1 O le poto ‘ua vivi‘i lava ia ‘iā te ia;e fa‘amamaluina fo‘i o ia i le Atua,e vi‘ia fo‘i o ia i totonu o lona nu‘u.
2 E tautala mai o ia i fa‘apotopotoga a le Silisili‘ese,e fa‘amamaluina i luma o lana afioga mamana.
3 E fa‘aeaina i totonu o lona nu‘u,e ofo ‘iā te ia le fa‘apotopotoga o le ‘au pa‘ia.
4 E maua ona vi‘iga i le fa‘apotopotoga o le ‘au filifilia,e fa‘a‘amu‘ia ‘iā te ia o ē fa‘amanuiaina e le Atua.E fa‘apea mai o ia:
5 “O le fofoga lava o le Silisili‘ese ‘ua na fa‘atuleia a‘u;‘ua fānaua lava a‘u a o le‘i fa‘atupuina se mea e tasi.
6 O a‘u lava na ‘ou fa‘atupu i le lagi le malamalama e lē matineia, ‘ua ‘ou ufitia le lalolagi ‘atoa, e pei o se ao.
7 Ma ‘ua ‘ou nofo i mea aupito i luga, o lo‘u nofoāli‘i ‘ua i le ao fa‘aniutū.
8 O a‘u to‘atasi na ‘ou ta‘amilo i le fa‘ata‘ali‘oli‘o o le lagi, ‘ua ‘ou ulu atu fo‘i i le loloto o le moana,‘ua ‘ou savali i luga o peau o le sami.
9 ‘Ua ‘ou tu i le lalolagi uma; o nu‘u uma lava,
10 ma mālō uma, na ‘ou fa‘atū ai la‘u pule sili;
11 ‘ua ‘ou solia i lo‘u malosi o loto o ē maualuluga ma ē maulalo.Na ‘ou sā‘ili ‘iā te i latou uma le mapusaga,‘ou te fia nofo i le tofi o le Ali‘i.
12 “‘Ona poloa‘i mai ai lea ma fetalai mai lē na ia faia mea uma;o lē na ia faia a‘u ‘ua ia fa‘amālōlō i lo‘u fale ‘ie.
13 Ma ‘ua fetalai mai: ‘Ia e nofo i totonu o Iakopo,‘ia faia Isaraelu mou tofi,‘ia e maua‘a i totonu o o‘u tagata filifilia.”
14 ‘Ua faia a‘u talu mai le amataga talu mai le vavau lava, e lē āu mavae fo‘i a‘u e o‘o i le fa‘avavau;‘ua ‘ou ‘au‘auna atu i ona luma i le malumalu pa‘ia.
15 ‘Ua fa‘apea ‘ona ‘ou mautū ai i Sionama ‘ua maua ai lo‘u mapusaga i le ‘a‘ai ‘ua fa‘apa‘iaina,‘ua fa‘atūina lo‘u mālō i Ierusalema.
16 ‘Ua ‘ou maua‘a i le nu‘u filifilia ‘ua fai lona tofi i le mālō o lo‘u Atua,‘ua fai lo‘u nofoaga i le fa‘apotopotoga o le ‘au pa‘ia.
17 ‘Ua ‘ou tupu maualuga e pei o le arasi i Lepanona,e pei o le perosi i le mauga o Siona.
18 ‘Ua ‘ou tupu maualuga e pei o le pama i Katesa,e pei o se togārosa i Ieriko.
19 E pei o se la‘auolive matagofie i le fanua,‘ua ‘ou tupu maualuga e pei o le aremoni i le ‘auvai,i tafatafa o le ala.
20 ‘Ua pua‘iina lo‘u magoni e pei o le kinamomi ma le pulupasama,‘ua ‘ou magoni lelei e pei o se muro filifilia;
21 e pei fo‘i o le pulu ma le pulu kalipana ma le sekeleta ma le pulu sisina ifo, e pei fo‘i o le pulu Lepanona e sisina fua,e fa‘apea ‘ona ‘ou fa‘amanogi lo‘u fale:o lo‘u manogi e pei o le pulu pasama ‘ua lē filogia.
22 E pei o le ‘elā, ‘ua ‘ou fa‘aloaloa ‘ou lālā;a o o‘u lālā o lālā o le mamalu ma le alofa.
23 E pei o le vine ‘ua ‘ou fa‘atupuina ni fuga magoni lelei;a o o‘u fuga ‘ua tutupu mai ai o fua o le mamalu ma le maumea.
24 O a‘u o le tinā o le alofa matagofie ma le mata‘u i le Atuama le talitonu ma le fa‘alagolago i lona pa‘ia.
25 ‘Ua ‘iā te a‘u le alofa tunoa ‘ato‘atoa o le ala tonu ma le ‘upu moni,‘ua ‘iā te a‘u le fa‘amoemoe ‘atoa o le ola ma le amiotonu.
26 ‘Inā ‘outou ō mai ia ‘iā te a‘u,o ‘outou o ē manana‘o ‘iā te a‘u,‘ina ‘ia lauleleia ‘outou i o‘u fua;
27 auā o le manatu ‘iā te a‘u e sili lona suamalie i lo le meli,a o le faitofi ‘iā te a‘u, ‘ua sili lea i le meli e ‘aina i lona fa‘amoega.
28 O lo‘u fa‘amanatuga e tumaui tupulaga e o‘o i le gata‘aga.
29 O ē ‘a‘ai ‘iā te a‘u, e toe fia ‘a‘ai i latou, a o ē feinu ‘iā te a‘u, e toe fia inu ai i latou.
30 O lē fa‘alogo ‘iā te a‘u, e lē māsiasi lava ia,o ē galulue fo‘i ‘iā te a‘u, e lē agasala i latou,
31 o ē fa‘amatala ‘iā a‘u,e maua e i latou le ola e fa‘avavau.
32 O mea uma ia, o le tusi lava o le ola,o le fānauga a le Silisili‘ese ma le ta‘utinoga o le ‘upu moni.
33 O Mose ‘ua na tu‘u mai le tulafono ma poloa‘iga o le amiotonu,o le tofi o le ‘āiga o Iakopo, o folafolaga ‘iā Isaraelu.
34 Na folafola e le Atua ‘iā Tavita lana ‘au‘auna,na te fa‘atupu mai ‘iā te ia le tupu mamana,e ti‘eti‘e o ia i le nofoāli‘i o le mamalu e o‘o i le fa‘avavau.
35 Na te fa‘atafe le poto, e pei o vai o le Pisona,e pei o le Tikera i aso o le fuata.
36 Na te fa‘atupu le mafaufau e pei o vai o le Eufirate,na te fa‘ateleina lava e pei o le Ioritana i aso o le seleselega.
37 ‘Ua lolo mai ai le a‘oa‘oga e pei o le vaitafe,e pei o vai o le Kaiona i aso e tau ai fua o le vine.
38 O ia o lē na muamua ‘ona iloa ‘ato‘atoa le poto,e lē mafai ‘ona maua lava lea e lē vaivai le mafaufau.
39 Auā e fa‘atauva‘a le tele o le vasa pe a fa‘atatau i ona manatu,e sili le loloto o ona mafaufau i lo le moana tele.
40 O a‘u o le poto, na ‘ou fa‘atafe o vai tetele.
41 O a‘u e pei o le ala e tafe mai ai o vai tetele o le vaitafe,e pei o le alāvai o le vaitafe, e pei o le vaita‘i mai Parataiso.
42 Na ‘ou fa‘apea ifo: “‘Ou te fa‘asūsūina lo‘u togāla‘au,‘ou te fa‘ausia o fuāla‘au o lo‘u lotoā.”
43 A o lenei, ‘ua fa‘alauteleina lo‘u alāvai,a o lo‘u vaitafe ‘ua pei o se moana.
44 Auā ‘ou te fa‘apupula la‘u a‘oa‘oga e pei o le tafa mai o ata i luga o tagata uma,‘ou te fa‘amatalaina lava e o‘o atu i nu‘u mamao.
45 ‘Ou te alu ifo i le loloto o le ‘ele‘ele, ‘ou te iloa atu ai o ē uma ‘ua momoe,‘ou te fa‘amalamalama ‘iā te i latou uma o ē fa‘alagolago i le Ali‘i.
46 ‘Ou te fia fa‘asalalau fo‘i la‘u a‘oa‘oga e pei o se valo‘aga,‘ou te tu‘ua lava ia ‘iā te i latou uma o ē sā‘ili‘ili i le poto,‘ou te lē te‘a ‘ese fo‘i i o latou tupulaga e o‘o lava i le fa‘avavau.
47 ‘Ia ‘outou iloa e lē na o a‘u ‘ua aogā i ai la‘u galuega,‘ae aogā ‘iā te i latou uma o ē sā‘ili‘ili i le ‘upu moni.