fai fua lea.
9 ‘Ua fa‘amāina ē popoto, ‘ua matata‘u i latou, ma ‘ua maua; fa‘auta, ‘ua latou lafoa‘i le afioga a le ALI‘I; se a fo‘i se poto ‘ua ‘iā te i latou?
10 O le mea lea ‘ou te avatu ai a latou avā i nisi, ma o latou fanua i ē latou te tulia i latou; auā o tagatanu‘u ‘atoa ma ali‘i ‘ua matape‘ape‘a i ‘oloa i latou uma, o perofeta ‘atoa ma ositaulaga ‘ua amio pepelo i latou uma.
11 ‘Ua latou fofō fa‘atauva‘a le manu‘a o le tama fafine a lo‘u nu‘u, ‘ua fa‘apea ane, “E manuia, e manuia;” ‘ae leai se manuia.
12 ‘Ua latou mamā ‘ea ‘ona o le mea ‘inosia ‘ua latou faia? ‘ua matuā le mamā lava i latou, ‘ua latou lē iloa lava le māsiasi; o le mea lea e pa‘u‘ū ai i latou fa‘atasi ma ē ‘ua pa‘u‘ū; o ona po e asiasia ai i latou, latou te tausuai ai, o lo‘o fetalai mai ai le ALI‘I.
13 ‘Ou te matuā fa‘aumatia i latou, ‘ua fetalai mai ai le ALI‘I; e leai ni fuifui i le vine, e leai fo‘i ni mati i le mati, e mamae fo‘i lau; o mea fo‘i na ‘ou foa‘iina atu ‘iā te i latou e mavae ‘ese ia ‘iā te i latou.
14 Se a ‘ea le mea ‘ua tatou nofonofo ai? ‘Ia ‘outou potopoto ma tatou ō i ‘a‘ai nofo ‘olo ma tatou nofo fa‘alologo ai; auā o le ALI‘I lo tatou Atua ‘ua fa‘alologo ai i tatou, ‘ua na fa‘ainumia fo‘i i tatou i le vai ‘o‘ona, auā ‘ua tatou agasala i le ALI‘I,
15 Sa tatou fa‘atalitali i le manuia, ‘ae leai se lelei na maua; sa fa‘atalitali fo‘i i ona po e fa‘amālōlōina ai, fa‘auta fo‘i, o le mata‘u.
16 ‘Ua lagona mai i Tanu le fa‘afogifogi o ona solofanua; o le leo o le tagi o ona solofanua malolosi ‘ua gatete ai le lau‘ele‘ele uma; ‘ua o‘o mai fo‘i i latou, ‘ua latou fa‘aumatia le nu‘u ma mea ‘ua tumu ai, o le ‘a‘ai fo‘i ma ē nonofo ai.
17 Auā fa‘auta, ‘ou te ‘a‘auina atu ‘iā te ‘outou o gata, o gata uogo, e lē mafai ‘ona fa‘aoleoleina i latou, latou te feutia ‘outou, o lo‘o fetalai mai ai le ALI‘I.
18 ‘Ua fai lo‘u ‘oli‘oli ma fa‘anoanoaga i totonu ‘iā te a‘u,‘ua vaivai lo‘u loto i totonu ‘iā te a‘u.
19 Fa‘auta,o le leo o le ‘alaga o le tama fafine a lo‘u nu‘u a‘i nu‘u mamao.“E lē o i Siona ‘ea le ALI‘I?E lē o i ai ‘ea lona Tupu?”“Se a ‘ea le mea ‘ua latou fa‘a‘ono‘ono mai ai ‘iā te a‘u ‘iā latou tupua ‘ua ta,ma mea ‘ese e fa‘atauva‘a?”
20 “‘Ua mavae ona po o le seleselegāsaito,‘ua uma le tausaga vevela,‘ae lē fa‘aolaina i tatou.”
21 ‘Ua momomo lo‘u loto ‘ona ‘ua tu‘imomoia o le tama fafine a lo‘u nu‘u;‘ua ‘ou fa‘anoanoa; ‘ua maua a‘u i le femēmēa‘i.
22 E leai ‘ea ni pulu pasama i Kiliata? E lē o i ai ‘ea se foma‘i? Se a fo‘i le mea ‘ua lē fa‘amālōlōina ai le tama fafine a lo‘u nu‘u?#