10 Auā o mea pepelo ‘ua latou vavalo ai ‘iā te ‘outou, ‘ina ‘ia ‘avemamaoina ‘outou i lo ‘outou lau‘ele‘ele; ‘ia ‘ou tulia fo‘i ‘outou ma ia fa‘aumatia ‘outou.
11 A o le nu‘u, e tu‘uina o latou ua i le amo a le tupu o Papelonia ma ‘au‘auna ‘iā te ia, ‘ou te tu‘uina atu i latou ‘ia nofo pea i lo latou lau‘ele‘ele, o lo‘o fetalai mai ai le ALI‘I, latou te galulue ai ma latou nonofo ai.
12 Na a‘u fai atu fo‘i ‘iā Setekaia, le tupu o Iuta, e tusa ma ia ‘upu uma, ‘ua fa‘apea atu: ‘Ia ‘outou tu‘uina o ‘outou ua i le amo a le tupu o Papelonia ma ‘au‘auna ‘iā te ia ma lona nu‘u, ‘ia ola ai ‘outou.
13 Se a ‘ea le mea tou te fia oti ai, o oe ma lou nu‘u, i le pelu ma le oge ma le fa‘ama‘i, e pei ‘ona fetalai mai ai o le ALI‘I i le nu‘u e le ‘au‘auna i le tupu o Papelonia?
14 ‘Aua tou te fa‘afofoga i ‘upu a perofeta, o ē fai mai ‘iā te ‘outou, ‘ua fa‘apea mai, e lē fai ‘outou ma ‘au‘auna i le tupu o Papelonia; auā o mea pepelo ‘ua latou vavalo ai ‘iā te ‘outou.
15 Auā o lo‘o fetalai mai le ALI‘I, ‘ua ‘ou lē ‘a‘auina atu i latou, a ‘ua latou vavalo i le pepelo i lo‘u igoa; ‘ina ‘ia ‘ou tulia ‘outou ma ia fa‘aumatia ‘outou, o ‘outou ma perofeta o ē vavalo ‘iā te ‘outou.
16 Na ‘ou fai atu fo‘i i ositaulaga ma lenei nu‘u uma, ‘ua fa‘apea atu: O lo‘o fa‘apea ‘ona fetalai mai o le ALI‘I, ‘Aua tou te fa‘alogo i ‘upu a o ‘outou perofeta, o ē vavalo ‘iā te ‘outou, ‘ua fa‘apea mai, “Fa‘auta, e ta‘alise ‘ona toe ‘aumaia mai Papelonia o ipu o le fale o le ALI‘I;” auā o mea pepelo ‘ua latou vavalo ai ‘iā te ‘outou.