9 ‘Ua fa‘apea ‘ona fetalai mai o le ALI‘I o ‘au:E fa‘apei ‘ona latou matuā a‘oa‘o i le vine,e fa‘apea fo‘i i ē o totoe i Isaraelu;‘inā toe tu‘u mai ia lou lima,e pei o lē ‘ua tau vine ‘ona toe tu‘u mai lona lima i ‘ato.
10 Po o ai ‘ea ‘ou te fai atu i ai ma a‘oa‘i atu i ai,‘ina ‘ia latou fa‘alogo mai?Fa‘auta, e le‘i peritomeina o latou taliga,e lē mafaia e i latou ‘ona fa‘alogo mai;fa‘auta, ‘ua fai le afioga a le ALI‘I ma mea e tauemu i ai i latou;‘ua latou le fiafia i ai.
11 O le mea lea ‘ua tumu ai a‘u i le to‘asā o le ALI‘I;‘ua ‘ou le lavā fa‘ato‘ato‘a.‘Ou te liligi ifo ai i luga o tamaiti i fafo,e fa‘atasi fo‘i ma le fa‘apotopotoga o taulele‘a;e maua fo‘i le tane ‘atoa ma lana avā,o le toeaina ‘atoa ma lē ‘ua tu‘u tulu‘i ona tausaga.
12 E ‘avea o latou fale mo nisi,‘atoa fo‘i ma fanua, ma avā;auā ‘ou te fa‘aloaloa lo‘u lima i luga o ē nonofo i le nu‘u,o lo‘o fetalai mai ai le ALI‘I.
13 Auā o latou tagatanu‘u ‘atoa ma o latou ali‘i‘ua matape‘ape‘a i ‘oloa i latou uma;o perofeta fo‘i ‘atoa ma ositaulaga ‘ua amio pepelo i latou uma.
14 ‘Ua latou fofō fa‘atauva‘a le manu‘a o le tama fafine a lo‘u nu‘u,‘ua fa‘apea ane, “E manuia, e manuia;”‘ae leai se manuia.
15 ‘Ua latou mamā ‘ea ‘ona o le mea ‘inosia ‘ua latou faia?‘Ua matuā le mamā lava i latou,‘ua latou lē iloa lava le māsiasi;o le mea lea e pa‘u‘ū ai i latou fa‘atasi ma ē ‘ua pa‘u‘ū;o ona po ‘ou te asiasi ai ‘iā te i latou, latou te tausuai ai,o lo‘o fetalai mai ai le ALI‘I.