1 O le mea aupito tāua i le lagi, o le vateatea ma lona matagofie, o mata o le lagi, o le fa‘aaliga lea o le mamalu.
2 O le lā pe a aliali mai, e vivi‘i atu i le Ali‘i;a oso a‘e, o le mea ofoofogia lava ia, le galuega a le Silisili‘ese.
3 A o‘o i lona tutonu, na te fa‘amūina le fogā‘ele‘ele,po o ai fo‘i sē mafai ‘ona tu i lona vevela?E tapili e le tu‘ifao le tu‘ugāafi ‘ina ‘ia ‘a‘asa mo ana galuega.
4 ‘Ae sili fa‘atolu ona fa‘avevela o mauga e le lā,‘ua na fana mai ai ni ‘ave e pei o le afi mū;a pupula, e fa‘atauaso o mata i ‘ona ‘ave.
5 O le Atua silisili ‘ua na faia o ia,ma ‘ua fa‘ata‘alise lana fa‘ata‘amilosaga ‘ona o lana poloa‘iga.
6 E fa‘apea ma le masina ‘ona tausi i itū aso ‘ua fa‘asinomia ‘iā te ia, ‘ua fa‘ailoa mai le sologa o aso ma ‘ua fa‘ailogaina ai o vaitausaga.
7 O le masina e iloa ai o tausamiga;‘ua māui lona malamalama pe a o‘o ‘ina ‘atoa lona tino.
8 O ia e maua ai le igoa o masina o le tausaga;e ofoofogia lona saga tupu pea i ona liuga.
9 O le sulu o le togālauapi i mea aupito i lugā,o pupula ma le mamalu i le vā nimonimo o le lagi.
10 O le matagofie o le lagi, o le fepulafi lea o fetū, o le teu manaia lea i mea a lugā ‘ua afio ai le Ali‘i.
11 E tusa ma le poloa‘iga o lē Pa‘ia,‘ua latou nofo sauni i lona finagalo,e lē fa‘avaivai fo‘i i latou i mataala.
12 ‘Ia e tepa a‘e i le nuanua ma ‘ia e fa‘amanū i lē ‘ua na faia ia; ‘ua matuā matagofie lava o ia i lona mamalu!
13 Na te fusia le lagi i lona li‘o pupula,a o ‘a‘ao o le Silisili‘ese na loua ai o ia.
14 O lana poloa‘iga e tō ifo ai le kiona ma le telelise, ‘ua ‘emo mai ai o uila e fa‘ao‘o mai ana fa‘amasinoga.
15 O le mea fo‘i lea e tatalaina ai lona tu‘ugā‘oloama ‘ua felelei ai o ao e pei o ni manu fai ‘apa‘au.
16 O lona mana ‘ua na fa‘amalosia ai o ao,‘ona tō ifo lea le uato‘a e pei o ni ma‘ama‘a.
17 E tautevateva o mauga pe a aliali mai o ia;o lona finagalo e agi mai ai le matagi mai saute.
18 O le leo o lana faititili e lūlūina ai le fogā‘ele‘ele, e pesi mai ai le matū ma le asiosio.
19 Na te lūlūsoloina le kiona e pei o le tifa ifo o manu felelei;e alu ifo ia e pei o le sē pe a to‘ele.
20 E ofo le mata i le ‘i‘ila o lona sinasina mai,e ofo le loto i le ala e tō ifo ai.
21 Na te sasa‘a le sauto‘a i le lalolagi e pei o le masima;a to‘a fo‘i lea, e ma‘ai e pei o le vaotuitui.
22 E agi malūlū mai le matagi i matū ‘ona to‘a ai lea le vai,‘ua ma‘a‘a; e ta‘oto o lea vaito‘a i luga o fa‘aputuga vai uma lava,e fa‘a‘ofu lava i le vai e pei o se ufifatafata u‘amea.
23 Na te ‘ati‘atia o mauga, na te fa‘amagumagu le fanua tu‘ufua,na te fa‘aumatia le lauvao e pei o se afi.
24 O le toe fa‘aleleia o mea uma, o le fa‘ata‘alise mai o se ao timu;o le tō ifo fo‘i o le sau e mulimuli mai i le matagi vevela, e fa‘amateina ai lava ia.
25 O le fetalaiga a le Atua ‘ua malū ai le matagi, i le o lona mafaufau na fa‘afilemūina ai le vasama ‘ua fa‘ato‘aina o motu ‘ua i ai.
26 O ē ‘ua folau i le vasa, ‘ua latou tala mai lona mata‘utia,‘ua fa‘alogo i ai o tatou taliga, ‘ona tatou ofo ai lea.
27 ‘Ua i ai o mea ‘ese ma le ofoofogia, o itū‘āiga manu fe‘ai ‘ese‘ese‘atoa ma manu fanua ma itū‘āiga i‘a fe‘ai o le sami.
28 O le Ali‘i lava ia ‘ua na fa‘atonuina le taunu‘uga o mea uma;o lana fetalaiga ‘ua mautū ai mea uma.
29 E fai fua ni ‘upu e tele, e lē lava a tatou ‘upu;a o le ‘a‘ano lenei o ‘upu uma: “O ia o lo‘o i mea uma.”
30 A fia vivi‘i atu ‘iā te ia, fa‘apefea ‘ona lavātia ai i tatou? Auā o ia o lē ona le mana uma, ‘ua i luga lava o ana galuega uma.
31 ‘Ua mata‘utia le Ali‘i, ‘ua silisili ‘ese o ia,‘ua ofoofogia lona mamana.
32 ‘Ia ‘outou vivi‘i atu i le Atua e tusa ma la ‘outou mafaia,auā e sili a‘e pea lava ia ma ‘ua ofoofogia lona mamalu.
33 ‘Ia ‘outou fa‘amanū atu i le Atua,‘ia ‘outou fa‘ane‘ene‘e atu ‘iā te ia e tusa ma la ‘outou mafaia,auā ‘ua sili a‘e lava ia i vi‘iga uma:
34 ‘Ia ‘outou fa‘amalosi lava e vivi‘i atu ‘iā te ia,‘ia ‘aua lava le fa‘avaivai, auā e lē mafai ‘ona tini le uto.
35 O ai na iloa atu o ia ma ‘ua na fai ai se tala?O ai ‘ua mafai ‘iā te ia ‘ona vivi‘i atu i lona afio e fa‘avavau?
36 E sili ‘ona tele o mea ofoofogia ‘ua lilo, ‘ae itiiti ana galuega ‘ua iloa mai e i tatou.
37 A o mea uma lava ‘ua faia e le Ali‘i, ‘ua foa‘i mai fo‘i e ia le poto i ē amiotonu.