5 ‘Ia ‘outou ta‘u atu i Iuta ma ‘ia ‘outou fa‘ailoa atu i Ierusalema; ‘ia fa‘apea atu:‘Ia ilia le pū i le nu‘u, ‘ia ‘alalaga tele ma fai atu ai,“‘Inā fa‘apotopoto mai ia, se‘i tatou ō atu ia i ‘a‘ai nofo ‘olo.”
6 ‘Ia fa‘atūina le tagāvai i Siona;‘ia ‘outou sōsōla, ‘aua ne‘i tutū mai;auā o a‘u ‘ou te ‘aumaia le malaia mai le itū i matū ma le olopalaga e tele.
7 ‘Ua alu a‘e le leona a‘i le vao filifili na i ai,o lo‘o fa‘asaga mai fo‘i lē na te fa‘aumatia nu‘u ‘ese.O lo‘o sau ia a‘i le mea sa i ai e fa‘atafunaina lou nu‘u;e fai ma mea tu‘ufua ou ‘a‘ai, e leai sē nofo ai.
8 ‘Ia ‘outou fusi ‘iā te ‘outou i ‘ie talatala ‘ona o lea mea,ma taufaitagitu‘i, ma uiō.“Auā e le liliu‘eseina ‘iā te i tatou le to‘asā tele o le ALI‘I.”
9 O lo‘o fetalai mai le ALI‘I, o lea aso e matuā vaivai ai le loto o le tupu ma loto o ali‘i; e segia fo‘i mauli o ositaulaga ma femēmēa‘i perofeta.
10 ‘Ona ‘ou fai atu lea, “Auē! le Ali‘i e, le ATUA, e moni, ‘ua e matuā ‘olegia lenei nu‘u ma Ierusalema, ‘ua fa‘apea mai, ‘E ‘iā te ‘outou le filemū,’ a ‘ua o‘o lava le pelu i le loto.”
11 O ia ona po e fai mai ai i lenei nu‘u ma Ierusalema, O le matagi vevela i mauga tula i le vao, i le ala o le tama fafine a lo‘u nu‘u, ‘ae lē se matagi e fa‘asavili a‘i saito pe fa‘amamā a‘i;