Sirako
Le mataupu 35
O LE TUSI PA'IA - Ekalesia Katoliko Roma
O Taulaga e Fiafia i ai le Atua
1O lē tausi i le tulafono, ‘ua na fa‘afaula‘i ai ana taulaga.
2O le to‘aga i le tulafono ma le ‘alo ‘ese i agasala uma,o le taulaga fa‘aola lava lea.
3O lē ‘alo ‘ese i le amio leaga,o le momoli lea o se taulaga togiola mo agasala ma se fa‘ato‘esega mo soligātulafono.
4O le fa‘afetai atu i le Atua, o le moliga lea o le falaoa mata aupito lelei;a o lē ‘ua agaalofa, ‘ua momoli e ia se taulaga.
5O le ‘alo ‘ese i le leaga e finagalo malie i ai le Ali‘i,a o le fa‘amamao ma le amio leaga, o le fa‘ato‘esega lea mo agasala.
6‘Aua ‘e te tu i luma o le Ali‘i ma le leai sau mea alofa.
7Auā e faia o mea uma ia ‘ona o le poloa‘iga a le Atua.
8O le mea alofa a le tagata amiotonu e lololo a‘i le fatafaitaulagama ‘ua manogi lelei i luma o le Silisili‘ese.
9E talileleia le taulaga a le tagata amiotonu,e lē fa‘agalogaloina lava e le Atua.
10‘Ia e vivi‘i atu i le Atua ma lou loto lelei,‘aua fo‘i ‘e te fa‘aitiitia le fa‘apolopolo o le fua o au galuega.
11‘Ia e fai au mea alofa ma le mata fiafia,‘ia e fa‘apa‘ia ma le ‘oli‘oli o mea e sefulua‘i āu mea.
12‘Ia e avatu i le Silisili‘ese e tusa ma mea na ia foa‘i mai ‘iā te oe;‘ia e momoli ma le loto malie o mea ‘ua i ou lima;
13auā e taui mai lava e le Ali‘i, na te taui fa‘afitu mai ‘iā te oe.
O le Atua ma lana Fa‘amasinoga Tonu
14‘Aua ‘e te momoli atu ni mea alofa o le amioletonu,auā na te lē talia lava.
15‘Aua fo‘i ‘e te fa‘alagolago i se taulaga i ni mea gaoia,auā o le Ali‘i o le fa‘amasino lava ia na te lē fa‘ailogaina tagata i lo latou mamalu.
16Na te lē fa‘ailogaina tagata ‘ina ‘ia leaga ai o lē mativa,na te fa‘afofoga fo‘i i le tatalo a lē ‘ua fa‘aleagaina.
17Na te lē ta‘ufa‘atauva‘a i le tatalo a lē mātuaoti,po o le fafine ‘ua oti lana tane na te fa‘apa‘ūina atu i ona luma lona mapuitigā.
18O loimata o le fafine ‘ua oti lana tane,po ‘ua lē tafe ifo ‘ea i ona alafau?po ‘ua lē pā ‘ea lana ‘alaga i luga o lē na te fa‘aosoina lana tagi?
19Auā e a‘e ona loimata i le lagi mai ona alafau.
20E fa‘afofogaina lē na te ifo atu i le Atua ma le loto fiafia,e alu a‘e lana tatalo e o‘o i ao o le lagi.
21E alu a‘e i luga o ao le tatalo a lē fa‘amaulalo o ia ‘iā te ia,e lē nā fo‘i o ia se‘ia tau atu i le Atua, e lē te‘a ‘ese fo‘i o ia se‘ia silasila ‘iā te ia le Silisili‘ese.
22E lē fa‘atuai mai le Ali‘i; na te fa‘amasinoina o ē amiotonu,e fa‘amasinotonu lava ia;e lē toe ‘onosa‘i le Silisili‘ese i lona malosi i ē fa‘asauā mai,se‘ia o‘o ‘ina gagau o latou pāpātua.
23Na te taui ma sui i nu‘u ‘ese, se‘ia fa‘aumatia le vao tagata fa‘amaualuluga,se‘ia gagau o to‘oto‘o o ē amio leaga.
24Se‘ia taui mai i tagata e tusa ma a latou amioga,e tusa ma amio a Atamu mōna manatu fa‘amaualuga.
25Se‘ia faia e ia le fa‘amasinoga o lona nu‘u,ma fa‘a‘oli‘oli i tagata amiotonu i lona agaalofa.
26E matagofie le agaalofa o le Atua, i ona po o puapuagā,e pei o le ao timu i aso o le lāmala.