11 ‘Ua fa‘apea mai le ALI‘I: E moni, ‘ou te lavea‘iina oe ‘ia e manuia ai; e moni, o a‘u lava e ala ai ‘ona fa‘atoga mai ‘iā te oe o lē ita mai, i ona po o le leaga ma ona po o le puapuagā.
12 E mafai ‘ea ‘ona gauia o le u‘amea, o le u‘amea mai le itū i matū ma le ‘apamemea?
13 O au mea e tamao‘āiga ai ma au ‘oloa ‘ou te tu‘uina atu ai e fai ma vete, e lē o le taui, ‘ae peita‘i ‘ona o au agasala uma i lou nu‘u uma.
14 ‘Ou te ta‘ita‘iina ē ‘ua ita ‘iā te oe i le nu‘u ‘ua e lē iloa; auā ‘ua tugia le afi i lo‘u ita, e mū ai i luga ‘iā te ‘outou.
15 Le ALI‘I e, ‘ua e silafia e oe;‘ia e manatua mai a‘u ma asiasi mai ‘iā te a‘u.‘Ia e taui atu ‘ona o a‘u i ē ‘ua fa‘asauā mai ‘iā te a‘u;o lou fa‘ato‘ato‘a ‘iā te i latou ‘aua le ‘ave‘eseina ai a‘u;‘ia e silafia ‘ua ‘ou ‘onosa‘i i le fa‘alumaina ‘ona o oe.
16 Na maua au afioga, ‘ona ‘ou ‘ai ai lea;sa ‘iā te a‘u lau afioga e fai ma mea e ‘oli‘oli ai ma fiafia ai lo‘u loto;auā ‘ua ta‘ua a‘u i lou suafa,le ALI‘I e, le Atua o ‘au.
17 ‘Ou te le‘i nofo i le fa‘apotopotoga o ē tauemu ma ‘ou le fiafia i ai;‘ua ‘ou nofo to‘atasi ‘ona o lou ‘a‘ao;auā ‘ua e fa‘atumuina a‘u i le ita.