1 ‘Aua ne‘i e fa‘afiamisa i le tagata mamalu,‘ina ne‘i e mao pa‘ū i ona lima.
2 ‘Aua ‘e te finau i le tagata mau‘oloa,ne‘i molia ai oe e ia i le fa‘amasinoga;
3 auā o le auro ma le ario na fano a‘i ni isi e to‘atele,e o‘o atu lava i loto o tupu na liu‘eseina ai.
4 ‘Aua ne‘i e fai finauga i le tagata tautalatala,‘aua ‘e te fa‘aputu se fafie i lana afi.
5 ‘Aua ‘e te fa‘amasani ma se tagata valea,‘ina ne‘i ta‘uleagaina a‘i ou tua‘ā.
6 ‘Aua ‘e te tauemu i le tagata ‘ua fia ‘alo ‘ese o ia i le agasala,‘aua fo‘i, ‘e te fāifai i ai; ‘ia e manatua ‘ua nofo sala lava o i tatou uma.
7 ‘Aua ‘e te tauemu i le tagata pe a toeaina o ia,auā e o‘o fo‘i ‘ina toeaina ni isi o i tatou.
8 ‘Aua ‘e te fiafia pe a oti lou fili;‘ia e manatua e oti uma i tatou ma ‘ua tatou le manana‘o ‘ina ulagia i tatou.
9 ‘Aua ‘e te ta‘ufa‘atauva‘a i tala a toeaina popoto,a ‘ia e mafaufau so‘o ‘iā latou fa‘ata‘oto;
10 auā e a‘oa‘oina a‘i oe i le poto ma le a‘oa‘oga o le mafaufauma le ala e ‘au‘auna atu ai i ē mamalu ma le lē ta‘uleagaina ai oe.
11 ‘Aua ‘e te fa‘atamala i fa‘amatalaga a toeaina,auā na a‘oa‘oina fo‘i i latou e o latou mātua;
12 e a‘oa‘oina ai oe i le poto ma le fai o se tali lelei i le itūlā e tatau ai.
13 ‘Aua ‘e te tutu o malala a ē agasala i le finau ‘iā te i latou,‘ina ne‘i susunuina oe i le afi mū o a latou agasala.
14 ‘Aua ‘e te finau atu i le tagata ‘ua fāifai ‘iā te oe,‘ina ne‘i nofo lava ia ma lamalama i au ‘upu.
15 ‘Aua ‘e te nō atu se tupe i lē sili lona mamalu i lōu;‘ae ‘āfai ‘ua e nō atu i ai, ‘ia e tāofi ifo ‘ua maimau lau tupe.
16 ‘Aua ne‘i fai oe ma moni o se tasi mo se mea ‘e te lē lavātia;‘ae ‘āfai ‘ua ‘avea oe ma moni, ‘ia e mafaufau i le ala ‘e te fa‘aolaina ai le tupe.
17 ‘Aua ‘e te ta‘uleagaina le i‘uga a le fa‘amasino,auā e fa‘amasino lava ia e tusa ma le mea tonu.
18 ‘Aua ne‘i lua faimalaga ma le tagata osovale,‘ina ne‘i mafatia oe i ana mea leaga,auā e savali lava ia e tusa ma lona loto faitalia,‘ona fano lea ‘oulua i lona lava valea.
19 ‘Aua ne‘i ‘oulua femisa‘i ma se tagata itagofie,‘aua fo‘i ne‘i lua malaga i le fanua tu‘ufua ma se tagata osovale,auā o le mea noa lava le toto i lona fa‘atatau,na te lafotū ‘iā te oe i le mea ‘ua lē o i ai sē fesoasoani mai.
20 ‘Aua ne‘i e fai se filifiliga fa‘atasi ma ē vālelea,auā na o mea e fiafia i ai i latou, latou te tāofi i ai.
21 ‘Aua ne‘i e fai sau filifiliga i luma o se tagata ‘ese,auā ‘e te lē iloa mea e fa‘atupu e ia.
22 ‘Aua ‘e te fa‘aali i tagata uma mea ‘ua i ai i lou loto,‘ina ne‘i fa‘atagā alofa se tasi ‘iā te oe,‘ona ta‘uleaga lea o ia ‘iā te oe.