1 E fa‘apea mai uma o uō: “O a‘u fo‘i e fa‘auō ‘iā te oe.”‘Ae i ai o uō ‘ua na o le igoa o le uō.Pe lē o se mea e fa‘anoanoa ai le loto e o‘o i le oti?
2 Auā o le uō ma lē ‘ua masani, a ‘ua ‘avea mou fili.
3 E! le mafaufauga leaga e, po o fea na e tupu mai ai,‘ua e ufitia ai le lalolagi i lou leaga ma lou fa‘a‘ole‘ole.
4 E fiafia le uō fa‘atasi ma lana uō i mea lelei ‘ua o‘o ‘iā te ia,a o aso o le puapuagā e ‘avea ai mōna fili.
5 E fa‘anoanoa le uō fa‘atasi ma lana uō, ‘ona o le manatu i lona ia manava,‘ae a tu mai le fili, ‘ona ia tago lea i le talitā.
6 ‘Aua ne‘i galo lau uō i lou loto,‘ia e manatua pea o ia i aso ‘e te mau‘oloa ai.
7 ‘Aua ne‘i lua filifili fa‘atasi ma lē na faimailei ‘iā te oe,‘ia e fa‘ananā ou mafaufauga i luma o ē matata‘u ‘iā te oe.
8 E fa‘aalia mai ‘iā te oe o lo latou tāofi o tagata uma ‘ua e fesili i ai,a o le tasi ‘ua fa‘atatau le tāofi e fa‘aali atua i mea e lelei ai lava ia.
9 ‘Ia e fa‘aeteete lelei, pe a filifili ‘oulua ma se tasi;‘ia e mua‘i su‘esu‘e po o a mea e aogā ‘iā te ia,auā e manatu lava ia ‘iā te ia lava;
10 ‘ina ne‘i tanu e ia se su‘i, ‘ona fa‘apea mai lea ‘iā te oe,
11 “E lelei lava lou ala,”‘ona tu lea o ia i le tasi itūala e tilotilo mai pe se a se mea e o‘o ‘iā te oe.
12 ‘Aua ne‘i ‘oulua filifili i amioga pa‘ia ma le tagata ‘ua na lē iloa se Atua,pe filifili ma le tagata agasala i mea tau le amiotonu,pe filifili ma le fafine fuā e uiga i le fafine ‘ua matau‘a i ai,pe filifili ma le tagata pala‘ai i mea tau le tau‘a,pe filifili ma le fa‘atau‘oloa i le tau o ‘oloa,pe filifili ma le tagata fia fa‘atau mai se ‘oloa e uiga i le mea a fa‘atau atu,pe filifili ma le tagata matau‘a e uiga i le loto fa‘afetai.
13 ‘Aua ne‘i ‘oulua filifili ma le tagata agaleaga e uiga i le agaalofa,pe filifili ma le tagata fa‘api‘opi‘o e uiga i le amiotonu,pe filifili ma le tagata faifa‘ato‘aga e uiga i se galuega a fai,
14 pe filifili ma le tagata togi i tausaga i aso a i‘u ai sana galuega,pe filifili fa‘atasi ma le ‘au‘auna paiē e uiga i se galuega mamafa.‘Aua lava ‘e te fa‘alogo ‘iā te i latou nā i sau filifiliga e tasi.
15 A ‘ia e fa‘atasi pea ma le tagata amiotonu,o sē ‘ua e mautinoa o i ai le mata‘u i le Atua.
16 O sē ‘ua tusa lona agaga ma lou agaga,o sē mutimuti alofa ‘iā te oe pe a e tautevateva i le pogisā.
17 ‘Ia e fa‘amausalī i totonu ‘iā te oe le loto o fa‘atonuga lelei;auā e lē o i ai se tasi mea ‘iā te oe e sili ‘ona tāua;
18 O le agaga o le tagata amiotonu na te fa‘aali ‘iā te ia, i ni isi aso,le ‘upu moni, e sili lava i ni tagata va‘ai se to‘afitu ‘ua tutū i se mea maupu‘epu‘e e lamalama ai.
19 I lo mea uma ia, ‘ia e fa‘atoga atu ai pea i le Silisili‘ese,‘ina ‘ia ta‘ita‘i lava lou ala i le mea moni.
20 ‘Ia muamua ‘iā te oe le ‘upu moni i au galuega uma lava,‘ia muamua se filifiliga mautū i au amioga uma.
21 O le ‘upu leaga e liua ai le loto; e tutupu mai ai o mea e fa:o le lelei ma le leaga, o le ola ma le oti;‘ae masani lava le laulaufaiva ‘ona pule i ai.E i ai le tagata ‘ua poto ma ‘ua a‘oa‘o atu i ni isi e to‘atele,‘ae lē aogā lava o ia ‘iā te ia lava.
22 O le tagata poto na te a‘oa‘oina ni isi e to‘atele ma ‘ua mālie fo‘i o ia ‘iā te ia.
23 E ‘inosia lē na te fa‘atagā poto i lana tautala;e lē tumau ‘iā te ia se mea lelei e tasi.
24 E le‘i foa‘i mai ‘iā te ia e le Atua lona alofa,auā ‘ua aunoa lava ia ma se poto.
25 E i ai le tagata poto ‘ua poto lava ia i lona agaga,e tusa ma le vi‘iga o fua lelei o lona mafaufau.
26 O le tagata poto na te a‘oa‘oina ona tagata,‘ua mautū lava fua lelei o lona mafaufau.
27 O le tagata poto e fa‘atumuina o ia i fa‘amanuiaga,e vivi‘i atu ‘iā te ia o ē uma e va‘ava‘ai ‘iā te ia.
28 O le ola o le tagata e faitauina i ona aso;a o aso o Isaraelu e lē mafaitaulia.
29 O le tagata poto e maua i lona nu‘u le tofi o le fa‘aaloalo,i le o lona igoa e ola ai lava e fa‘avavau.
30 Lo‘u atali‘i e,‘ia e tofotofo i lou agaga i aso o lou ola;‘āfai o se mea e leaga mo ia, ‘aua ne‘i e tu‘u atu lava i ai.
31 Auā e lē tatau mea uma i tagata uma,e lē fiafia tagata uma i le itū‘āiga mea e tasi.
32 ‘Aua ‘e te ‘aipā i se tausamiga,‘aua fo‘i ‘e te oso i mea uma e ‘ai.
33 Auā o le tele o mea e ‘ai e tupu ai le ma‘i;i le o le ‘ai tele e fa‘atupuina ai le manava tigā.
34 O le ‘ai tele na oti ai nisi tagata e to‘atele,‘ae fa‘alevaleva le ola o le tagata e ‘ai fa‘atatau.