1 E lē o‘o se leaga i lē mata‘u i le Atua;‘ae tausia lava ia e le Atua i tofotofoga,na te lavea‘i ‘iā te ia a‘i le leaga.
2 O le tagata poto e lē ‘ino‘ino i poloa‘iga ma tulafono,e lē tu‘ia o ia e pei o le va‘a i le afā.
3 O le tagata mafaufau e fa‘atuatua o ia i le tulafono a le Atua,e fa‘amaoni fo‘i le tulafono ‘iā te ia.
4 O lē fia fai sana tagi, ‘ia sauniuni lelei ana ‘upu, ‘ona talileleia lea o lana ōlega;na te tausia fo‘i le tulafono, ‘ona fai ai lea o sana tali.
5 O le loto o le vale e pei o le uili o le nofoa ta‘avalevale,a o ona manatu ‘ua pei o se pe‘ape‘a saga ta‘avilivili.
6 O le uō tauemu ‘ua pei o le solofanua po‘a, e e‘e lava ia, so se tasi e ti‘eti‘e ‘iā te ia.
7 O le a le mea e sili ai le tasi aso i le tasi aso,le malamalama i le malamalama, le tausaga i le tasi tausaga,‘ae mai le lā uma lava?
8 O le poto o le Ali‘i na vavae‘eseina ai ‘ina ‘ua faia le lā na te tausia ana poloa‘iga.
9 ‘Ua na fa‘a‘ese‘eseina o vaitausaga ma aso tetele e i ai,ma ‘ua latou tausi ai itūlā i le fa‘amamalu o aso tetele.
10 O ni isi aso ‘ua fa‘amamaluina ma fa‘apa‘iaina e le Atua,a o ni isi ‘ua na tu‘uina i le sologa o aso;e fa‘apea fo‘i ‘ona faia tagata uma i le efuefu ma le ‘ele‘ele na faia ai Atamu.
11 A ‘ua vavae‘ese‘eseina i latou e le Atua i le tele o lona poto,‘ua na fa‘asavali i latou i ala ‘ese‘ese.
12 ‘Ua na fa‘amanuiaina ni isi ma fa‘amamalu ‘iā te i latou;‘ua na fa‘apa‘iaina nisi ma tāofia i latou mo ia lava;a o ni isi ‘ua na fa‘amalaia ma fa‘amaulaloina, ma ‘ua na ta‘ita‘i ‘ese i latou ma fa‘ate‘a ‘ese.
13 E pei o le ‘omea i lima o lē fai ipu ‘omea, na te palua ma gaosia.
14 O ona uiga uma lava e tusa ma lona loto faitalia;e fa‘apea le tagata i le ‘a‘ao o lē ‘ua na faia o ia;na te tu‘u atu ‘iā te i latou e tusa ma lana fa‘amasinoga.
15 E fesagai le lelei ma le leaga, fesagai le ola ma le oti;e fa‘apea fo‘i ‘ona fesagai le tagata amiotonu ma le tagata agasala.E fa‘apea ‘ona e mātau i galuega uma a le Silisili‘ese,‘ua soa, ‘ua ta‘ilua ‘ae fesagai le tasi i le tasi.
16 A o a‘u nei ‘ua mulimuli ‘ona ‘ou ala,‘ua pei lava a‘u o lē na te ao ni fua o le vine, o mulimuli i ē tau ona fua.
17 Na ‘ou fa‘alogologo fo‘i a‘u i le fa‘amanuiaga a le Atua,ma ‘ua pei lava a‘u o sē tau fuāvine, ‘ua ‘ou fa‘atumuina le soligāvine.
18 ‘Ia ‘outou iloa, e le‘i faia mo a‘u to‘atasi la‘u galuega,‘ae mo i latou uma o ē sā‘ili‘ili i le a‘oa‘oga.
19 O lenei, ‘ia fa‘alogo mai ‘iā te a‘u, o ‘outou ta‘ita‘i,‘atoa ma le nu‘u, ‘ia usi mai lo ‘outou fa‘afofoga, ‘outou o faipule o le fa‘apotopotoga.
20 ‘Aua ne‘i e tu‘u atu i lou atali‘i po o lau avā po o lou uso,po o lau uō, ‘ina ‘ia pule ‘iā te oe i aso o lou olaga;‘aua fo‘i ‘e te foa‘i atu au ‘oloa i se tasi,‘ina ne‘i e salamō ai ma toe tagi atu lava i ai.
21 ‘Aua lava le liua lou loto e se tasi manū o ‘iā te oe le mānava ola.
22 Auā e lelei pe a tagi mai lau fānau ‘iā te oe,‘ae leaga pe a ua‘i atu ou mata i lima o lau fānau.
23 O au galuega uma, ‘ia pule ai pea oe.
24 ‘Aua fo‘i ‘e te fa‘a‘ele‘elea ai lou igoa lelei.A o‘o i le aso fa‘ai‘u o aso o lou olaga ma le itū aso o le oti,‘ona e fai ai lea le mavaega i āu mea.
25 O le mea e ‘ai, o le sasa ma le avega mo le asini;o le areto, o le a‘oa‘oga ma le galuega mo le pologa.
26 E galue o ia pe a sasaina, a ‘ua fia fa‘amālōlō lava ia;‘ae fa‘amātagataga ona lima, ‘ona ‘a‘apa atu loa lea i le sa‘olotoga.
27 O le amo ma le fusi e fa‘apunou a‘i le ua ma‘a‘a,o galuega saga fai pea e ‘augofie a‘i le pologa.
28 O le sasa ma le noanoaga u‘amea i le pologa loto leaga;‘ia e tuliloa ‘ia e faigaluega, ‘aua le nofo paiē o ia.
29 Auā o le paiē e a‘oa‘oina a‘i tagata i mea leaga e tele.
30 ‘Ia e fa‘agalue lava ia, auā o le mea e tatau ma ia.‘Āfai e lē usita‘i, ‘ia e gau lona loto i noanoaga u‘amea.‘Ae ‘aua ‘e te sopo le tuā‘oi i le vā ma se tasi tagata,‘aua lē faia sau mea e tasi, vaganā ‘ua e mua‘i filifili lelei i ai.
31 A i ai sou pologa loto fa‘amaoni,‘ia ‘iā te oe o ia e pei o lou lava agaga;‘ia e tausi i ai e pei o sou uso, auā o lou lava toto na e fa‘atauina ai o ia.
32 ‘Āfai ‘e te fa‘asauā fua ‘iā te ia, e sola lava.
33 ‘Ae ‘āfai ‘ua alu ma sola,‘e te lē iloa se ala ‘e te toe sā‘ili ai ‘iā te ia,po o ai fo‘i ‘e te sā‘ilia.