Sirako

O le Avā Amio Lelei

¹‘Amu‘ia le tane a le fafine amiotonu;e fa‘aluaina ai le tele o ona tausaga. ²O le avā loto malosi o le fiafia lava ia o lana tane,na te fa‘atumau i le filemū o tausaga o lona ola. ³O le tofi lelei le avā amio lelei, o le tofi lea o ē matata‘u i le Atua,e foa‘iina mai i le tagata e taui a‘i ana galuega lelei. ⁴E fiafia pea le loto o lana tane, e tusa pe mau‘oloa pe mativa o ia,e aliali mai pea le ‘oli‘oli i ona lava mata. ⁵O mea e tolu ‘ua mata‘u i ai lo‘u loto,a o lona fā e segavale ai o‘u mata. ⁶O le ‘ino‘ino mai o le ‘a‘ai ‘atoa, o le fouvale o le motu o tagata, ⁷ma le tu‘ua‘i pepelo, o mea ia e feoloolo ai lava le oti.

O le Avā Fuā

⁸A o le avā fuā, o le fa‘anoanoa lava lea ma le fa‘atigā loto. ⁹O le avā fuā ‘ua i ai le sasa o le laulaufaiva, e o‘otia ai tagata uma. ¹⁰E pei o le tafiti o povi e lua ‘ua amo tasi, e fa‘apea le avā loto leaga;o lē fa‘atasi ma ia ‘ua pei o se tagata ‘ua na umia se akarava. ¹¹O le avā ‘ua masani i le ‘onā e tuputele ai le ita ma le māsiasi o lana tane,e lē mafai ‘ona natia lona matagā. ¹²O ona mata fa‘aosooso ma le gāoioi o ona laumata e iloa ai le fafine mulilua. ¹³‘Ia e leoleo ma le filigā i lou afafine pe ‘āfai ‘ua lē fia ‘alo ‘ese o ia i fa‘aosoosoga,‘ina ne‘i oso i le leaga pe a maua ai sona ala. ¹⁴‘Ia e fulitua i mata ‘ua fa‘aosooso,‘aua fo‘i ‘e te ofo pe ‘āfai ‘ua fa‘asesēina ai oe. ¹⁵E pei o le tagata faimalaga ‘ua fia inu, e fa‘amaga lona gutu i le vaipuna,na te inu lava i vai uma e tau atu i ai, e nofonofo lava ia i poutū umama tatala lana utu i ū fanafana uma se‘ia o‘o ‘ina lailoa ai o ia.

O Fa‘amanuiaga o le Avā Lelei

¹⁶O le agamālie o le avā mā‘elegā o le fiafia lea o lana tane, e lololo a‘i ona ivi; ¹⁷o lona amiotonu, o le mea alofa lea a le Atua. ¹⁸O le avā mafaufau ‘ua fa‘alologo o ia;e leai se mea e mafa‘atusaina i ai le avā ‘ua a‘oa‘oina lelei. ¹⁹O le avā amiotonu ma le loto mamā, o le mea alofa ‘ua sili i mea alofa uma. ²⁰O le avā loto mamā e lē ma fa‘atusaina i ai ni tu‘ugā‘oloa. ²¹E pei o le oso a‘e o le lā mo le lalolagi i mea aupito i lugā a le Atua,e fa‘apea ‘ona pupula le lālelei o le avā amiotonu i teuga o lona fale. ²²E pei o le molī e mū i le tu‘ugāmolī pa‘ia,e fa‘apea o mata lālelei i luga o se tino lelei. ²³E pei o poutū auro i tulaga ario,e fa‘apea vae o le fafine loto malosi ona mautū i luga o ona alofivae. ²⁴E pei o fa‘avae e fa‘avavau i luga o le papa e lē mafa‘agae‘etia,e fa‘apea o poloa‘iga a le Atua i le loto o le fafine amiotonu.

O Mea e Fa‘anoanoa ai le Loto

²⁵O mea e lua e fa‘anoanoa ai lo‘u loto, a o lona tolu e oso a‘i lo‘u ita. ²⁶O le tagata tau ‘ua tigāina i le mativa;o le tagata mafaufau ‘ua tauemuina; ²⁷ma le tagata ‘ua tu‘u le amiotonu ‘ae fai le agasala;‘ua saunia lea tagata e le Atua mo le pelu. ²⁸O matagaluega e lua ‘ua mata e faigatā ma tutupu ai fa‘alavelave.E faigatā i le fa‘atau ‘oloa ona ‘alo ‘ese i soligātulafono;o le pule fo‘i i le fale ‘ava e lē aunoa o ia ma ni agasala i ‘upu.