1 O le fa‘amasino poto e pule tonu o ia i lona nu‘u,e mausalī fo‘i le pule‘aga a le tagata mafaufau.
2 E pei lava o le fa‘amasino o le nu‘u, e fa‘apea fo‘i ona tagata tofia;e pei o le pulenu‘u, e fa‘apea fo‘i tagata o le ‘a‘ai.
3 O le tupu fa‘avalevalea e fano ai lona nu‘u,a o le faipule mafaufau e fa‘ato‘ateleina ai le ‘a‘ai.
4 ‘Ua i le ‘a‘ao o le Atua le pule i le lau‘ele‘ele,na te fa‘atupuina fo‘i i ai se faipule lelei, i ona po e tatau ai.
5 ‘Ua i le ‘a‘ao o le Atua le manuia o le tagata,na te tusia fo‘i lona mamalu i le muaulu o le ali‘i tofia.
6 ‘Ia e fa‘agalogalo amio leaga uma a lou uso,‘aua fo‘i ‘e te faia se mea ma le fa‘asauā.
7 ‘Ua ‘inosia le fa‘amaualuga e le Atua ‘atoa ma tagatama ‘ua matuā matagā amio leaga uma lava a nu‘u ‘ese.
8 E fe‘avea‘iina le pule mai le tasi nu‘u i le tasi nu‘u,‘ona o amio leaga ma sauāga ma tauemuga ma le mau togafiti pepelo.
9 ‘Ae leai se tasi e sili ‘ona leaga i le tagata manumanu.Se a le mea e fia sili ai le palapala ma le lefulefu?
10 E leai se tagata e sili ‘ona amio leaga i le tagata e naunau i ‘oloa;auā e o‘o i lona agaga, na te fa‘atauina atu i tupe,‘ona ‘ua tu‘ulafoa‘i fo‘i e ia ona ga‘au i aso o lona olaga.
11 E vave mavae atu o pule uma lava. A fa‘alevaleva le ma‘i,e mafatia ai le foma‘i;
12 ‘ae a mamā le ma‘i, ‘ona fō‘ia lea e ia.E fa‘apea lava se tasi e ‘avea ma tupu i le asō,a e a taeao ‘ua oti lava ia.
13 A oti fo‘i le tagata, e fai mōna tofi o manu fetolofi,o manu fe‘ai ma ilo.
14 O le mafua‘aga o le fa‘amaualuga,o le fa‘amavae lea o le tagata ma le Atua,
15 ‘ona ‘ua ‘alo ‘ese le loto i lē ‘ua na faia ia.O le mafua‘aga fo‘i o agasala uma, o le fa‘amaualuga lea;‘ai sē o‘otia ai, e fa‘atumuina o ia i mala, e i‘u fo‘i ‘ina fano ai o ia.
16 O le mea lava lea ‘ua fa‘amasiasi ai e le Ali‘i o fa‘apotopotoga o tagata amio leagama ‘ua fa‘aumatia ai i latou e fa‘avavau.
17 ‘Ua tulei ifo e le Ali‘i o ta‘ita‘i fa‘amaualuluga nai o latou nofoāli‘i,ma ‘ua fa‘ae‘etia i ai o ē agavaivai.
18 ‘Ua fa‘amagumagu e le Atua o a‘a o nu‘u fa‘amaualulugama ‘ua na totōina o ē fa‘amaulalo i nu‘u lava ia.
19 ‘Ua fulisia e le Ali‘i le lau‘ele‘ele o nu‘u ‘esema ‘ua na lepetia i latou e o‘o atu i le fa‘avae.
20 ‘Ua na fa‘amamae ni isi o i latou,‘ua na sōloi‘esea le manatu ‘iā te i latou ai le lalolagi.
21 ‘Ua tineia e le Atua le fa‘amanatuina o ē fa‘amaualulugama ‘ua na fa‘atumauina le manatuina o ē loto fa‘amaulalo.
22 O le fa‘amaualuga, e lē tatau lava lea i le tagata,po o le ita i le fānauga a fafine.
23 E fa‘amamaluina le fānauga a tagata latou te matata‘u i le Atua;‘ae tauemuina le fānauga a tagata latou te soli poloa‘iga a le Ali‘i.
24 E fa‘amamaluina le ta‘imua i totonu o ona uso,e fa‘apea fo‘i i latou e matata‘u i le Ali‘i ‘ona fa‘amamaluina i ona luma.
25 O le mamalu o ē mau‘oa ma ē fa‘aaloalogia ma ē matitiva,o le mata‘u lea i le Atua.
26 ‘Aua ‘e te tauemu i le tagata amiotonu ‘ua mativa,‘aua fo‘i ‘e te vivi‘i atu i le tagata agasala ‘ua mau‘oloa.
27 O le ta‘imua, o le fa‘amasino ma le tagata mamalu e fa‘aaloaloina i latou,‘ae leai se tasi e sili i lē ‘ua mata‘u i le Atua.
28 E ‘avea tagata sa‘oloto ma ‘au‘auna a le tagata mafaufau;o le tagata a‘oa‘oina ma le fa‘autauta, e lē muimui pe a a‘oa‘iina o ia;e lē fa‘aaloalogia fo‘i le tagata valea.
29 ‘Aua ‘e te fa‘amaualuga pe a e fai lau galuega,‘aua fo‘i ‘e te fa‘avaivai i aso o le puapuagā.
30 ‘Ua lelei le tagata faigaluega ‘ua mau o ia i mea uma,‘ae leaga le tagata fa‘afiasili ‘ua leai sana mea e ‘ai.
31 Lo‘u atali‘i e,‘ia e tausia pea lou agaga i le agamalū ma ‘ia e tu‘u atu i ai le fa‘aaloalo ‘ua tusa ma ia.
32 O ai sē ta‘uamiotonu i le tagata ‘ua agasala i lona lava agaga,o ai sē fa‘aaloalo i lē ‘ua fa‘alemigao i lona ia agaga?
33 O le tagata mativa e fa‘aaloalogia o ia ‘ona o lona poto;a o nisi ‘ua fa‘aaloalogia i latou ‘ona o a latou ‘oloa.
34 ‘Ai sē fa‘aaloalogia o ia i lona mativa,e matuā sili ‘ona fa‘aaloalogia fo‘i o ia pe ‘ana mau‘oloa;a o lē ‘ua mimita i ana ‘oloa, talofa ‘iā te ia pe ‘ana mativa o ia!