1 Lo‘u atali‘i e, a e fa‘asaga atu i le ‘au‘auna i le Atua,‘ia e mautū i le amiotonu ma le mata‘u, ‘ia e sauniuni fo‘i lou loto i le tofotofoga.
2 ‘Ia e fa‘amaulalo lou loto ma e ‘onosa‘i, ‘ia e ua‘i atu lou taliga ma tali ai ‘upu o le poto,‘aua lava ‘e te fa‘atopetope i le aso o le puapuagā.
3 ‘Ia e ‘o‘ono pe a tuai mai le Atua, ‘ia e lotogatasi pea ma le Atuama ‘ia e ‘onosa‘i ‘ina ‘ia fa‘ateleina ai lou olataga i aso amulī.
4 ‘Ia e tali mea uma lava ‘ua fa‘ae‘etia i ou luga, ‘ia e ‘o‘ono i le puapuagā,‘ia e tāofi i le loto ‘onosa‘i pe a māsiasi o oe.
5 Auā e tofotofoina i le afi le auro ma le ario,a o le ‘ogāumu o le māsiasi e tofotofoina ai i latou e alofagia e le Atua.
6 ‘Ia e fa‘alagolago i le Atua, ‘ona toe si‘itia lea o oe e ia; ‘ia e fa‘atonu ou ala ma e fa‘amoemoe ‘iā te ia;‘ia e tausi i le mata‘u ‘iā te ia, ‘ia e tumau i ai se‘ia o‘o ‘ina e toeaina.
7 O ‘outou o ē matata‘u i le Ali‘i, ‘ia ‘outou fa‘atalitali i lona agaalofa;‘aua lava ne‘i ‘outou fulitua ‘iā te ia, ne‘i pa‘u‘ū ai ‘outou.
8 O ‘outou o ē matata‘u i le Ali‘i, ‘ia ‘outou fa‘atuatua ‘iā te ia,e lē maumau ‘iā te ‘outou lo ‘outou taui.
9 O ‘outou o ē matata‘u i le Ali‘i, ‘ia ‘outou fa‘alagolago ‘iā te ia,‘ona ‘outou tali ai lea ma le fiafia lona agalelei.
10 O ‘outou o ē matata‘u i le Ali‘i, ‘ia ‘outou alolofa ‘iā te ia,‘ona fa‘amalamalamaina ai lea o ‘outou loto.
11 ‘Ia ‘outou tetepa, o‘u atali‘i e, i fānauga a tagata ma ‘ia ‘outou iloa ai,‘ua leai se to‘atasi na fa‘alagolago i le Ali‘i ma ‘ua ia māsiasi ai.
12 Auā o ai na fa‘amaoni i ana poloa‘iga ma ‘ua tu‘ulafoa‘iina?O ai fo‘i na vala‘au atu ‘iā te ia ma ‘ua tauemuina e ia?
13 Auā e agalelei le Atua ma le agaalofa, na te fa‘amāgaloina agasala i aso o le puapuagā,na te puipui ‘iā te i latou uma e sā‘ili‘ili ‘iā te ia ma le fa‘amaoni.
14 ‘Oi talofa i lē fa‘alotolotolua, i laugutu fa‘atupu agasala ma lima amioletonu,i tagata agasala e fa‘atausavavali i ala e lua.
15 ‘Oi talofa i ē loto vaivai, ‘ua latou lē fa‘atuatua i le Atua,o le mea lea e lē puipuia ai i latou e ia.
16 ‘Oi talofa ‘iā te i latou ‘ua lē toe lavā ‘onosa‘i ma ‘ua latou tu‘ulafoa‘i le ala o le amiotonu,a ‘ua fesēa‘i i ala pi‘opi‘o solo.
17 Se ā sa latou mea a fai pe a fa‘asaga le Ali‘i i lana su‘esu‘ega?
18 O ē matata‘u i le Ali‘i, ‘ua lē fa‘alogogatā i latou i ana fetalaiga;o ē alolofa fo‘i ‘iā te ia, e tausia e i latou lona ala.
19 O ē matata‘u i le Ali‘i, latou te sā‘ili‘ili i mea e fiafia ai lona finagalo,o ē alolofa ‘iā te ia e fa‘alauleleia i latou i lana tulafono.
20 O ē matata‘u i le Ali‘i, e nofo sauniuni o latou loto,latou te fa‘aagatonuina fo‘i o latou agaga i ona luma.
21 O ē matata‘u i le Ali‘i, latou te tausia ana poloa‘iga,e ‘o‘ono fo‘i i latou se‘ia o‘o ‘ina asiasi mai o ia;
22 o fa‘apea ifo a i latou: ‘Āfai ‘ua tatou lē salamō, e pa‘u‘ū ai i tatou i ‘a‘ao o le Atua,‘ae lē o lima o tagata.
23 Auā e pei o le tele o lona mana, e fa‘apea fo‘i le tele o le agaalofa o lona finagalo.