9 O le lua fo‘i na lafo i ai e Isamaeli tino o tagata oti uma na ia fasia ‘ona o Ketalia, o le lua lea na faia e Asa le tupu, ‘ona o Paasa le tupu o Isaraelu; na fa‘atumuina ai e Isamaeli le atali‘i o Netanaia i ē na fasia.
10 ‘Ona ‘ave ai lea fa‘atagataotau‘a e Isamaeli o ē na totoe uma o le nu‘u na i Mesepa, o afafine fo‘i o le tupu ma le nu‘u uma na totoe i Mesepa, na tu‘uina atu e Nepusatana le pule i le ‘au e fa‘afeao ‘iā Ketalia le atali‘i o Aikamo e pule ai; ‘ua ‘ave i latou fa‘atagataotau‘a e Isamaeli le atali‘i o Netanaia, ‘ua alu atu fo‘i ia e sopo‘ia atu i le fānauga a Amoni.
11 A ‘ua fa‘alogo e Ioanana le atali‘i o Karea ma ali‘i uma sa ‘iā te ia na ‘ave ‘au, i le leaga uma na faia e Isamaeli le atali‘i o Netanaia,
12 ‘ona latou ‘ave ai lea o tagata uma ma latou o ē tau ma Isamaeli le atali‘i o Netanaia, na latou maua fo‘i o ia e lata ane i le vai tele i Kipeona.
13 ‘Ua iloa e le nu‘u uma sa ‘iā Isamaeli, o Ioanana le atali‘i o Karea ma ali‘i uma sa ‘iā te ia na ‘ave ‘au, ‘ona latou fiafia ai lea.
14 ‘Ua liliu mai fo‘i le nu‘u uma na ‘ave fa‘atagataotau‘a e Isamaeli a‘i Mesepa ma latou fo‘i mai, ma ō mai ‘iā Ioanana le atali‘i o Karea.
15 A ‘ua sola Isamaeli le atali‘i o Netanaia ma tagata e to‘avalu a‘i Ioanana, ‘ua alu atu fo‘i ia i le fānauga a Amoni.