Sirako

O le Mau‘oa Leaga ma le Mau‘oa Lelei

¹O le tagata ‘ua mataala ‘ona o le fia mau‘oloa,e fa‘aumatia e ia lona lava tino;a o le manatu i ai e tuli‘esea ai le moe. ²O le popole i aso o lumana‘i e fa‘aumatia ai le mafaufau,a o le ma‘i faigatā e fa‘atonuina ai le agaga. ³E galue le mau‘oloa e fa‘apotopoto a‘i ana ‘oloa,a o‘o ‘ina mapu o ia, ‘ona fa‘atumuina lea o ia i mea lelei. ⁴E galue le tagata mativa, e lē maua ai lana mea e ‘ai;a uma fo‘i lana galuega, e mativa pea lava. ⁵O lē tu‘inanau i le auro, e lē āu mavae o ia ma le agasala,a o lē sā‘ili i mea ‘augavale, e fa‘atumuina ai lava ia. ⁶E to‘atele ni isi na fano ‘ona o le auro;o lona pupula na malaia ai i latou. ⁷O le auro ‘ua se la‘au e tevateva ai o ē faitaulaga i ai;‘oi talofa ‘iā te i latou e tu‘inanau i ai!E fano ai o i latou uma ‘ua lē mafaufau. ⁸‘Amu‘ia le tagata mau‘oloa ‘ua maua o ia e aunoa ma se ilama ‘ua lē sā‘ili atu i auro ma ‘ua lē fa‘alagolago i tupe ma tu‘ugā‘oloa! ⁹Po o ai lava ia, se‘i tatou vivi‘i atu ‘iā te ia,auā ‘ua na faia ni mea ofoofogia i lona olaga. ¹⁰A tofotofoina o ia i le auro ma ‘ua ‘ato‘atoa lona lelei,e ‘iā te ia le mamalu e fa‘avavau;sa mafai ‘iā te ia ‘ona solitulafono, a ‘ua lē solitulafono lava ia,sa mafai ‘iā te ia le leaga, a ‘ua na lē faia. ¹¹O le mea lea ‘ua fa‘amausalīina ai ana ‘oloa i le Ali‘i,e tala mai fo‘i ana mea alofa e le potopotoga o le ‘au pa‘ia uma.

O le Faigā‘ai

¹²A e ti‘eti‘e i se taumafataga lelei,‘aua ‘e te tatala muamua ai lou gutu. ¹³‘Aua ‘e te fai ane: “‘Ua tele lava mea ‘ua i ai.” ¹⁴‘Aua ne‘i galo ‘iā oe o le mea leaga le mata matau‘a. ¹⁵‘Ua i ai ‘ea se tasi mea na faia e sili lona leaga i lo le mata matau‘a?O le mea lea ‘ua tagi ai lava lona tino ‘atoa pe a tepa mai. ¹⁶‘Aua ‘e te fa‘aloaloa muamua atu lou lima,‘ina ne‘i fa‘aleagaina oe i le matau‘a, ‘ona e māsiasi ai lea. ¹⁷‘Aua ‘e te popole vale i faigā‘ai. ¹⁸‘Ia e lagona ifo i ou lava mana‘oga o mana‘oga o lē lua te tuā‘oi. ¹⁹‘Ia e ‘ai i mea ‘ua tu‘u mai e pei o se tagata ‘ua na iloa fa‘atatau,‘ina ne‘i e ‘ai tele na‘uā, ‘ona ‘inosia ai lea oe. ²⁰‘Ia muamua oe ‘ona fa‘auma, ‘ia iloa ai ‘ua lelei ‘ona a‘oa‘oina oe;‘aua ‘e te ‘aipā, ne‘i tupu ai le tausuai. ²¹‘Āfai ‘ua ‘outou ‘a‘ai fa‘atasi ma ni isi e to‘atele,‘aua ne‘i muamua atu lou lima,‘aua fo‘i ne‘i e muamua oe ‘ona e tapa le mea e inu. ²²E lava sina uaina itiiti i le tagata a‘oa‘oina.E lē fa‘alavelave ‘iā te oe pe a e moe, e lē fa‘atigāina ai fo‘i oe. ²³O le moe‘u‘u, le mānava tigā, o le fia pua‘i,o mea ia a le tagata ‘ua ‘ai tele. ²⁴A o le tagata ‘ua tausi i le amio pulea, e moe mālōlōina o ia;e moe e o‘o atu i le taeao, ‘ae fiafia lona agaga i totonu ‘iā te ia. ²⁵‘Āfai fo‘i na fa‘amalosia oe e ‘ai i mea e tele, ‘ia e tula‘i, fa‘asuati,‘ona e mālōlō ai lea, ‘e te lē fa‘atupu fo‘i se ma‘i i lou tino. ²⁶Lo‘u atali‘i e,‘ia e fa‘alogo mai ‘iā te a‘u, ‘aua ‘e te ta‘ufa‘atauva‘a ‘iā te a‘u,‘ona i‘u ai lea ‘ina e lagona a‘u ‘upu. ²⁷‘Ia e filigā i au galuega uma lava, ‘ona lē maua ai lea oe i se ma‘i. ²⁸O laugutu o tagata e to‘atele e vi‘ia ai lē na te foa‘i mai o mea e ‘ai ma le lima lelei,e moni fo‘i le molimau i lona loto alofa. ²⁹E muimui le ‘a‘ai ‘atoa i lē foa‘i mai mea e ‘ai ma le mata‘ū,e moni fo‘i le molimau i lona loto leaga.

O le Uaina

³⁰‘Aua ‘e te fa‘aa‘oa‘o i ē to‘aga e inu uaina,auā o le uaina ‘ua malaia ai ni isi e to‘atele. ³¹O le afi e tofotofoina ai le malō o le u‘amea;e fa‘apea fo‘i ‘ona ‘iloga ai o loto o ē fa‘amaualuga pe a ‘onā i latou i le inu uaina. ³²O le uaina e inumia fa‘atatau, e tusa lea ma le ola i le tagata;‘āfai ‘ua e inu fa‘atatau i ai, ‘ona e tausia ai lea le amio pulea. ³³E tusa i le ā le ola o le tagata ‘ua leai sana uaina? ³⁴O le a le mea e fa‘aumatia ai le ola? O le oti lea. ³⁵Na faia le uaina talu mai le amataga ‘ina ‘ia fiafia ai,‘ae lē o le ‘onā ai. ³⁶O le uaina e inumia ma le fa‘atatau,o le ‘oli‘oli lea o le agaga ma le loto. ³⁷O lē inu ma le fa‘atatau, e mālōlōina ai le agaga ma le tino. ³⁸O le uaina ‘ua so‘ona inu tele ai e tupu ai le loto tigā ma le ita,‘atoa ma ni mala tetele. ³⁹O le uaina ‘ua so‘ona inu tele ai, o le mea ‘o‘ona lea i le agaga. ⁴⁰O le ‘onā e ala mai ai le fia osovale, e pa‘ū ai le tagata fa‘atamala,e māui ai le malosi, e manu‘a ai le tino. ⁴¹‘Aua ‘e te finau ma lē lua te tuā‘oi i le faigā‘ai e fai ai ni uaina,‘aua ‘e te tauemu atu ‘iā te ia pe a osofia o ia i le fiafia. ⁴²‘Aua ‘e te ‘upuleaga atu ‘iā te ia,‘aua fo‘i le u‘una‘i atu i ai i sau mea ‘ia fa‘aola mai e ia.