1 ‘Ona tula‘i lea le perofeta o Elia, e pei o se afi lava ia,sa ‘a‘asa lana ‘upu e pei o se sulu ‘ua mū.
2 ‘Ua na fa‘ao‘o mai ‘iā te i latou le oge ma ‘ua fa‘ato‘aitiitia o ē sa fa‘a‘ono‘ono ‘iā te ia i lo latou matau‘a,auā o i latou ia sa le lavā tali poloa‘iga a le Ali‘i.
3 O le fetalaiga a le Ali‘i na ia punitia ai le lagi ma tu‘uina ifo fa‘atolu le afi mai le lagi.
4 E fa‘apea ‘ona fa‘amamaluina o Elia i ana lava vāvega.Po o ai ‘ea a mafai ‘ona mitamita e pei o oe?
5 O le fetalaiga a le Ali‘i le Atua na e fa‘atūina mai ai lē na oti,nai le tu‘ugamau, nai le mālō o le oti.
6 Na e lafoia o tupu i lo latou malaia, na gagaugofie ‘iā te oe la latou pule;o tagata mamalu na e lafoia nai a latou moega.
7 Na e fa‘alogo i le fa‘amasinoga i Sinai ma le fa‘ai‘uga o le fa‘asalaga i Horepa.
8 Na e fa‘au‘uina o tupu e fai ma fa‘ao‘o sala,na e tofia perofeta e soloa‘i ane ‘iā te oe.
9 Na ‘aveina oe i le asiosio afi, i le ta‘avale ma solofanua afi.
10 ‘Ua tusia oe i fa‘amasinoga o le vavau, ‘e te tāofia le to‘asā o le Ali‘i,‘e te fa‘aliliuina le loto o le matua i le fānau, ‘e te toe fa‘atūina itū‘āiga o Iakopo.
11 ‘Amu‘ia lava i latou na iloa oe ma ‘ua fai mo latou mamalu la latou fa‘auō ma oe.
12 Auā ‘ua na o lenei olaga matou te ola ai;‘ae a oti, e lē fa‘apea ‘ona ta‘uta‘ua lo matou igoa.
13 ‘Ua ufitia Elia i le asiosio ma ‘ua fa‘a‘ato‘atoa mai lona agaga ‘iā Elisaia.O aso o lona ola ‘ua lē mata‘u lava ia i se ali‘i,‘ua lē faia‘ina fo‘i o ia i le malosi o se tasi.
14 Ma ‘ua lē fa‘avaivai lava ia i se mea e tasi ma ‘ua vavalo lava lona tino oti.
15 Na fai mea ofoofogia i lona soifua, ‘ua fai fo‘i ni vāvega ‘ina ‘ua oti o ia.
16 ‘Ae ui i mea uma ia, na lē salamō lava le nu‘u,‘ua latou le ‘alo ‘ese ai ‘iā latou agasala, se‘ia o‘o ‘ina tuli‘eseina i latou i lo latou lau‘ele‘ele,‘ua fa‘ata‘ape‘apeina i le lalolagi uma.
17 Ma ‘ua totoe na o si nu‘u e to‘aitiiti lava ma le ta‘ita‘i i le ‘āiga o Tavita.
18 O ni isi o i latou na latou faia o mea e fiafia ai le Atua;a o ni isi na latou fai ni agasala e tele lava.
19 O Esekia ‘ua na atia‘e le ‘olo o lona ‘a‘ai ma ta‘i mai le vai i ona totonu,‘ua na ‘eli le papa i le u‘amea ma ‘ua na ati a‘e se fa‘atanoa mo le vai.
20 O aso o lona nofoa‘iga na a‘e ai o Sanerivi ma ‘ua na ‘auina mai Ravesaki na si‘i lona lima ‘iā i latou,‘ua si‘i lona lima i Siona, ‘ua fa‘amaualuga lava ia i lona malosi.
21 ‘Ona fa‘avaivai lea o latou loto ma o latou lima,‘ua tigā i latou e pei o le fafine a fānau mai.
22 Na latou vala‘au i le Ali‘i agaalofa,‘ua fa‘aloaloa o latou lima ma si‘i a‘e i le lagi, i le o le Pa‘ia,o le Ali‘i le Atua, ‘ua na fa‘afofoga loa i o latou leo.
23 ‘Ua lē toe manatua e ia o a latou agasala,‘ua na lē tu‘uina atu fo‘i i latou i o latou fili,‘ae ‘ua na lavea‘iina i latou i lima o Isaia le perofeta pa‘ia.
24 ‘Ua na taia le togālauapi o tagata Asuria,o le agelu a le Ali‘i ‘ua na fa‘aumatia i latou.
25 Auā na faia e Esekia mea sa finagalo i ai o le Atua,na savali ma le malosi i le ala o Tavita, lona tamā,e pei ‘ona poloa‘i atu ‘iā te ia e Isaia le perofeta tele ma le fa‘amaoni i luma o le Atua.
26 O ona lava aso na solomuli ai le lā ma tulutulu‘i ai le olaga o le tupu.
27 O le matuā osofia o lona agaga na iloa atu ai o mea a le tuma ‘ua na fa‘amafanafana atu i ē sa fa‘anoanoa i Siona.E o‘o i le gata‘aga,
28 na ia fa‘aalia o mea o lumana‘i ma mea lilo a o le‘i tutupu.