15 Fa‘auta, le ‘āiga o Isaraelu e,o lo‘o ‘ou ‘aumaia se nu‘u a‘i le mea mamao e tau ma ‘outou,o lo‘o fetalai mai ai le ALI‘I;o le nu‘u malosi lea, o le nu‘u o le vavau,o le nu‘u fo‘i tou te lē iloa la latou gagana,tou te lē lagona fo‘i se mea latou te fai mai ai.
16 O la latou utu o ū fanafanae pei o se tu‘ugamau ‘ua fa‘amaga; o toa i latou uma.
17 Latou te ‘aina lau saito ma au mea e ‘ai,o mea e ‘ai ia a ou atali‘i ma ou afafine;latou te ‘aina au lafu mamoe ma au lafu povi.Latou te ‘aina ou vine ma ou mati;latou te fa‘atafunaina i le pelu ou ‘a‘ai nofo ‘olo ‘ua e fa‘atuatua i ai.
18 A o ia ona po ‘ou te lē matuā fa‘aumatia ai ‘outou, o lo‘o fetalai mai ai le ALI‘I.
19 A ‘outou fai mai, “O le a ‘ea ‘ua faia e le ALI‘I lo tatou Atua o ia mea uma ‘iā te i tatou?” ‘Ona e fai atu ai lea ‘iā te i latou, “E pei ‘ona ‘outou tu‘ua o a‘u, ma ‘outou ‘au‘auna i atua ‘ese i lo ‘outou nu‘u, e fa‘apea fo‘i ‘ona ‘outou ‘au‘auna atu i tagata ‘ese i le nu‘u e lē o lo ‘outou.”
20 ‘Inā ta‘u atu ia lenei mea i le ‘āiga o Iakopo,ma fa‘ailoa atu ai i Iuta, ‘ia fa‘apea atu:
21 ‘Inā fa‘alogologo mai ia i lenei mea,o ‘outou le nu‘u vālea ma le lē mafaufau;e fai o latou mata, ‘ae lē va‘ai i latou;e fai fo‘i o latou taliga, ‘ae lē fa‘alogo i latou.