1 ‘Āfai ‘ua tofia oe e fai ma pule i le faigā‘ai,‘aua ‘e te fa‘amaualuga ai,‘ia tusa pea oe ma se tasi o ē ‘ua vala‘auina ai.
2 ‘Ia e mua‘i tausi ‘iā i latou, ‘ona e fa‘ato‘ā nofo ai lea;a māe‘a le fai o lau matagaluega,‘ona e fa‘ato‘ā ta‘oto ai lea e ‘ai.
3 ‘Ina ‘ia e ‘oli‘oli ai ‘ona o i latou ma e tali le pale e pei o se teu matagofie,‘ona ‘ua fa‘amaonia ‘ua tusa lava oe ma le tofi ‘ua tu‘u mai.
4 O oe le toeaina, ‘ia e fai sau ‘upu, auā e tatau ‘iā te oe,
5 ‘ona fai le tala muamua ma le poto ma le fa‘aeteete,‘ae ‘aua ‘e te fa‘alavelave i le tāina o la‘au pese.
6 ‘Āfai ‘ua lē fa‘alogo se tasi ‘iā te oe,‘aua ‘e te fa‘amaumau fua au tala,‘aua ‘e te fa‘aalialiavale ai i lou fiapoto.
7 O le ma‘a fa‘amaufa‘ailoga tāua i lona teu auro,o le fati lea a ē tātā la‘au pese i se faigā‘ai ‘ua fai ai le uaina.
8 O le fa‘amaufa‘ailoga samaraki i lona fa‘ava‘a auro,o le fati malie lea a le ‘au faipese ‘ina o inumia ma le fa‘atatau o le uaina lelei.
9 ‘Ia e fa‘alogo i ai ma e fa‘alologo,‘ona ta‘uleleia ai oe ‘ona o lou migao.
10 Le taule‘ale‘a e, ‘ia seāseā ‘ona e tautala i mea ‘ua e ‘aiā i ai.
11 ‘Āfai e fa‘alua ‘ona fesiligia oe, ‘ia fai sau tali pu‘upu‘u.
12 O le tele o tala, ‘ia pei lava oe o sē na te lē iloa,tau ‘ina e fa‘alologo pe fai fo‘i ni nai fesili.
13 A e fa‘atasi ma ē mamalu, ‘aua ‘e te fia tusa ma i latou;o le mea fo‘i ‘ua i ai o toeaina, ‘aua ne‘i tele ai au ‘upu.
14 E muamua le uila i le faititili,e savali fo‘i le igoa lelei i luma o lē agamalū,e ta‘uleleia fo‘i oe ‘ona o lou migao.
15 A o‘o i le itūlā, ‘aua le fa‘atuai ‘ona e tula‘i;‘ia muamua atu oe ma le televave i lou lava fale,‘e te sivasiva ma fiafia ai.
16 ‘E te faitalia ai sau amio,tau ‘ina ‘ia ‘aua le agasala ai po o le fai ai se ‘upu fa‘asausili.
17 ‘Ae a mavae atu mea uma ia,‘ia e vivi‘i atu i le Ali‘i ‘ua na faia oe ma ‘ua fa‘afaula‘i ‘iā te oe ana mea alofa uma.
18 O lē mata‘u i le Ali‘i, e talia e ia lana a‘oa‘oga,a o ē mataala i le fia sā‘ili ‘iā te ia, e maua e i latou le fa‘amanuiaga.
19 O lē sā‘ili i le tulafono e fa‘atumuina ai o ia,a o lē fa‘afiaamiotonu ai e tautevateva ai o ia.
20 O ē matata‘u i le Ali‘i, latou te maua ai le fa‘amasinoga tonu,latou te fa‘amalamalama lo latou amiotonu e pei o se molī ‘ua mū.
21 O le tagata agasala e ‘alo ‘ese o ia i le a‘oa‘iga,na te maua ni mea e alani a‘i fa‘atatau mōna lava mana‘oga.
22 O le tagata mafaufau na te lē ta‘ufa‘atauva‘a i le fa‘atonuga;a o le tagata ‘ese ma le fa‘amaualuga e lē o‘otia lona loto i le mata‘u.
23 E o‘o lava ‘ina faia lana mea ma le lē mua‘i filifili i ai;‘ona ta‘uvalea lea o ia i ana lava taumafaiga.
24 Lo‘u atali‘i e, ‘aua ‘e te faia se mea a o le‘i mua‘i filifili i ai,‘ona e lē salamō ai lea pe a uma ‘ona faia.
25 ‘Aua ‘e te savali i le ala gaoā leaga, ‘ona lē lavea ai lea lou vae i ma‘a;‘aua ‘e te savali i le ala mato, ne‘i e tu‘u ai i lou agaga se mea ‘e te tautevateva ai.
26 ‘Ia e fa‘aeteete fo‘i i lau fānau;‘ia oe ma tagata o lou lava ‘āiga.
27 O mea uma ‘e te faia, ‘ia e fa‘atuatua ai i lou lava agaga;auā o le tausiga lea o poloa‘iga.
28 O lē fa‘atuatua i le Atua, e to‘aga lava ia i poloa‘iga;o lē fa‘alagolago i le Atua e lē fa‘aleagaina lava ia. #