9 ‘Ua fa‘apea ‘ona fetalai mai o le ALI‘I, E fa‘apenā ‘ona ‘ou fa‘aleagaina le fa‘amaualuga o Iuta ma le fa‘amaualuga tele o Ierusalema.
10 O lenei nu‘u amio leaga, ‘ua lē mafafai i latou ‘ona fa‘alogo mai i a‘u ‘upu, ‘ua sāvavali ma le loto finau vale ma mulimuli atu i atua ‘ese, e ‘au‘auna ma ifo ‘iā te i latou, e ‘avea lava i latou e pei o lenei fusi, e lē aogā i se mea e tasi.
11 Auā e pei ‘ona pipi‘i le fusi i le sulugātiti o le tagata, sa fa‘apea ‘ona a‘u fa‘apipi‘i ‘iā te a‘u o le ‘āiga uma o Isaraelu ma le ‘āiga uma o Iuta, o lo‘o fetalai mai ai le ALI‘I; ‘ina ‘ia fai i latou mo‘u nu‘u, ‘ia fai fo‘i ma igoa ma vi‘iga ma matagofie; a ‘ua latou lē fa‘alogo mai.
12 O le ‘upu fo‘i lenei ‘e te fai atu ai ‘iā te i latou, O lo‘o fa‘apea ‘ona fetalai mai o le ALI‘I le Atua o Isaraelu: E fa‘atūtūmuina fagu uma i le uaina; latou te fai mai fo‘i ‘iā te oe, “E lē ‘ua matou matuā iloa ‘ea e fa‘atūtūmuina fagu uma i le uaina?”
13 ‘Ona e fai atu lea ‘iā te i latou, o lo‘o fa‘apea ‘ona fetalai mai o le ALI‘I: Fa‘auta, ‘ou te fa‘atūtūmuina i le ‘onā o i latou uma o ē nonofo i lenei nu‘u, o tupu o ē nonofo i le nofoāli‘i o Tavita, ‘atoa ma ositaulaga ma perofeta ma i latou uma o ē nonofo i Ierusalema.
14 ‘Ou te fa‘afeto‘ai i latou, o le tasi i le tasi, o tamā, fo‘i ‘atoa ma fānau, o lo‘o fetalai mai ai le ALI‘I. ‘Ou te lē fa‘apelepele ‘iā te i latou, pe fa‘asaoina, pe alofa atu, ‘ae fa‘aumatia i latou.
15 ‘Ia ‘outou fa‘alogologo mai ma ua‘i mai o ‘outou taliga;‘aua tou te fa‘amaualuga,auā ‘ua fetalai mai le ALI‘I.