Sirako

O le Tagata Poto i la le Agaga

¹O le tagata poto ‘ua na sā‘ili le poto o ē mai anamua uma lava,e fa‘aaogā ona itūlā avanoa i le faitau i le ‘au perofeta. ²E tāofia e ia le tala i tagata ta‘uta‘ua,na te mafaufau i uiga sautualasi o fa‘ata‘oto. ³Na te sā‘ilia le ‘a‘ano lilo o ‘upu tāua,na te su‘esu‘eina o uiga lilo o fa‘ata‘oto. ⁴E mafuta o ia ma tagata mamalu,e tu o ia i luma o le ali‘i sili. ⁵E malaga atu o ia i le ‘ele‘ele o nu‘u ‘ese;auā e fia tofotofo e ia o mea lelei ma mea leaga o i le tagata. ⁶E fa‘asaga atu lona loto e alaala i le vaveao i luma o le Ali‘i ‘ua na faia o ia,na te faia ana talosaga i luma o le Silisili‘ese. ⁷E matala lona fofoga i le tatalo,na te fa‘atoga atu mo ana soligātulafono. ⁸‘Āfai e finagalo i ai le Ali‘i mamalu,e fa‘atumuina lava ia i le agaga o le malamalama. ⁹E fa‘atō ifo e pei o le timuga o fa‘amatalaga o lona poto,na te vivi‘i atu i le Atua i lana tatalo. ¹⁰Na te fa‘atonu lona mafaufau ma lona loto,na te su‘esu‘eina o mea lilo a le Atua. ¹¹Na te fa‘asalalauina o matā‘upu o lana a‘oa‘oga,e fai mōna mamalu le tulafono o le feagaiga a le Ali‘i. ¹²E vi‘ia lona poto e le to‘atele,e lē galo lava o ia e o‘o i le gata‘aga. ¹³E lē āu te‘a le manatu ‘iā te ia,e ta‘uta‘ua lona igoa i lea tupulaga ma lea tupulaga. ¹⁴E talaina mai lona poto e nu‘u uma, e vi‘ia lava ia e le fa‘apotopotoga. ¹⁵O aso e ola ai o ia, e sili ‘ona ta‘uta‘ua o ia i le to‘aafe;e o‘o fo‘i ‘ina mapu o ia, e sili lava ‘ona ta‘uleleia.

O le Pese e Vivi‘i atu ai i le Atua

¹⁶‘Ou te tala atu pea o‘u mafaufauga,auā ‘ua fa‘atumuina lava lo‘u loto, e lē ma tāofia. ¹⁷‘Ua fa‘apea mai le leo:‘Inā fa‘alogo mai ia, ‘outou le fānau pa‘ia,‘ia fua ni ‘outou fua e pei o le la‘au o le rosa ‘ua totōina i tafatafa o le vaitafe. ¹⁸‘Ia manogi lelei mai e pei o le pulu o Lepanona. ¹⁹‘Ia ‘outou fua ni o ‘outou fuamātala e pei o le susanama ‘ia pua‘iina mai lo ‘outou nanamu, ‘ia fai ni lālā matagofie;ma ‘ia ‘outou pepese le pese o le vi‘iga, o vivi‘i atu i le Atua i ana galuega. ²⁰‘Ia ‘outou vivi‘i i lē Silisili‘ese o lona suafa,‘inā fa‘amanū ia ‘iā te ia i ‘upu a ‘outou laugutuma le kitara ma ‘ia ‘outou ta‘uta‘u o fa‘apea mai: ²¹“O galuega uma lava a le Ali‘i ‘ua ma‘eu ‘ona lelei.”‘Aua le fa‘apea mai: “Po o le a le mea nei”“po o le a le mea lenā?”Auā e fa‘aaogāina mea uma i le itū aso e tatau ai. ²²O lana fetalaiga na fa‘apotopoto ai le vai e pei o se fa‘aputuga;o le fetalaiga fo‘i a ona laufofoga na i ai o fa‘atanoa e talia ai o vai. ²³Auā o lana poloa‘i e taunu‘u ai lona finagalo malie ma ‘ua lē matāofia lana fa‘aolataga. ²⁴O galuega a tagata uma ‘ua i ona lumama ‘ua leai se mea e tasi e lilo i ona fofoga. ²⁵Na te silasila mai le vavau e o‘o i le vavauma ‘ua leai se mea e ofoofogia i lana silafaga. ²⁶‘Aua le fa‘apea mai: “Po o le a le mea nei,” “po o le a le mea lenā?”Auā e fa‘aaogāina mea uma i le itū aso e tatau ai. ²⁷O le fa‘amanuiaga a le Ali‘i‘ua pei o le vaitafe pe a lofia ona ‘auvai. ²⁸E pei ‘ona lofia le lau‘ele‘ele i le lolo vai,e fa‘apea o lona to‘asā ‘ona fai ma tofi o nu‘una latou lē sā‘ili‘ili ‘iā te ia. ²⁹E pei ‘ona ia liliu o vai e fai ma mea matūtū,ona pa‘umatū ai lea le lau‘ele‘elema ‘ua laugatasi ona ala mo ona tagata,e fa‘apea ‘ona maua e tagata agasalai lona to‘asā ni mea e tausuai ai. ³⁰Na faia mea lelei mo tagata lelei talu mai le amataga,e fa‘apea fo‘i ‘ona faia mea leleima mea leaga mo tagata aupito leaga. ³¹O mea ‘ua aogā tupito mo le ola o tagata:o le vai, o le afi, o le u‘amea, o le masima,o le suāsusu, o le areto e gaosi i le falaoa,o le meli, o le fuifuivine, o le suāu‘u ma le ‘ofu. ³²O mea uma ia e ‘avea ma mea lelei mo tagata lelei,‘ae liua ma mea leaga mo tagata amio leaga ma tagata agasala. ³³E i ai ni matagi ‘ua faia e fa‘asala ai tagatama ‘ua latou fa‘amausalī i lo latou ita o puapuagā ‘ua latou fa‘atupu. ³⁴O ona po o le gata‘aga e fa‘aaogāina lo latou malosi,latou te fa‘alaulelei le to‘asā o lē ‘ua na faia i latou. ³⁵O le afi, o le uato‘a, o le oge ma le oti,o mea uma ia na faia ma fa‘asalaga; ³⁶o nifo o manu fe‘ai, o akarava, o gata ma le pelue fai ma sala a ē amio leaga se‘ia fa‘aumatia ai. ³⁷E fiafia lava i latou i ana poloa‘iga,e nofo sauni i latou i le lalolagi mo le itūlā tatau,a o ona po e tusa ai latou te lē solia lana poloa‘iga. ³⁸O le mea lea ‘ua ‘ou mautū ai i o‘u manatu talu le amataga; ma ‘ou mafaufau i ai ma ou filifili i ai, ‘ona ‘ou fa‘amau lea i se tusi, ³⁹“E lelei uma lava galuega a le Ali‘i;e fa‘aaogāina lava mea ta‘itasi i lona lava itū aso.” ⁴⁰E lē tatau ‘ona fa‘apea: “O le mea lea e sili lona leaga i lo lenei mea,”auā e fa‘amaonia mea uma i ona po e tatau ai. ⁴¹O lenei la, ‘ia ‘outou pepese ma le loto ‘atoa ma laugutu ma ‘ia ‘outou fa‘amanū i le suafa o le Ali‘i.