Sirako

O le Pese Fa‘afetai i le Atua

¹O le tatalo a Iesu, le atali‘i o Sirako: Le Ali‘i e lo‘u Tupu,‘ou te fa‘afetai atu ‘iā te oema ‘ou vivi‘i atu ‘iā te oe, le Atua lo‘u Fa‘aola. ²‘Ou te ta‘ua lou suafa,auā ‘ua faia oe o lo‘u fesoasoani ma lo‘u talitā. ³Na e lavea‘iina lo‘u tino a‘i le fanoga, a‘i mailei a le laulaufaiva ‘upu leagama laugutu a ē lalaga le tala pepelo;‘ua ‘avea oe mo‘u puipui i luma o o‘u fili. ⁴Ma ‘ua e lavea‘i ‘iā te a‘u, e tusa ma le faula‘iga o lou agaalofa ta‘uta‘ua,a‘i leona tagi sa nofo sauni i le ‘ai, ⁵a‘i lima o ē sā‘ili ‘iā te a‘u ‘ia ‘ou oti, a‘i faitoto‘a o puapuagā na si‘omia ai a‘u, ⁶a‘i le malosi o le afi mū na fa‘ata‘ali‘oli‘o ‘iā te a‘u,a ‘ua ‘ou tu i totonu o le afi,‘ua lē susunuina lava a‘u. ⁷I le loloto o le lua o le tu‘ugamau, a‘i le laulaufaiva ‘ele‘elea ma le ‘upu pepelo,a‘i le tupu amio leaga ma le laulaufaiva o lē amioletonu. ⁸E vivi‘i atu lo‘u agaga i le Ali‘i e o‘o atu i le oti. ⁹Sa fa‘alata atu lo‘u ola i le vanu o le tu‘ugamau. ¹⁰Sa latou fa‘ata‘ali‘oli‘o ‘iā te a‘uma ‘ua leai se tasi na te fesoasoani mai;sa ‘ou sā‘ili i se fesoasoani mai ia tagatama ‘ua leai lava se to‘atasi. ¹¹‘Ua ‘ou manatua lou agaalofa, le Ali‘i e, ma au galuega e mai anamuā. ¹²Auā ‘ua e fa‘aola ‘iā te i latou ‘ua fa‘alagolago ‘iā te oe,le Ali‘i e,ma ‘ua e lavea‘i ‘iā te i latou a‘i lima o tagata nu‘u ‘ese. ¹³O oe na e fa‘aeaina lo‘u nofo i le lalolagima ‘ua ‘ou tagi atu ‘ona ‘ua oso mai le oti. ¹⁴Na ‘ou vala‘au atu i le Ali‘i, le Tamā o lo‘u Ali‘i,‘ia ‘aua ne‘i tu‘ulafoa‘i ‘iā te a‘u i le aso o lo‘u puapuagā,o aunoa ma se puipui i le aso o ē fa‘amaualuga ‘iā te a‘u. ¹⁵‘Ou te vivi‘i atu i lou suafa i aso uma,‘ou te fa‘amanū i ai i la‘u fa‘afetai.‘Ua fa‘afofogaina o la‘u tatalo, ¹⁶ma ‘ua e lavea‘i ‘iā te a‘u a‘i le fanoga,‘ua e fa‘asaoina a‘u i le aso leaga. ¹⁷O le mea lea ‘ou te vivi‘i atu aima ‘ou fa‘ane‘ene‘e ai ‘iā te oe,‘ou te fa‘amanū i le suafa o le Ali‘i.

O le Sā‘ili i le Poto

¹⁸O aso a ‘ou taule‘ale‘a, a o le‘i amata ‘ona ‘ou ta‘asē,‘ua ‘ou fa‘aalia la‘u sā‘ili i le poto i a‘u talosaga. ¹⁹Na ‘ou tagi atu ai i luma o le malumalu,‘ou te sā‘ili fo‘i i ai e o‘o i le i‘uga ma ‘ua fua mai e pei o se fuifuivine taumūmū mai. ²⁰‘Ua ‘oli‘oli i ai o lo‘u loto, ‘ua sāvavali o‘u vae i le ala tonu,‘ua ‘ou sā‘ili lava i ai e āfua mai i lo‘u taule‘ale‘a. ²¹Na ‘ou ua‘i teisi o lo‘u taliga ma ‘ua ‘ou talia lava ia. ²²‘Ua ‘ou maua i lo‘u loto le poto matuā tele ma ‘ua tele ai lo‘u alualu i luma. ²³‘Ou te fa‘ane‘ene‘e atu i lē ‘ua na foa‘i mai le poto, ²⁴auā ‘ua tonu ‘iā te a‘u ‘ou te fa‘aaogāina.‘Ua ‘ou tauivi ai i le amio lelei, ‘ou te lē māsiasi ai lava. ²⁵‘Ua tau le tau‘a e lo‘u agaga ‘ia maua le poto,‘ua fa‘amalosi fo‘i i le tausi i ai. ²⁶Na ‘ou si‘i o‘u lima i le lagi, ‘ua ‘ou fa‘anoanoa ‘ona ‘ua lē āu iloa o ia. ²⁷‘Ua ‘ou fa‘asaga tonu lo‘u loto ‘iā te ia, ‘ona ‘ou maua lea ma iloa atu o ia. ²⁸Talu mai le amataga ‘ua ‘ou pulea lo‘u loto ‘ona o ia, o le mea fo‘i lea e lē tu‘ulafoa‘iina ai a‘u. ²⁹Sa naunau lo‘u loto i le sā‘ili‘ili ‘iā te ia,o le mea lea ‘ua ‘ou mauaina se tu‘ugā‘oa tāua. ³⁰‘Ua tu‘u mai e le Ali‘i lo‘u taui, o le laulaufaiva ‘ou te vivi‘i atu ai ‘iā te ia. ³¹‘Ia ‘outou fa‘alatalata mai ‘iā te a‘u, o ‘outou o ē vālelea,‘ia fa‘apotopoto ‘outou i le fale o le a‘oa‘oga. ³²Se ā le mea ‘ua ‘outou fa‘atuai ai?Se ā se ‘upu ‘ua ‘outou faia ai?‘Ua matuā gālala o ‘outou agaga. ³³‘Ua matala mai ou laugutu, ‘ua ‘ou tautala ai.‘Ia ‘outou fa‘atau ma le leai se tupe e totogi a‘i, ³⁴ma ‘ia tu‘uina o ‘outou ‘ua i lalo o le amo ma ‘ia talia lea a‘oa‘oga e o ‘outou agaga,auā e lē aogā ‘ona ō mamao i le maua ai. ³⁵‘Ia va‘ava‘ai mai o ‘outou mata ‘ua itiiti si ‘ou tautigā,a ‘ua ‘ou maua mai ai le mapusaga tele! ³⁶‘Ia ‘outou talia le a‘oa‘oga i le tele o tupe ario,ma ‘ia ‘outou maua mai ai le auro e tele anoanoa‘i. ³⁷‘Ia ‘oli‘oli o ‘outou agaga i lona agaalofa,e lē māsiasi lava ‘outou i le vivi‘i atu ‘iā te ia. ³⁸‘Ia faia la ‘outou galuega a o le‘i o‘o i ona po na tu‘u ai,‘ona tu‘u mai lea e ia le taui ‘iā te ‘outou i ona po e tatau ai.