1 O le afioga na o‘o mai ‘iā Ieremia mai le ALI‘I, a o tau ma Ierusalema ma ona ‘a‘ai uma o Nepukanesa le tupu o Papelonia ma lana itūtau‘a uma ma mālō uma o le lalolagi na ia pule i ai ma nu‘u uma, ‘ua fa‘apea mai,
2 O lo‘o fa‘apea ‘ona fetalai mai o le ALI‘I, le Atua o Isaraelu, “‘Inā alu ia ma fai atu ‘iā Setekaia le tupu o Iuta, ‘ia fa‘apea atu ‘iā te ia, O lo‘o fa‘apea ‘ona fetalai mai o le ALI‘I, Fa‘auta, ‘ou te tu‘uina atu lenei ‘a‘ai i le lima o le tupu o Papelonia, e susunuina ai fo‘i e ia i le afi;
3 o oe fo‘i ‘e te lē sao i lona lima, ‘ae pu‘ea lava oe ma tu‘uina i lona lima; e fesilafa‘i ‘oulua ma le tupu o Papelonia, lua te tautala fa‘afesaga‘i ma ia, ‘e te maliu atu fo‘i i Papelonia.
4 A ‘ia e fa‘afofoga mai i le afioga a le ALI‘I, Setekaia e, le tupu o Iuta; o lo‘o fa‘apea ‘ona fetalai mai o le ALI‘I ‘iā te oe, ‘E te lē maliu i le pelu;
5 ‘e te maliu ma le filemū; e pei ‘ona mūina o afi mo ou tamā, o tupu anamua sa muamua ‘iā te oe, e fa‘apea fo‘i ‘ona latou mūina o le afi mo oe; latou te taufaitagitu‘i fo‘i ‘ona o oe, e fa‘apea, ‘Auē! le ali‘i e!’ Auā ‘ua ‘ou fai atu le ‘upu, ‘ua fetalai mai ai le ALI‘I.”
6 ‘Ona fai atu ai lea o Ieremia le perofeta ‘iā Setekaia le tupu o Iuta ia ‘upu uma i Ierusalema,
7 ‘ina o tau le itūtau‘a a le tupu o Papelonia ma Ierusalema ma ‘a‘ai uma sa totoe i Iuta, o Lakisa ma Aseka; auā o ‘a‘ai nofo ‘olo ia sa totoe i ‘a‘ai o Iuta.
8 O le afioga na o‘o mai ‘iā Ieremia mai le ALI‘I, ‘ina ‘ua mavae ‘ona osia o le feagaiga e Setekaia le tupu ma le nu‘u uma sa i Ierusalema, e tala‘i atu ‘iā te i latou le sa‘olotoga;
9 ‘ia latou ta‘itasi ma tu‘usa‘olotoina lana ‘au‘auna tane ma lana ‘au‘auna fafine, o le tane Eperu ma le fafine Eperu; ‘ina ‘ia lē fa‘apologaina e so latou se tagata Eperu, lona uso.
10 ‘Ua fa‘alogo ali‘i uma ma le nu‘u uma na faia le feagaiga, ‘ia latou ta‘itasi ma tu‘usa‘olotoina, lana ‘au‘auna tane ma lana ‘au‘auna fafine, ‘ina ‘ia latou le toe fa‘apologaina i latou; ‘ona latou usiusita‘i ai lea, ma tu‘uina atu i latou ia ō.
11 ‘Ae mulimuli ane ‘ua latou toe fa‘afoisia mai ‘au‘auna tane ma ‘au‘auna fafine na latou tu‘usa‘olotoina; ma latou fa‘apologaina i latou e fai ma ‘au‘auna tane ma ‘au‘auna fafine.
12 ‘Ona o‘o mai ai lea o le afioga a le ALI‘I ‘iā Ieremia mai le ALI‘I, ‘ua fa‘apea mai,
13 O lo‘o fa‘apea ‘ona fetalai mai o le ALI‘I, le Atua o Isaraelu: O a‘u lava, na a‘u osia le feagaiga ma o ‘outou tamā i le aso na ‘ou ‘aumai ai i latou mai le nu‘u o Aikupito, o le mea sa nofo pologa ai, ‘ua fa‘apea,
14 “A ‘atoa tausaga e fitu, ‘ia ‘outou ta‘itasi ma tu‘uina atu e alu lona uso o le Eperu, o lē na fa‘atauina ‘iā te oe; e ‘au‘auna o ia ‘iā te oe i tausaga e ono, ‘ona e tu‘usa‘olotoina ai lea o ia.” ‘Ae le‘i fa‘alogo mai o ‘outou tamā ‘iā te a‘u, e le‘i ua‘i mai fo‘i o latou taliga.
15 O ‘outou fo‘i, na ‘outou liliu mai i ona po nei ma ‘outou faia le mea tonu i o‘u luma, i lo ‘outou tala‘i atu le sa‘olotoga o le tasi i le tasi; na ‘outou osia fo‘i le feagaiga i o‘u luma i le fale ‘ua ta‘ua ai lo‘u igoa.
16 A ‘ua ‘outou liliu ‘ese ma fa‘aleagaina lo‘u igoa, ma ta‘itasi ma fa‘afoisia mai lana ‘au‘auna tane ma lana ‘au‘auna fafine, na tu‘usa‘olotoina i la latou faitalia, ‘ua ‘outou fa‘apologaina i latou e fai ma ‘au‘auna tane ma ‘au‘auna fafine ‘iā te ‘outou.
17 O le mea lea o lo‘o fa‘apea ‘ona fetalai mai ai o le ALI‘I, ‘Ua ‘outou lē fa‘alogo mai ‘iā te a‘u e tala‘i atu le sa‘olotoga, o le tagata i lona uso ma le tagata i lē la te tuā‘oi; fa‘auta, ‘ua fetalai mai le ALI‘I, ‘Ou te tala‘i atu ‘iā te ‘outou le sa‘olotoga, i le pelu ma le fa‘ama‘i ma le oge; ‘ou te tu‘uina atu fo‘i ‘outou ‘ia fa‘aatuatuvaleina i mālō uma o le lalolagi.
18 ‘Ou te tu‘uina atu fo‘i ia tagata ‘ua solia la‘u feagaiga, o ē ‘ua lē fa‘ataunu‘uina ‘upu o le feagaiga na latou osia i o‘u luma, o le tama‘i povi na latou isiluaina ma latou ui ane i le vā o mea na isiluaina,
19 o ali‘i o Iuta ma ali‘i o Ierusalema, o eunuka, ma ositaulaga ma tagata uma o le nu‘u, na ui ane i le vā o le tama‘i povi na isiluaina;
20 ‘ou te tu‘uina atu lava i latou i lima o ē ita ‘iā te i latou ma lima o ē sā‘ili e fasioti ‘iā te i latou; o latou tino fo‘i ‘ua oti e fai ma mea e ‘ai i manu felelei, ma manu e tata‘a.
21 ‘Ou te tu‘uina atu fo‘i o Setekaia le tupu o Iuta, ma ali‘i ‘ua ‘iā te ia, i lima o ē ita ‘iā te i latou ma lima o ē sā‘ili e fasioti ‘iā te i latou ma lima o le itūtau‘a a le tupu o Papelonia, o ē ‘ua ō a‘e nai ‘iā te ‘outou.
22 Fa‘auta, ‘ou te fai atu, ‘ua fetalai mai le ALI‘I, ma ‘ou fa‘afoisia mai i latou i lenei ‘a‘ai; latou te si‘i i ai le tau‘a, latou le ā‘ea fo‘i ma susunuina i le afi; ‘ou te tu‘uina atu fo‘i o ‘a‘ai o Iuta, ‘ia fa‘atafunaina, ‘ia leai sē nofo ai.#