1 O lē alofa i lona atali‘i e to‘aga lava e sasa ‘iā te ia,‘ina ‘ia ‘oli‘oli ai o ia i lona i‘uga,‘aua le tu‘itu‘i ai o ia i faitoto‘a o ē latou te tuā‘oi.
2 E vi‘ia i lona atali‘i o lē ‘ua na a‘oa‘o atu ‘iā te ia,e fa‘amamaluina ai o ia i tagata o lona ‘āiga.
3 O lē a‘oa‘o atu i lona atali‘i na te fa‘atupu le matau‘a o lona fili,‘ae fa‘amamaluina ai o ia i totonu o ana uō.
4 ‘Ua oti le tamā, ‘ae peiseaī ‘ua lē oti lava;auā ‘ua mavae atu o ia ‘ae tu‘u mai se tasi la te tutusa.
5 O aso o lona olaga na ia va‘ai atu i ai ma ‘ua ‘oli‘oli ‘iā te ia;a oti fo‘i o ia, ‘ua lē fa‘anoanoa, ‘ua lē māsiasi fo‘i o ia i luma o ona fili.
6 Auā ‘ua na tu‘u mai se tasi na te puipuia le ‘āiga i ona fili,na te fa‘afetai atu fo‘i i ana uō.
7 O lē agamalū na‘uā i lona atali‘i, na te fusia ona manu‘a;e mutimutivale lona loto i ana auega uma.
8 O le solofanua ‘ua lē a‘oa‘oina e i‘u ‘ina taufe‘ai;o le tama ‘ua tu‘ufaitalia, e i‘u ‘ina ala ai.
9 A e fa‘apelepelevale i lou atali‘i, na te fa‘amata‘u ‘iā te oe;a e ta‘alo ‘iā te ia, na te fa‘atigā i lou loto.
10 ‘Aua ‘e te faia ni tausuaga ‘iā te ia, ne‘i e tigāina ai,ne‘i i‘u ‘ina lilivau ai ou nifo.
11 ‘Aua ‘e te tu‘ulafoa‘i o ia i aso o lona la‘itiiti,‘aua fo‘i ‘e te lotonoa i ona manatuga.
12 ‘Ia e lolo‘u lona ua a o la‘itiiti o ia, ‘ia e sasa i lona tino,a o tamaitiiti o ia, ne‘i mao fa‘amalō lona ulu,‘ona lē toe usita‘i lea ‘iā te oe, ‘ona puapuagātia lea o lou agaga.
13 ‘Ia e a‘oa‘o atu i lou atali‘i ma ‘ia e galue ‘iā te ia,‘ina ne‘i e māsiasi i ana amioga matagā.
14 ‘Ua sili le tagata mativa ‘ua mālōlōina ma le tino malosi,i le tagata mau‘oa ‘ua tino vaivai ma le mafatia i le ma‘i.
15 O le mālōlōina o le agaga i le pa‘ia o le amiotonu,‘ua sili lava lea i le mau auro ma le mau ario;‘ua sili fo‘i le tino mālōlōina i ni ‘oloa e lē māfuatia le tele.
16 O le ‘oloa ‘ua sili, o le tino mālōlōina lea;o le fiafia ‘ua sili lona lelei, o le fiafia lea o le loto.
17 ‘Ua sili le oti i le olaga ‘o‘ona,‘ua sili le mapusaga e fa‘avavau i le ma‘i e lē toe fo‘i i se lelei.
18 O mea lelei ‘ua molia i se gutu e lē matala,‘ua pei o se moliga o mea e ‘ai e si‘omia ai se tu‘ugamau.
19 Se ā se aogā i le tupua o le taulaga i mea taumafa,auā e lē ‘ai ai lava ia, e lē manogi fo‘i ‘iā te ia.
20 E fa‘apea lē ‘ua sasaina e le Atua,o tau‘ave le sala o lona amio leaga;
21 ‘ua va‘ava‘ai ona mata ma ‘ua ōi lava ia,e pei o le eunuka ‘ua fusi i se taupou ma ‘ua mapuitigā.
22 ‘Aua ne‘i e tu‘ulafoa‘i lou agaga i le fa‘anoanoa,‘aua ‘e te fa‘atigā i lou lava tino i ou mānatunatuga.
23 O le fiafia o le loto, o le ola lea o le tagata,o le tu‘ugā‘oloa e lē ma fa‘aumatia lea o le amiotonu;o le ‘oli‘oli o le tagata, o le olaga fa‘alevaleva lava lea.
24 ‘Ia e alofa i lou agaga ma fa‘afiafia i le Atua;‘ia e fa‘atatau lelei; ‘ia e fa‘amaopoopo lou loto i lona amiotonu,‘ia e fa‘amamao ‘iā te oe le loto fa‘anoanoa;
25 auā ‘ua to‘atele ni isi na fasiotia i le fa‘anoanoa,a ‘ua lē aogā lava ia i se mea e tasi.
26 O le matau‘a ma le ita e fa‘apu‘upu‘uina ai le ola,o le popolevale e toeaina ai le tagata a o le‘i o‘o i ona aso e tusa ai.
27 O lē loto mamā ma le alofa ‘ua ‘ai pea ia i mea lelei;e saunia lelei pea mo ia lana faigā‘ai. #