1 ‘Ua fa‘alogologo Pasura, le atali‘i o Imere, le ositaulaga, o le matai sili ia i le fale o le ALI‘I, ‘ua vavalo Ieremia i ia ‘upu.
2 ‘Ona taia lea o le perofeta o Ieremia e Pasura, ma ‘ua tu‘uina o ia i la‘au fa‘amau sa i le faitoto‘a aupitoaluga o Peniamina, e lata ane i le fale o le ALI‘I.
3 ‘Ua o‘o i le taeao, ‘ona ‘aumaia lea e Pasura o Ieremia nai la‘au fa‘amau. ‘Ona fai atu lea o Ieremia ‘iā te ia, ‘Ua lē ta‘ua lou igoa e le ALI‘I o Pasura, ‘ae o “Makoru-misapipa.”
4 Auā o lo‘o fa‘apea ‘ona fetalai mai o le ALI‘I: Fa‘auta, ‘ou te faia oe ma mata‘u ‘iā te oe ma au uō uma; e oti i latou i le pelu a ē ita mai ‘iā te i latou, e iloa fo‘i e ou mata; ‘ou te tu‘uina atu fo‘i Iuta uma i le lima o le tupu o Papelonia, e tāfea fo‘i i latou e ia i Papelonia ma fasia i latou i le pelu.
5 ‘Ou te tu‘uina atu fo‘i le ‘oloa uma o lenei ‘a‘ai, ma mea uma o i ai sa tautigāina ai ma ‘oloa tāua uma o i ai ma ‘oa uma a tupu o Iuta ‘ou te tu‘uina atu lava i lima o ē ita mai ‘iā te i latou, latou te vetea, ma ‘avea ma la‘u atu ai i Papelonia.
6 A o oe, Pasura e, ma lou ‘au ‘āiga uma, e ō ‘outou i le tāfeaga; e o‘o fo‘i oe i Papelonia, ‘e te oti ai lava, e tanumia fo‘i oe i lea mea, o oe ma au uō uma, o i latou na e vavalo i ai i mea pepelo.
7 Le ALI‘I e, ‘ua e fa‘a‘ole‘ole ‘iā te a‘u,‘ona fa‘a‘ole‘oleina lea o a‘u;‘Ua sili ‘ona e malosi ‘iā te a‘u ma ‘ua e manumālō;‘ua fai a‘u ma mea e tapisa ai i aso uma,‘ua tauemu mai ‘iā te a‘u tagata uma.
8 Auā a ‘ou tautala atu, ‘ua ‘ou ‘alaga,‘ua ‘ou vala‘au, “O le sauā ma le fa‘atafunaga.”Auā ‘ua ‘avea le afioga a le ALI‘Ima mea e fa‘alumaina ai a‘u,ma tauemua i aso uma.
9 ‘Ona ‘ou fai atu lea, “‘Ou te lē ta‘uta‘uina o iama ‘ou le toe tautala i lona suafa.”A o lo‘u loto e peiseaī o se afi mumū sa i ai,‘ua punitia i o‘u ivi, ‘ua lailoa a‘u i ‘onosa‘i,‘ua ‘ou lē mafaia lava.
10 Auā ‘ua ‘ou fa‘alogo i le fa‘aleaga mai a le to‘atele:“‘Ua si‘omia, a‘u i le mata‘u,‘ua fai ane i latou. ‘Inā ‘outou ta‘uta‘uina atu o ia,matou te ta‘uta‘uina atu fo‘i o ia.”O tagata uma o a‘u uō e lamalama mai pea ‘iā te a‘u,‘ua fa‘apea “Atonu e fa‘aoleoleina o ia,ma tatou manumālō ‘iā te ia ma tatou taui ma sui ‘iā te ia.”
11 A ‘ua ‘iā te a‘u le ALI‘I e pei o le toa e mata‘utia;o le mea lea e tausuai ai e o tuliloa mai ‘iā te a‘u,e le manumālō i latou.E matuā fa‘amāina i latou; auā e le manuia i latou;e le fa‘agalogaloina lo latou māsiasi e fa‘avavau.
12 Le ALI‘I o ‘au e, o lē tofotofo i ē ‘ua amiotonu,o lē silasila i manatu ma loto.‘Ia ‘ou iloa lau taui ma sui ‘iā te i latou;auā ‘ua ‘ou fa‘aalia la‘u finauga ‘iā te oe.
13 ‘Inā pepese ia i le ALI‘I,‘ia ‘outou vivi‘i atu ia i le ALI‘I.Auā ‘ua lavea‘iina e ia ‘ia ola lē ‘ua mativa a‘i lima o ē amio leaga.
14 ‘Ia fa‘afanoina le aso na fānau mai ai a‘u.‘Aua le fa‘amanuiaina le aso na fānauina ai a‘u e lo‘u tinā.
15 ‘Ia fa‘afanoina le tagata,na avatu le tala i lo‘u tamā, ‘ua fa‘apea atu,“‘Ua fānau ‘iā te oe le tama tane;‘ua matuā fa‘afiafia ‘iā te ia.”
16 ‘Ia ‘avea lea tagata e pei o ‘a‘ai,na fa‘aumatia e le ALI‘I ma ‘ua lē salamō ai o ia.‘Ia fa‘alogo fo‘i o ia i le ‘alaga i le taeaoma le vāvāō i le tutonu o le la;
17 auā na lē fasiotia a‘u ‘ina o i le manava.Po ‘ua ‘avea lo‘u tinā ma tu‘ugamau ‘iā te a‘uma lona manava e tō pea e fa‘avavau.
18 Se a le mea na ‘ou sau ai mai le manava e iloa ai le tigā ma le fa‘anoanoa, e mavae ai fo‘i o‘u aso ma le mā?